Banyak Anak Banyak Rejeki

"Banyak anak banyak rejeki"

Seperti itule biasenye orang Betawi setiap ngeliat ade satu keluarge nyang anaknye lebih dari due atawe tige orang. Pendapat nyang kayak gini sepertinye udeh mendarah daging di masyarakat. Sering bahkan disetiap ceramah2 guru-guru ngaji sukan nerangin kalu tiap-tiap anak akan bawa rejekinye kendiri. Tapi, kalu kita bandingin ame care idup sekarang dimane persaingan buat nyari rejeki dirase ude sulit banget. Nah kalu dulu waktu Babenye si Mamat punya anak sembilan juga tanenye lebar. Jadi, seumpame tu tanah dijadiin garapan buat pu'un buah-buahan atawe sayur-sayuran juga kalu anaknye banyak jadi banyak nyang ngebantuin. Lantas pegimane carenye nyekolain tu anak ? trus tambahan lagi ame kebiasaan Babenye seperti orang Betawi laennye nyang kalu ade keperluan dikit aje langsung ngegaris tane.. matenye ude kenal banget ame duit dan nggak tahan ame rayuannye engkoh-engkoh buat ngelepas tanenye nyang pas di depan jalan gede. Pastinye lame-lame tanenye tinggal 'semetet' (sedikit) doang...

Tapi, lame-lame pendapat begini juga ude mulai orang pade mikir-mikir. Lebih-lebih lagi udah banyak ustad atawe guru nyang nerangin ternyate di jama Nabi juga ade carenye orang ngejarangin anak.. diantarenye misalnye emak-emak disuruh nete-in anaknye secepet-cepetnye due taon lamenye. Insya-alloh bisa ngejarangin anak. Tapi, ade juge nyang kadang-kadang kebablasan juge. Ade juge beberape temen ane nyang lumayan alim, ngasih tauk ane.

"pake cara jaman nabi aje".. katenye stil yakin. Lama tuh ane bongkar2 lagi buku hadis ane nyang menyangkut masalah ngatur anak dan care nyang dibolehin. akhirnye ketemu.. name islamnye "AZZL". Disitu dibilangin carenye yaitu pake care dipise.. artinye saat tu bibit lelaki mau keluar buru-buru dilemparin keluar biar tumpe ke mane-mane jadi kagak tumpe ke tempat emaknye si entong. Wal hasil, kalu emang Allah ijinin bisa jadi tuh anak nggak nongol.. tapi nggak jarang juge nyang malah tetep nambah aje anaknye..

Pikir-pikir ternyate pembatasan anak dalam rume tangge emang ade perlunye juge ye.. tapi, semuenye pastinye terserah ame nyang punye diri kendiri. Kalu emang ude siap buat ngadepin resikonye ye nggak pape.. tapi kalu repot takut nggak bisa ngempanin anak bini .. yee sekedarnye aje.. nggak pape kok pake KELUARGE BERENCANE.. asal nyang dibolehin dalam igame kite .. ye nggak ???

Munggah Puasa

Beberape ari lagi mau menjelang bulan Puase. Biasenye orang Betawi udeh pade sibuk buat ni bulan. Ade aje acaranye.. nyang rowahan le, nyang munggah puase le, pokoknye pating bulan Puase eni jadi pade sibuk kagak ketulungan. Nyang lagi besukaan kudu musti bawain calon mertuenye sirup ame ruti, sedang nyang ude kawin kudu wajib nyambangin mertuenye pake bawa gula kupi ame makanan kalengnye. Lebih-lebih buat orang nyang baru aje jadi penganten baru. Pengalaman kayak beginian dulu bikin ane kaget pas pertame kali ane jadi menantu.. bujug .. mane banyak banget lagi sodare nyang tuaan nyang kudu kite anterin makanan macem beginian.

Buat orang nyang duitnye kagak keitung sik emang kagak jadi masale. Lantas, pegimane ame nyang lagi kagak gablek duit. bisa-bisa emaknye si entong tampange cembetut ditekuk abis macem dompet tanggung bulan. Apelagi buat orang nyang punya keluarga besar baek dari pihak perempuan maupun lagi.. bisa jadi tuh laki jadi uring-uringan.. kagak dijalanin kagak enak.. dijalanin duit nyekak.. matirabit dah ..

Sebenernye beberape taon nyang lalu, waktu ane masing kecil inget banget deh kalu kite mau saur nti malem nah ari tengari orang pade sibuk nyari merang yaitu semacem bekas kembang padi nyang abis dibuangin gabahnye.. buat keramasan. kerne anggapan orang dulu kalu kite mau ngadepin bulan puase badan kite kudu bersi dari mulain kepale ampe ujung kaki. Mangkenye saat itu nyang beli merang buat dibakar dan aernye dipake buat keramas jadi pade bejibun. Tapi, sekarang sepertinye kegiatan beginian ude kagak ade lagi. Nah nyang tinggal cuman acara rowahan ame munggahan aje.

Buat nyang baru denger nama Ruwahan itu, bisale ane sedikit gambarin. biasanye ruwahan itu pake ngadain selametan atawe bahase betawi bilang sedekahan nyang dilaksanain di bulan Sya'ban atawe bulan Ruwah. Nah, kalu munggah itu acare saling ngunjungin nyang mude ke nyang tuean.. biasenya antare anak ke orang tue, mantu ke mertue, calon mantu laki-laki ke calon mertue, dan si keponakan ke encingnye atawe antara adek ame empoknye sambil ngomong2 dah mau puase minta dimaafin kesalahannye.. kenape kudu nyang mudaan ? anggapannye sih.. tande penghormatan antare nyang mude ame nyang tuwe. Nti, kalu lebaran baru deh bisa saling gantian. Makanan nyang dibawa juga udah standar.. kalu nyang baru calon mantu itu bawa ruti ame sirup buat bulan puase, nah kalu anak atawe mantu atawe keponakan biasenya gula kupi ame biskuit deh. Jadi, bukan masale bawaannye nyang penting penghormatannye..

Mangkenye, kudu siap-siapin deh duit nyang banyakan buat ngeborong biskuit, ruti, sirup ame gule kupi.. tapi, kalu kagak gablek duitnye.. yee tinggal nyo-ong aje .. kasian de looo kayak ane hehehehe..

Ziarah dan Tempat-Tempat Ziarah

Kebiasaan masyarakat Betawi dengan ziarah ke makam-makam orang yang dianggap membawa karomah seperti makam para wali, dan para kyai-kyai besar entah yang ada di sekitar Jakarta maupun yang ada di Pulau Jawa, bahkan jika perlu hingga melintasi pulau sekalipun merupakan sesuatu hal yang sudah lumrah.

Bahkan tidak jarang, di setiap kelompok pengajian ibu-ibu maupun bapak-bapak yang sudah menyisihkan uang mingguannya yang dikumpulkan untuk tujuan ziarah tersebut yang biasanya “ditebok” setiap bulan Sya’ban atau bulan bulan Maulid.

Biasanya acara ini dipimpin oleh para ustadz atau ustadzah yang memimpin pengajian tersebut. Acaranya pun bisa hanya untuk satu harian misalnya untuk tempat yang masih berada di sekitar kota Jakarta atau bahkan bisa sampai memerlukan berhari-hari hingga perlu adanya tempat menginap.

Saya mencoba menelusuri jejak tempat-tempat ziarah yang berada baik di Jakarta maupun di luar Jakarta yang biasa dikunjungi oleh masyarakat Betawi ini. Sebagian merupakan pengalaman yang pernah saya alami sebagian lagi merupakan pengamatan saya dan hasil Tanya jawab saya kepada beberapa guru dan ulama yang biasa melakukan acara rutin tahunan ini.

Beberapa tempat ziarah yang ada di Jakarta bisa dikategorikan sebagai tempat baru, karena memang orang yang diziarahinya tergolong belum lama meninggalnya, bisa juga sudah tergolong tua karena memang dia telah lama meninggal. Untuk itu saya mencoba membaginya ke dalam dua kategori lama dan baru serta menurut wilayahnya.

Tempat ziarah yang biasa dikunjungi yang tergolong makam tua, antara lain ;

01) Makam Habib Husein Al-Idrus di Luar Batang - Jakarta,
02) Makam Habib Ali Al-Habsyi di Kwitang – Jakarta,
03) Makam Habib Habib Kuncung di Kalibata – Jakarta,
04) Makam Habib Abdullah Abdurrahman Al-Qudsi di Kampung Bandan - Jakarta
05) Makam Pangeran Wijaya Kesuma di Tubagus Angke - Jakarta
06) Makam Pangeran Jayakarta di Senen – Jakarta,
07) Makam Habib Agil di Pedurenan – Jakarta,
08) Makam Sunan Gunung Jati di Cirebon – Jawa Barat,
09) Makam Sunan Kalijaga di Kadilangu – Jawa Barat,
10) Mesjid Demak di Demak, tempat pertemuan walisongo
11) Makam Sultan Hasanuddin di Banten – Jawa Barat,
12) Makam Sunan Kudus di Jawa Tengah,
13) Makam Sunan Muria di Gunung Muria,
14) Makam Sunan Bonang,
15) Makam Sunan Giri
16) Makam Sunan Drajat,
17) Makam Sunan Gersik di Jawa Timur,
18) Makam Kyai Kholil di Sumenep – Madura,
19) Makam Syekh Yusuf di Karang Asem – Bali,
20) Makam Syekh Maulana Malik Ibrahim di Jawa Timur,
21) Makam Syekh Abdul Muhyi di Pamijahan – Jawa Barat,
22) Makam Syekh Mansyur di Cikaduen – Jawa Barat,
23) Tempat Pemandian Batu Qur’an – Jawa Barat,


Tempat ziarah yang biasa dikunjungi yang tergolong makam baru, antara lain ;

01) Makam Habib Umar Al-Atos di Cijantung
02) Makam Habib Salim bin Ahmad bin Jindan di Cijantung
03) Makam Habib Usman bin Yahya,
04) Makam Habib Abdullah bin Umar di Tanjakan Empang Bogor – Jawa Barat,
05) Makam Habib Soleh bin Muksin (Soleh Tanggul) – Jawa Timur,

Mungkin masih banyak tempat ziarah yang saya lupa untuk menginventarisasikannya, namun setidak-tidaknya hal inilah yang bisa mewakili tempat-tempat orang berziarah bagi masyarakat Betawi umumnya.

Wassalam,

"Orang Sabar Ade Batesnye" - Sekedar Renungan Ati

"Orang sabar ade batesnye"

Barusan setadian ane naek lip (lift) di gedung Bidakara ke lantai 9 tempat biase ane nguli. Ane ketemu temen dan ngomong masalah kantor nyang emang lagi banyak masalah. Akhirnye terlontarle pegimane rase keselnye, dan segale uneg-unegnye nyang selame ini diye rasain dalam ngadepin masalah kerjaan. Hingga akhirnye diye bilang.. "orang disuruh sabar mulu.. sabar juga ade batesnye"

Ungkapan seperti eni sepertinye sering banget kite denger di setiap ada orang nyang lagi mare2 trus di suru sabar. Enggak siang enggak malem nggak lelaki enggak perempuan pasti bakalan ngomong gitu kalu kite lagi kesel ame seseorang dan makin ari makin menjadi jadi ampe abis deh sabar kite buat ngadepin tuh orang.

Sebenernye kalu kita mo bener-bener kaji lebih dalem lagi, ape bener dalam igame kite (Islam pastinye), maupun ame igame laennye bentuk kate sabar itu emang ade batesnye ? sampe pegimane sih batesnye sabar ?

Sabar entu kalu menurut ane ade beberape, bisa sabar ame ujian, bisa juga sabar dalam nanganin setiap masalah, sabar ngadepin sikap anak nyang bandelnye aujubile.. pokoknye banyak deh sabar-sabar nyang laennye.. nyang penting satu sikap yang "nerime" atawe kate orang jawa "nrimo" dengan segala upaye nyang perne kite lakuin dengan hasilnye terserah kehendak "Nyang Kuase".

Ade dalem Qur'an nyang sering ane temuin suatu firman :"Sesungguhnye Allah itu bersame orang-orang nyang sabar". artinye, enggak ade pembates ampe kapan sabarnye, ampe dimane sabarnye. Jadi, sikap sabar itu mutlakoh.. emang sepertinye enggak ade batesannye..

Masalahnye sekarang, emang kite mau terus-terusan kayak gini ? tentunye ade usaha dong.. nyang kudu dijalanin semaksimal mungkin, dan nyang pasti tetep terus berdoa ame Nyang di Atas untuk dihindarin atau seenggak-enggaknye dikuatin dalam menghadapi setiap masalah. Selain tambahan lagi, kite kudu ngacak diri (kalu bahasa melayu tinggi bilang mah introspeksi) ape perbuatan kite selama eni ude bener, bisa jadi aje eni merupakan hasil perbuatan salah kite nyang Allah bales di Dunia. Kerne menurut ane.. segale masalah nyang terjadi ame kite ade due bentuknye.. pertame sebagai hasil perbuatan dose2 kite di masa lalu, kedue emang ujian yang datangnye dari Allah atas ketaatan kite, ibadah kite, dan ketakwaan kite ame Nyang nyiptain kite.. artinye mungkin Allah emang lagi pengen becande ame kite atawe pengen tauk, kalu kite dikasi susah masing pade mau ibadah kagak ??? jangan2 begitu dikasi susah dikit langsung deh mare2 ame Allah .. bilang deh..ngedumel deh..

"ahhh.. kemaren2 gue kagak sembahyang rejeki lancar.. eh pas gue mulain bener malah jadi suseh.."

Nah, kalu ude gitu.. pegimane ??

Orang Betawi Kagak Ade nyang Jadi Pengangguran

Kale ente sempet punya pendapat kalu orang Betawi itu banyak nyang demen nganggur sepertinye pendapat ente salah BESAR, kerne kalu ente dateng aje ke perkampungan Betawi ente pasti akhirnye akan tauk kalu sebenernye setiap orang Betawi itu baek nyang kecil, nyang gede, nyang tuwe atawe nyang mude, lelaki atawe perempuan, semuanye pade kerje.. cuman ade nyang pake dibayar dan ade juga nyang kagak pake dibayar. Ade nyang bekerjenye pake begerak ade juge nyang kagak begerak bahkan cuman tidur doang.

Perne suwaktu ane lewat di daerah Pekayon. Kebetulan ane mampir di rumah Abang ane nyang betetangga ame orang asli Meruya Ilir. pas ane lewat ane sempet ngedenger suara ibu-ibu nyang lagi ngomeli lakinya.. nyang lagi tidur..

"Bang, buruan napa bangun, perasaan aye sedari tadian abang KERJA-nye tiduuuurrr mulu. Eni tiap ari KERJA-nye kalu kagak melukin bantal diye ngempanin ayam, emange bisa tu duit dateng lewat ngimpi ?"

Bagi nyang ngedenger pan bisa heran.. lha enak.. orang tidur diye bilang kerja, trus cuman ngasi makan ayam juga dibilang kerja...

Pas ane masuk ke rumah mpok ane, kebetulan ade keponakan ane nyang baru banget beranak. pas ane lagi nanyain gimane kabarnye si kecil.. eh keponakan ane bilang.. "Iye nih, sedari tadi KERJA-nye kalu kagak netek diye nangis ame berak.. maklum le namenye juge anak kecil Cing..". Nah, bukankah bearti emang dari orok orang Betawi emang ude pade kerje ??? jadi kagak ade nyang jadi pengangguran dong...

Ente Jual Ane Beli

Beberapa hari nyang lalu ane sempet ditantangi buat nyajiin jenis masakan atawe makanan Betawi.. katenye.. “Kalu emang elu orang Betawi, tunjukin dong jenis masakan atawe makanan nyang elu tauk..gue tunggu”.

Tantangan macem kayak gini tentunye jadi bikin semangat ane. Akhirnye dengan sedikit pengetahuan nyang ade, ane nyoba nyelem ke internet nyari jenis masakan dan makanan ape nyang emang jadi cirri khas orang Betawi, tentunye dengan ditambahin informasi nyang ane tauk dan alamin selama sejak ane kecil ampe sekarang. Alhamdulillah ade hasilnye juga.. buat ngasih inpormasi ame sodare Eriko akhirnya ane bisa bagi sebage berikut :

Jenis Masakan

- Nasi Kebuli
- Nasi Begane
- Nasi Kuning
- Nasi Uduk
- Nasi Ulam

Jenis Sesayuran

- Asinan
- Sayur Asem
- Sambel Godok Ketupat
- Toge Goreng
- Gado-Gado
- Keredok
- Ketoprak
- Sayur Laksa
- Soto Mi

Jenis Berkuah

- Semur Jengkol
- Semur Daging
- Pindang Bandeng
- Soto Betawi
- Sate Kambing
- Sayur Pucung
- Ketupat Banci

Jenis Makanan

- Kerak Telor
- Rengginang
- Kue Apem
- Kue Bugis
- Kue Lupis
- Kue Pisang
- Kue Unti
- Kue Serabi
- Kue Rangi
- Kue Pancong
- Wajik
- Tape Uli
- Kue Abuk
- Ongol-Ongol
- Kue Talam
- Kue Pepek
- Kue Mangkok
- Kue Gambang
- Kue Putu Mayang
- Geplak
- Kue Cincin
- Kembang Goyang
- Kue Dongkal
- Iwel
- Dodol
- Kue Lukang

Minuman :

Bir Pletok, Bandrek, Bajigur.

Beberape dari nama-nama nyang ane sebutin di atas sepertinye ade nyang masing bisa kite dapetin bahkan mungkin masing ngamprah karena emang selain gampang pembuatannye dan rasenye juga masing bisa bersaing ame jenis-jenis makanan nyang dateng dari daerah laennye.

Tapi, ade juga emang nyang udah langke bahkan mungkin udah suse buat kite cari kecuali di daerah-daerah perkampungan nyang masing di huni ame masyarakat Betawi seperti di daerah Condet, Pasar Minggu, Lenteng Agung, Meruya, Srengseng, Kampung Baru, dll. Ditempat ane aje masing bisa tuh kite dapeting Kue Abuk, Lukang, unti, dll.

Tapi, ade juga ternyata kue nyang dipesen khusus buat acara tertentu seperti pas acara kawinan atawe ade orang Betawi nyang dateng buat acara seserahan ke pihak perempuan.. yaitu Roti Buaya yaitu sejenis roti yang berbentuk buaya dan selalu dipesen dalam sepasang lelaki dan perempuan nyang diatasnye selalu ditaruh anaknye.

Tadinye ane rada bingung kenape bisa roti buaya jadi acara wajib dalam setiap penyerahan. Ternyate buaya dilambangin jadi pasangan nyang setia buat orang Betawi. Karena buaya adale salah satu binatang nyang kagak mau nyari pasanggannye kalu salah satunye ude mati. Tapi, rase-rasenye kok kebalikannye ame orang Betawi yeee… nyang kagak bisa ngeliat jidat licin dikit langsung deh lupe amen yang di rume hehehe..

Rase-rasenye ape nyang ane bikin ini mungkin udeh bisa ngejawab ape nyang sodare ERIKO pinta. Kalu perlu resepnye ane juga ada.

Wassalam,

Betawi Keturunan Arab

Bahasa Betawi itu Singkat, Simple, Padet.. dan mudah dimengerti

Tauk yang artinye ye kagak tauk

Mungkin kalu enti ente sempet dateng bertamu ame orang Betawi atawe nyari orang atawe temen ente disane janga heran. Seperti pengalaman temen ane nyang nyari rumah ane. Emang sih ane cuman kasi tauk alamat rume pas di Jalan E Kelapa Dua. Karena baru pertama kali temen ane nyang namenye si Baban Robana dateng dari Bandung mo nyari alamat rume.. ceritenye diye ude sampe di jalan E.. trus diye nanya ame anak-anak kecil nyang lagi pade maen gundu.

"Dek.. kenal rumahnya Pak Zainal nggak ?"

Pertame-tame sik tuh anak saling pandang ame temennye.. sambil bebisik kedengeran.. Pen elu tau nggak rume nyang disebutin ame Bapak entu.. kontan aje tuh si Pepen menggeleng sambil bilang taaaauuukk. Satu-satu mereka nyang lagi pade ngumpul menjawab dengan serempak. Al hasil sianak nyang jadi komando buat ngejawab ape nyang ditanyain ame si Baban ini. Jawabannye serempak..

"Taaaaauuuuukkkkk", sambil siap-siap maen gundunye lagi nyang ketunda akibat pertanyaan tadi.

Kalau tahu bisa tunjukin nggak rumahnya yang mana Dek..

"Taaauuuuukkkk" kata tuh anak lagi dengan wajah kesel.

Rupanya bahasa Betawi ini satu kata bisa jadi berlawanan arti cuman karena penyebutannya ini. Nyang atu tauk dengan ucapan pendek nyang artinya 'mengerti atau mengetahui' sedang yang atu lagi tauk dengan ucapan yang panjang artinya malah sebaliknye diye kagak tauk.

Singkat dan Padet

Orang Betawi paling demen ame nyingkat setiap ucapan dengan semaunye aje. Kalu ente diyem sebentar aje di daerah Meruya Ilir (kalu sekarang jadi Meruya Selatan), dan tengok di perkampungan pekayon. ade sederetan ibu-ibu bekerudung nyang baru pade berangkat mo pegi ke pengajian kuping (buat istilah pengajian nyang ngedederin ustadzah ceramah). Namun tiba-tiba ade seorang nenek2 nyang kerne jalannye rada lama tereak ... "Dulu... dulu..." (maksudnye tunggu dulu) kerne takut ketinggalan ame ibu-ibu nyang ude pade jalan duluan. Kadang enggak jarang mereka seenaknye mbaca tulisan bahasa asing dengan lafalnye kendiri.

Ade beberape kate nyang bisa dijadiin kesimpulan tulisan ini, misalnye :

Seratus lima puluh : diye bilang ses me pulu

Seribu : diye bilang srebu

Burung garuda : diye bilang burung gruda

Blue (pembiru pakean) : diye bilang bela-o

Sun Light (merk cuci piring) : diye bilang Sunglek

Lifebuoy (merk sabun mandi): diye bilang Lekboy

Si Anu

Pernah suatu ari ane lewat di depan rumah tetangge ane nyang emang asli banget betawinye.. umurnye ude bangkotan deh.. nggak semua orang tauk berape umurnye. abis kalu ditanye kapan diye diberanakin diye paling-paling bilang oh waktu jaman Belanda pas banget ade pengungsian abis diuber-uber Belanda. Nah lu..

Ape lagi kalu ditanye kapan anak-anaknye pade dilahirin.. dengan gampang diye nunjukin ke pohon-pohon disampingnye, "Kalu si Mamat lahirnye bareng ame pohonan kelape ini ditanem, nah kalu si Mugeni ini bareng ame puhun duren nyang baru kemaren di tebang. nah si Malih pas banget ame ni rume dibangun.. nah .. siape nyang bisa nebak umur tuh anak-anaknye ?

Si emak ini sepertinye bisa ngewakilin omongan orang Betawi disekitar ane.. abis kalu ngomong percis banget ame nyang laennye paling demen ngomong anu.. pas diye lupa ame nyang diomongin.

si Anu ... buat seseorang nyang diye lupa siape namenye,

anuan ... buat sesuatu nyang dilupa nama barangnye,

di anuin.. buat sesuatu nyang diye nggak bisa ngejawab ape nyang dikerjain

Jadi, bisa aje suatu waktu diye bakal ngomong "Mang anuan-nye ude di anuin ame si Anu ?" karena diye lupa nama barang nyang bakal dikerjain dan siape nyang ngerjainnye.

Anggapan-Anggapan Tabu Betawi..

Mungkin buat ente-ente nyang pernah tinggal betetangga ame orang Betawi atawe perne tinggal di sekitarnye pernah ngedenger tetanggenye nyang orang Betawi tereak kepade anaknye nyang perawan nyang lagi nyapuin pelataran rumahnye..

"E.. Jamilee.. kalu nyapu nyang bersi.. nti punye laki jembrosan looo"

Coba deh ente pikirin, ape hubungannye orang nyapu kagak bersi ame dapet laki (dapet suami) yang jembrosan alias berewokan. Pastinye kagak ade nyambungnye pan ? peribahasa kate Jaka Sembung maeniin pancing, kagak nyambung cinggg..

Tapi, kalu ente peratiin lebih dalem lagi, ungkapan atawe anggapan-anggapan nyang kayak beginian ampir-ampir selalu aje ade dan diomongin baek ame emak atawe ame bapaknye kepada anak-anaknya yang masing kecil dan dianggap belon ngerti. Padahal diye kendiri nantinye juga tauk kalau ungkapan nyang kayak beginian kagak ade benernye.. ade beberape ungkapan nyang bisa ane kasi contoh.

Ade seorang perempuan nyang ngomelin anaknye nyang lagi makan sambil duduk-duduk atawe bediri di depan pintu. Sambil melotot di emak akan ngomelin anaknye si Zaenuddin .. "Eh Ndin, jangan makan di depan pintu. Nanti dilamar urung" (maksudnya kalau nanti mau ngelamar perempuan bakalan batal).

"Jangan makan Semangka pake gula, nti bisa mati". Pendapat kayak gini sering masi kite denger di perkampungan masyarakat Betawi. Padahal nggak satupun nyang kebukti ada orang nyang mati sehabin makan semangka pake gula. Padahal .. di jaman sekarang.. buah semangka malah sering jadi salah satu buah nyang dipake oleh tukang rujak yang udah pasti tentu pake gula jawa.

"Jangan mandi tengari nti bisa kesambet", maksudnye kesambet disini adalah semacem penyakit panas tiba-tiba yang dahulu sering terjadi pada masyarakat Betawi.

"Jangan potong kuku male-malem nti emaknye bisa mati", ungkapan macem ini juga masi sering dapet kite denger waktu dulu. Sehingga sepertinye kite takut banget ngegunting kuku pada waktu malem hari.

"Jangan dudukin bantal, nti bisa bisulan", padahal jelas-jelas nggak ada hubungannya antara dudukin bantal ame orang bisulan. Dan dokter mana nyang mencegah orang dudukin bantal supaya si pasiennya gak gampang bisulan. ya nggak ???

"Jangan keluar menjelang menggerib, bisa diumpetin kalong wewe". Nah kalu nyang ini ane terus terang kagak tauk ada hubungannye kagak antara keluar menggerib ame kalong wewe'. Ape karena emang jenis setan ini yang keluarnye pada waktu menjelang menggerib.

Meskipun hal tersebut nggak kebukti kebenarannye, tapi jangan heran kalu ungkapan tabu kayak gini masing bisa kite denger di orang-orang Betawi. Tapi, berselang dengan perkembangan anak-anaknya nyang semakin berpendidikan tentunya akan semakin hilang juga ungkapan tabu sepertinya. Entah sampai kapan masih bisa bertahan.

Wajah Betawi Tempo Doeloe ...

Gambaran daerah Glodok tahun 1890an.

Kalu yang eni gambaran daerah Glodok. Masing keliatan tukang sado nyang lagi pade narikin penumpang.

Ini tempat huniannye orang-orang kelas I yaitu orang Belande. Di photo masing keliatan tempat pos penjagaan buat rume-rume orang Belande.

Pasar Tanah Abang taon 1955, keliatan masing jadi pasar kecil tempat kumpulannye orang Arab pade jualan kambing. di deket rumah putih keliatan jembatan Tanah Abang yang menyebrangin kali Penjernihan. Kendaraan nyang lewat paling-paling cuman trem doang, atawe sepeda jengki.

Kramat Raya (Senen) taon 1955. Kalu dulu masing keliatan sepi banget. Kendaraan nyang lewat kalu nggak sado, sepeda jengki atawe mobil morris. Kebanyakan di kawasan Kramat Raya ini dihuni ame orang kelas II yaitu bangsa Cina, sedangkan orang pribumi masuk kategori orang kelai III atawe nyang paling buncit.

Imutnya Wajah Anak Anak

Emang kagak salah dah kalau wajah anak kecil itu imut .. dan lucu..

dengan gaya polosnye diye mampu menarik perhatian setiap orang yang memandangnye..

kalu ente termasuk nyang tertarik berarti masing punya perasaan,

tapi, kalu kagak tertarik.. auk dah ane kudu musti bilang ape..

Tasha (anak Ane)

Salma (Edwin Rikarno)

Nisa (Sugeng Surya Edi)

Hayya (Hariyono)

Raja (Heldinia Lindiyawati / Dedy Sadikin)

Rafa & Adlian (Meyndrasta S Hartantya)

Zidane (anaknya Jakariya)

ini Anis & Iffa (Ahdyat Eko Prasetyo)

Maenan Anak-Anak Betawi Jaman Dulu..

Dulu banget sewaktu ane masing kecil dan tinggal di daerah Setiabudi (Karet Belakang), kebiasaan setiap Ibu2 kalu pas malem terang bulan sengaja deh pade keluar rumah buat ngumpul-ngumpul nenangge. Biasenye sih ade nyang sambil bawa kaleng kecil buat mites kutu soale ude jadi kebiasaan banget kalu mereka ngumpul aje beberape orang langsung deh pade bebaris kayak gerbong kerete buat pada saling nyariin kutu.. biasenye kutu nyang didapet langsung dikletusin pake gigi.. kalu lagi males ditaruh di atas kaleng.. trus dikletusin ame kuku .. jadi rada bebunyi .. trek !!.

Begitu juga ame anak-anaknye.. perasaan ane sih.. jaman dulu, meskipun ane jarang tauk belajar malem.. masalah sekolaan kayaknye cuek aje tuh.. nah, apelagi pas malem terang bulan kayak gini.. dijamin semua anak-anak pade ngumpul ditengah lapangan depan rumah Bapak ane nyang kebetulan luas banget ade lapangan bulutangkis, lapangan bola buat pade maen Pancing dan laen-laennye.

Permaenan anak-anak betawi waktu ane masing kecil dulu.. ade bermacem-macem tergantung ame waktunye, maenan waktu pagi, ame siang tengari laen, ame sore laen, ame malem juga laen. Kalu mau diitung-itungin kayaknya lumayan banyak juga sih.. begitu juga ame permaenan antare perempuan tentunye enggak same ame permaenan anak lelaki.. tapi ade juga sik masenye perempuan bisa ngegabung ame anak lelaki.

Dari waktu ane masing di Setiabudi ampe pas ane pindah ke daerah Kebon Jeruk ada beberapa permaenan yang cara-caranye sama, cuman name ame judulnye aje nyang laen.

Ade beberape permaenan nyang ane masing inget name maupun cara permaenannye. Disini ane cuman coba sebutin aje deh..antara laen :

Maen Pancing /Maen Benteng /Maen Bom

Eni permaenan bisa dimaeni baek ame anek perempua atawe lelaki. Tapi, biasanye sik digabung. Adapun waktu pelaksanaannye di siang hari dan ditempat nyang lumayan luas seperti lapangan atawe di kebon nyang lega.. kagak ade pohonannye.

Permaenan eni biasenye sipemaen dibagi jadi dua bagian yang masing-masing bagian bertugas ngejagain tempat bentengnye jangan ampe di sentuh ame lawan. kalu ampe kesentuh itu tandenye kemenangan buat silawan. Biasanye permaenan ini dimulain dengan ade nyang mancing duluan buat lawannye keluar nguber.. nah baru setelah itu si pemimpin nyuruh temennye nyang mancing buat nguber karena di mudaan kelurnye buat nangkep yang duluan keluar.

Maen Uler Naga

Kalu permaenan ini ade nyang jadi naga dan ade nyang jadi elang nyang tugasnye nangkepi anak-anak nyang berdiri di belakang naga sementara si kepala yang jadi naganye berusaha buat menghalangin si elang nangkep buntutnye si naga (anak nyang paling belakang). Anak nyang ketangkep langsung deh dianggap mati dan si elang seterusnye berusaha nangkep anak yang berikutnye ampe abis. Biasanye mereka maen sambil nyanyiin uler naga :

"uler naga panjangnya bersar sekali,

melayang-layang selalu kian kemari,

umpan yang lezat inilah yang dicari'

ini dianya yang terbelakang"

Maen Galasin

Permainan galasin biasanye dimaenin dilapangan bulutangkis. Tapi, bisa aje dibuat gambar kendiri yang hapir sama seperti lapangan ukurannye sih terserah asal diye bebentuk kotak nyang tengahnye dipotong tengah ame garis lurus buat si kepala lewat nerobos. Di permaenan eni para pemaen dibagi jadi dua kelompok bisa perempuan atawe lelaki (gabungan).

Maen Enggrang

Permaenan ini pake alat nyang dibikin pake bambu yang dikasi pancalan buat diinjek. ukuran tingginye injekan paling-paling sedengkul anak-anak dah.. nanti dengan pijakan bambu tersebut si anak bediri di kedua bambu yang dipake buat jalan. Kalu kagak ade bambu bisa juga dibuat dari kaleng yang tengahnye dibolongin ame paku terus dikasi tali buat ngejepit antara jempol ame telunjuk. Jadi kegunaan kaleng tersebut seperti sendal atawe bakiak.

Maen Taplak Bulan, Taplak Meja

Kalu nyang ini juga bisa dimaenin ame beberapa anak nyang jalannye pake nunggu giliran jadi pake acara gambreng dulu. taplak ini biasanye digambar di tanah.

Maen Takadal

Permaenan takadal make kayu dari bambu ame dua batu bata yang disejajarin.

Maen Dampu

Maen dampu biasanye pake gacoan dari batu kolar nyang tipis atawe pipih dan bisa didiriin. permainan eni terbagi jadi tiga babak. babak satu si pemain ngelontarin batu nyang dipasang ame yang jaga sampe salah satu dari batu yang dipasang itu kena. kalu enggak maka sipelontar kalah dan kelompoknya jaga. kalu kena maka diye kebabak kedua. Di babak eni sipemain pake kayuhan kaki kudu bisa ngejatuhin semua batu yang dipasang. Babak nyang ketiga si pemain kudu kenain batu nyang jaga dengan cara ngebelakangin.

Maenan di dalem Rumah

Ade beberapa maenan nyang biasanye dimaenin ame anak-anak yang rada kecilan nyang biasanya belon bisa lari kenceng. biasanye maenan ini cuman dilakonin sambil duduk doang, permainan tersebut seperti ; ci-cimelati, cublak cublak suweng, maen congklak, maen bola bekel.

Maen Merdeka & Maen Tombok (pake karet gelang)

Maen merdeka bisa gabungan antara lelaki ame perempuan. Dalam permaenan nyang eni sama juga dibagi jadi dua kelompok. kelompok nyang menang akan berusaha melompati karet yang dijadikan pengalang nyang dijaga ame dua orang. penghalang itu mulain dari sepipis, sepinggang, seketek, sekepala, setengah merdeka, dan semerdeka (artinye dengan tangan yang angkat keatas).

Sedangkan maen tombok biasanye pake karet tiap tiap pemaen. nanti kalu udah terkumpul dipasang sebuah lidi di tengah. pemain diundi siapa yang lebih dulu ngelempar karet buat masukin ke lidi yang dipancangin dengan jarak tertentu dari pemain. nah pemain yang bisa masukin berarti diya jadi pemilik karet yang masuk tersebut.

Maen Koba (pake duit atau kerop tutup limun)

Sama seperti maen tombok, cuman bahannye dibuat dari kerop atawe tutup botol limun (sekarang tutup minuman botol yang terbuat dari kaleng yang ditumbuk rata hingga menyerupai uang logaman), dan bisa juga paek duit logaman. sedangkan tempat yang jadi sasaran lemparan nya adalah tanah yang ditumbuk hingga jadi lobang.

Cerita Lucu - Mak Otong Ikuttt..

Pertama-tama ane baca eni cerita dari temen ane Sofyan Alfhar nyang diye kirim lewat imel. Abis baca ceritanye bikin ane terpinkel-pingkel abis..mangkenye ampe sekarang ane jadi inget2an terus ame nih cerita..

Cerite berawal dari suatu sekolah SD kelas I. Waktu entu si Entong nyang kebetulan murid SD Negri - Cawang kedapetan ame gurunye sering ketiduran di kelas. Sebagai guru nyang baek tentunya Bu Ani nyoba-nyoba nanyain si Entong akar permasalahannye.

Ibu Guru : Entong, ibu perhatiin kenape Entong sering ketiduran di kelas, emange Entong kurang tidur ye tiap malem ??

Entong : Iye Bu, abisnye tiap malem Entong kagak bisa tidur. Entong diomelin mulu ame emak entong juga ame bapak entong..

Ibu Guru : Emange kenape bisa entong diomelin ame emak ame bapak ?

Entong : Soalnye tiap malem emak Entong suka matiin lampu kalu Entong belon kepengen tidur bu guru, jadinye Entong nangis deh.. terus emak ame bapak Entong marah-marah maksain nyuruh Entong tidur..tapi kan gelap jadi Entong takut..

Ibu Guru : Jadi entong masing tidur betiga ame emak ame bapak ?

Entong : Iye bu guru..

Lame si ibu guru mikirnye.. tapi, akhirnye diye tauk akar permasalahannye.. mungkin dengan diye tidur betiga jadi waktu emak ame babenye lagi ngebet kepengen nyampur.. jadi kepakse pake matiin lampu. Nah, karene si Entong juga kagak bisa tidur akibat gelap jadi emak ame bapaknye maksain nyuruh diye tidur supaya diye bedua bisa aman buat ngelanjutin acaranye. akhirnye bu guru dengan senyum-senyum nyoba nasehatin si Entong.

Ibu Guru : Entong, kalu Entong nggak mau diomelin ame emak ame bapak, Entong kudu inget ame nasehat ibu guru ye.. nanti kalu pas emak Entong matiin lampu.. Entong pura-pura aje tidur merem ye.. entong kalu pas dipanggil diyem aje.. ye.

Entong : Iye bu guru..

Nah cerita akhirnye pas malemnye. Kejadian seperti biasenye. Kebetulan sedari siang tadi bapaknye si Entong ude kebelet mao ngajakin 'becinte' ame emaknye si Entong. Mereka sepakat ampe nungguin si Entong tidur dulu. Karena ampe jem sebelas si Entong juga belon bisa tidur akhirnye saking sewotnye emak si Entong buru-buru matiin lampu. Tentu aje si Entong takut ame gelap. tapi karene diye cobain tuh nasehatnye bu guru akhirnye si Entong pura-pura tidur dengan dimeremin matenye. Sebenernye emaknye si Entong rada curiga kenape kok si Entong tidurnye cepet banget kagak seperti biasenye.. Dengan curiga diye panggil name Entong.. ampe tiga kali.. tapi si Entong biar kate masing bisa ngedenger panggilan emaknye tetep aje diye pura-pura pules.

Akhirnye, karene yakin kalu si Entong ude tidur pules, mulain deh bapaknye si Entong merayu2 sambil ngelus-ngelus bininye. sejurus kemudian kejadian deh.. diye bedua indehoyan.. si Entong bingung kok sayup-sayup diye ngedenger ade suara orang mendengus .. serem.. kayak napasnye kebo Kong Ali. Si Entong jadi semakin takut ngebayangin kalu kedua orang tuanye bakalan jadi Kebo. Ape lagi nggak lama kemudian emaknye si Entong beteriak ngagetin.. Pak.. emak ude nggak tahan neh mau keluar.. dan nggak lama si bapaknye juga teriak juga.. bapak juga sama nih mak.. pengen keluar..

Ngedenger emak ame bapaknye teriak bikin si Entong malah tambah takut.. akhirnye serta merta diye teriak saking takutnye ... EMAAAAAAKKK ... BAPAAAAAKKK ENTONG IKUUUUUUUUTTTTT...

Nggak Ade Bini Aje Baru Pade Berani Tampil Seksi

Emang orang kate.. kagak ade bini pade nyari kesempetan.. kagak percaya'.. noh liat si Tarjo.. begitu pas kite2 pade nyemplung abis maen bola eh .. sempet2nye diye nampang.. ngajakin photo bareng.. pake ngajakin nampang lagi..ceritanye mau nunjukin kalu perutnye paling kecil padahal kite2 pade nyemplung di kolem nyang udah dinginnye naujubile..

Raker - Maksudnye Rapat ampe Kejengker (kejang-kejang kaku)

Kalu mau liat kompaknye anak akunting tuh.. liat pas diye2 lagi pade photoan.. lengkap deh.. soalnye eni gambar diambil pas permulaan ane di usir dari akunting dan disuruh pindah ke internal audit begabung ame Pak Em Rahman. Waktu entu masing ade Tjut Zulfi, Eko, Mbak Diah, sama Mbak Sofie, dan baru masuknye anggota baru Rudy Wiryawan.

Tempat rapatnye sik kayaknye di puncak man ane lupa.. soalne ane ame Pak Em waktu entu cuman jadi undangan doang .. artinye di luar dari rapat akunting jadi kagak begitu inget ame acara-acaranye.. satu-satunye nyang ane inget pas lagi ngajarin Rudy berenang aje.. soale kayak Bembeng diye.. kagak bisa berenang..

atas (ki-ka) : Ichwan, Marna, Eriko, Bayu, Tjut, Tety, Sofie, Pak Fir, Pak Em, Diah, Fitri.

bawah (ki-ka) : Irfan, Dono, Aris, Eko, Rudy. kalu ane lagi setengah berdiri nyang lagi megangin pundaknye si Aris TW.

nb. kapan bisa kayak gini lagi yee ...

Accounting in Action artinye Orang Akunting nyang Demen Pegi-pegian

yang eni ngambilnye di perumahan karyawan Kiani di Mangkajang pas lagi ade acara ngitung stok pabrik tiap akhir taonan. Lumayan le lebih cakep. Disini kite2 lagi pade bediri di depan rumahnya Bang Sofyan Alfhar. Digambar masing keliatan ade Baban Robana (udah keluar), Eko (juga ude keluar), ade Fitri (pake baju strip ijo), Evy Iskandar (udeh keluar), Ichwan (pake baju strip biru), dan tentunye si Sofyan, Eko, Dono, dan bininye Dono).

yang eni dijepret waktu lagi ade acare ngitung stok pabrik di Mangkajang. Kebetulan waktu entu kite2 (ane masing di akunting) diundang buat makan siang di rumahnye Mas Dono. di gambar eni ade Evy Iskandar (lagi berdiri di depan), bininye Mas Dono, Ichwan (disamping kirinye bininye Mas Dono), Beng2 (duduk), dan ane nyang lagi ngegendong si Hazmi, sami Anis. Nah, kalu nyang gambarnye kagak jelas itu ane lupa.. soale item banget sih.. ente bisa nebak ???

kalu bisa kasih komentar di mari yeee..

Selingan - Cerita Serem Orang Betawi

Kalu ente perne tinggal di perkampungan Betawi pastinye ente tauk dong cerite2 serem nyang biasa diceritain ame orang2 tue dulu. Paling enggak perne le denger barang sekali. Tapi, buat bahan ingetan ane mau nyobain ngebahas tentang cerite2 nyang perne ane dapet dari Bapak ane.. dan emang juga ade beberape nyang perne ane alami kendiri sewaktu ane masing kecil ampe bangkotan kayak gini. Adapun nyang ane mau coba adalah nyang biasa jadi certia di sekitar masyarakat Betawi ini..

Kuntilanak & Genderuwo'

Kalu menurut cerita orang dulu, Kuntilanak itu adalah sebutan buat orang perempuan yang mati beranak atawe abis beranak dan belon ampe 40 hari masa nifasnye kemudian diye mati penasaran. Kadang diye nongol emang menyerupain perempuan yang baru meninggal karena ngelahirin atawe keguguran eni. Demennye tinggal di puhun kembang (seperti pohon kamboja, pohon cempaka, pohon kenanga).

Dengan ciri2 suara yang khas seperti ringkikan kuda dan dengan penampilan yang biasanye berupa perempuan berambut panjang dengan baju putih yang panjang (orang Betawi bilang baju longdress!!), atawe bija juga muncul dengan bentuk seperti perempuan yang masih berupa pocong..

Munculnye Kuntilanak eni biasanye bersamaan kalu ada perempuan yang lagi mau beranak, perempuan lagi ngalamin keguguran dan banyak ngeluarin darah. Kalu kate dukun beranan orang yang lagi begini darahnye wangi.. auk dah wangi menurut siape ? perasaan kalu kite cium mah amis..

Cerita orang dulu malah lebih serem lagi.. katenye kalau bini kite lagi pengen beranak mangkenye si suami kudu nemenin, karena kagak jarang ade Kuntilanak nyang suka nyaru jadi dukun beranak. Nanti kalu pas tuh anak keluar diye baru berubah jadi ujud nyang sebenernye.. dan siap memangsa.. akhirnye si anak ame si emak jadi mati mendadak..

Seremnye lagi, nantinye si emak bakal jadi Kuntilanak dan sianak bakal jadi Gederowok. Bener atawe enggaknye nih cerita tapi emang begini cerita nyang beredar di sekeliling masyarakat Betawi dari mulai Rawa Belong ampe Setiabudi, dari mulain Mampang ampe Pasar Minggu, dari Mulai Senen ampe Ancol.

ape iye yeee ????

Setan Rep-Rep

Nah, kalu setan rep-rep itu, menurut kepercayaan orang Betawi dulu itu adalah penjelmaan Jin yang berupa gonggo yang kakinye ade tujuh. Biasenye setan rep-rep eni sering menggode orang yang lagi tidur. Kite dalem mimpi kadang seperti orang nyang diayun tinggi2 dan dijatuhin dari atas ke bawah ampe kite berase tereak sekenceng kencengnye. Kalu orang Betawi bilang ampe ati rasenye ilang.. gitu..

Kadang juga kita berasa badan kite ade nyang nindiin.. berat banget.. kite mau bangun susah.. kadang juga kita berasa udah bangun dan kite tauk kalu kita udah melek dan di sekeliling kite ade orang .. tapi begitu kite tereak.. atupun kagak ade nyang denger.. nanti pas tuh setan ude puas ngerjain kite atawe pas kite inget dengan sedikit baca-bacaan semisal baca ayat kursi, sahadat, atawe baca Qulhu.. baru deh kite dilepas dan bisa bangun dengan keringet nyang udeh ampe kayak jagung.. dan basah di badan.

Setan Kuburan

Setan kuburan itu biasenye nongol emang sengaja lagi mo ngegodain orang nyang lagi pade jalan kendirian di tempat nyang sepi dan di malem nyang emang cocok buat diye nongol. Pada waktu diye mau nongol biasenye agak larut dan dingin dengan situasi nyang sepiii banget. Tapi, biasenye kite dibuat kagak sadar situasinye jadi kite rada2 kagak nyadar kite ketemu ame diye soale diye biasenye berupa orang, bisa lelaki bisa perempuan. Nanti, kalu kite udah keenakan diajak jalan baru deh pas kite sadar kite udeh kesasar ke dalam wilayah pekuburan. Anehnye.. kadang keberadaan kita nyang kesasar juga jadi sesuatu yang nggak mungkin. Misalnye, kite bawak motor trus ade nyang numpang eh pas di wilayah situ diye terbang ke pohon kembang.. atawe ke pohon sawo atawe kemboja. Pas kite sadar tau-taunye kendaraan kite udah ade di tengah-tengah kuburan.

Pernah kejadian ade seseorang pemuda nyang kenalan ame seorang perempuan di tempat tontonan. Setelah abis kenalan, kebiasaan seorang lelaki buat nawarin jasa buat nganterin pulang. Nah, kejadian ini sering banget dialamin. Sesampainye di rumah tu perempuan diye dikasih minum dan akhirnye nginep dan tidur di dipan kayu yang biasenye dibikin dari bambu. eh.. jebulnye besok paginye diye bangun udeh ade ditengah2 kuburan.

Kalong Wewe'

Setan semodel kalong wewek ini biasenye nongol pas menjelang menggerib atawe abis banget menggerib. konon kabarnye setan sejenis eni paling demen ngumpetin anak-anak nyang pas waktu menggerib masing keluyuran diluar rumah. Cerite engkong ane nyang perne diumpetin ame setan kalong wewek ini (kalau dicerita2 sering orang sebut wewe gombel) berjenis kelamin perempuan dengan tetek yang melorot ampe ke puser, bebulu dari pundak ampe pantat. paling lebet sekitar kemaluannye ampe nutupin. tingginye paling2 dua ampe tiga keli tinggi orang dewasa.

Setan kalong wewe ini. kalu ngumpetin tuh anak nyang lagi diincer biasanye nggak jauh-jauh kok. cuman kadang kitenye aje nyang kagak pade bisa ngeliat. Nah, kalu udah ada kejadian ade anak nyang ilang karena diumpetin ame kalong wewe.. biasenye orang sekampung pade keluar rume sambil bunyi-bunyiin alat-alat rume tangge macem mukulin kaleng krupukle, mukulin tampah, bakul, piring kaleng atawe gelas muk. bisa juga cuntang (semacem rantang).

Nah, nanti kalu tuh setena udeh bosen biasanye tuh anak dilepas.. baru deh ketemu atawe keliatan ame orang2 nyang lagi pade nyariin. Anak kecil nyang biasanye abis diumpetin ame setan kalong wewek jadi sedikit linglung.. mangkenye kudu buru-buru disemburin ame aer yang abis dibacain ame ustad atawe dikasih minum aer yang abis dizikirin ame guru ngaji. insya-alloh lepas entu langsung diye dah bisa nangis.

Tuyul

Menurut cerita masyarakat betawi Tuyul itu sejenis jin yang bisa dipake sama orang-orang yang pengen mencari kekayaan dengan jalan yang nggak halal. Biasanye dengan sesajen atau syarat2 tertentu nanti diye nugasin tuyul tersebut buat nyari duit dengan cara gaib, dimana orang yang kehilangan duit nggak nyadar kalu duitnya udah ilang digondol tuyul.

Ade nyang bilang kalu tuyul itu makanannya darah sajen, ada juga yang syaratnye tuh tuyul ditete-in ame bininye.

Babi Ngepet & Ngiprit Monyet cara kepingin kaya

Ada lagi cara mau cepet kayak yang sering dilakonin ame orang2 musyrik, yaitu jadi babi ngepet atau bisa juga dengan cara ngiprit monyet. Cuman, kalu pake tuyul itu biasanye kite minta jasa mahluk gaib. Nah kalu Babi ngepet atawe ngiprit monyet biasanye nyang ngelakonin buat nyari duitnye ye orang itu kendiri. Dengan bacaan2 tertentu nanti pada malam2 tertentu diye akan berubah menjadi seekor babi buat nyari duit dengan cara ngegesek2in badannye ke tembok rumah orang yang mau diambil duitnye.

Bisa juga kalu melaluin ngiprit monyet.. diye cukup gegarukan badannye atawe lompat-lompat di depan orang yang pengin diambil duitnya. Kate orang dulu, tande2nye orang yang suka ngiprit monyet biasanye suka pade belang badannye. Tauk dah bener ape kagak..

Jelangkung

"Jelangkung jelang-se disini ada pesta besar

Dateng kagak dijemput pulang kagak dianter"

Kate2 yang kayak beginian dulu dijaman ane masing kecil sering dipake kalau lagi pas malem bulan purnama. Tujuannye sik cuman buat maen-maenan berupa anak-anakan yang dibuat dari gayung yang dikasi tangan silang dengan ujungnya dikasi pensil atawe alat tulis laen yang bisa digerakin. boneka jelangkungnya dikasi baju dan kaen. dengan sajen pake kembang 7 rupa nanti ade acara manggil makhluk halus yang diminta masuk ke dalam jelangkung. Setelah ada tanda2 setang tersebut masuk ke dalam boneka jelangkung, maka akan diadain wawancara atawe pertanyaan dari orang yang pade ikutan maen.. nanti dijawab ame tulisan yang dilakukan oleh tangan jelangkung yang udah diiketin alat tulis. Dan bila si jelangkung ingin menulis maka tangan dari orang yang memegangnya akan lemes dan bikin coretan-coretan sendiri.

Pas acara dianggap udah selesai dan si jelangkung merasa udah cape maka dengan kalimat terakhir barulah boneka jelangkung akan seperti semula lagi.

Memedi

Setan memedi ini biasanya hanya nongol pada malam bulan purnama atau pas malem rada terang bulan. Biasanye memedi ini kalau menggoda orang ia seperti seekor binatang yang menyelinap disekitar kita dengan suara berisik seperti tikus atau kucing yang sedang main disampah jadi ada bunyi kresek-kreseknya.

Bila kita sempet nemuin suara seperti ini maka kalu kita gesuh (hus!!) segera binatang tersebut berubah menjadi lebih besar dan seterusnya hingga kita merasa ketakutan dan melarikan diri.

Setan Balon

Setan balon ini biasanye diye bebunyi mendesis. Setan ini berupa makhluk jin dengan kuping yang panjang hingga ampe bahu. Nah, siape2 yang pada saat itu kena tamparan kuping dari setan ini, maka diye akan merasakan mukanya menjadi tebal. dan nggak lama kemudian menjadi agak menyon.

Setan Cacar atau Setan Brontol

Penyakit cacar pada jaman dulu menjadi berita yang nyeremin. di awalin dengan tersiar berita adanye seorang ibu2 yang menyebarkan beras kuning di sekeliling kampung. dan bila sengaja ditunggu diye akan ngilang.

Beberape saat kemudian baru deh wabah penyakit cacar akan dirasain sama warga termpat dibuangnya beras kuning ini. Pada saat Ibu ame Bapak ane anaknye masing pade kecil-kecil orang tua perempuan ane perne ngalamin kena penyakit cacar, yang pade masa entu emang memakan korban yang lumayan banyak banget. Matinye juga emang rada nyeremin. Menurut orang yang pernah ngalamin kendiri. tuh setan sepertinye dateng ke rumah yang di dalem nye ade orang yang sakit pade tiap jem 9 malem, jem 3 pagi, jem 11 siang, dan jem 3 sore. model nyang datengnya kira-kira lebih dari empat orang cebol yang dateng sambil menggotong "kurung batang".

Tentang Temen - Heldinia Lindiyawati & Tety Rohaety

Deny, begitu diye dipanggilnye. Jadi temen jalan-jalan ane waktu kita masing pade bujangan. Biasanye ane berame2 ade Bram (Sugeng), Rombeng (Rommy Setyadi), dan satu lagi yang akhirnye jadi lakinye sekarang.. Dedy Sadikin.
Wah, kalu ane udah cerita ame si Deny ini seru abis.. cuman kalu sekarang ceritain masalah anak2 kite aje pade.. biasanye sih ane ceritain tentang si Tasha anak ane.. trus Deny cerita tentang si Raja, kalu Fitri cerita tentang Najwa-nye dan Tety cerita tentang Kiky dan Hafidz. Kadang sering juga ada masalah kesehatan anak ane nyang ane konsultasiin ame kedua orang perempuan yang kerja di bagian akunting ini, cuman Deny bagian pajak.
Makasih atas nasehat2nye ye Den.. Tet..

Bu Tety. Bininye Bang Ipul ini emang sering jadi temen ngobrol. Apelagi saat-saat kalu lagi kagak ade kerjaan atawe kalu pas lagi ngaso (istirahat).

Wah, kalu udah cerita anak.. serunye nambah.. kayaknya kite2 emang lagi pade norak ame anak kali ye.. soalnye kebetulan emang masing pade kecil anaknye.. paling2 anaknye Bu Tety ini yang baru kelas satu.. kalu temen2 nyang laen kan anaknye udah pade gede.. ade nyang kelas empat, tiga, dua ..

Tentang Temen - Hariyono & Bambang Irawan

Hariyono atau Cak Har atau si "Wedhus Gembel" (paling kiri) dan Bambang Irawan (paling kanan) yang biasa dipanggil Bembeng atau Bambang Demplon termasuk dua orang yang deket juga ame ane. Kalu Cak Har ini asli Jombang nah si Bembeng ini orang betawi yang nyaru jadi orang jawa .. perhatiin aje namennye .. mane ade orang betawi pake nama Bambang.. ye kan ? usut punya usut sih.. waktu ane coba tanyain ame nyak ame babenye.. kenape sekeluarga nyang laki dikasi nama Bambang semua (Bambang Irawan, Bambang Iriana, Bambang Irianto).. dengan enteng aje babenye bilang .. biar rejekinye lancar.. kan biasenye kalu pake name jawa jadi gampang nyari kerjanye.. (emang nyambung ???)

Ame si Cak Har yang insinyur ITB eni.. ane mulain deket sewaktu dulu masing muda.. ane bantuin diye ngejar2 perempuan.. (biasa deh laki2 normal hehehe) dan sering curhat atawe sering cerita duaan .. Kalu sama si Beng-beng sih .. terus terang ane lebih deket ame keluarganye.. nyak ame babenye ude seperti orang tua ane kendiri. apelagi emang perawakannye ampir mirip ame almarhum Bapak ane.. dulu sewaktu ane masing bujangan.. mo hampir tiap sabtu malem minggu ane nginep di rumah orang tuanye si Bembeng, soalnye selain dari penerimaan keluarganye nyang enak juga tambahan lagi enyaknye nyang pinter masak. wah, kalu ente sekali cobain tuh sambel bikinannye enyaknye.. pasti dah ketagian.. Sayang setelah ane kawin jadi jarang maen ke sono lagi.. mudah2an sih besok2 bisa lagi soale kangen berat ame masakan enyaknye ame cerita bebenye sewaktu masing jadi jawara..

Malem Nisfu Sya'ban ..

Pade ari Kemis malem Jumahat kemaren, pas tanggal 7 September taon 2006, bertepatan dengan malem ke 15 bulan Sya'ban 1427 Hijriah di mesjid-mesjid dan di musholla di daerah ane sejak pagi udah rame banyak pengumuman akan diadain malem nisfu sya'ban melalui sombok atawe pengeras suara.

Buat orang betawi, malem nisfu sya'ban ini jadi seperti acara wajib, nyang biasanye diadain tepat abis sembahyang menggerib. biasanye kalu pas mau malem nisfu eni, orang kampung ane pade berbondong-bondong deh dateng ke mesjid atawe musholla sambil nenteng aer di kendi, teko, atawe wajan laen. Kalu sekarang sih orang nyari simpelnye aje.. pake botol aqua .. bisa nyang satu leteran atawe nyang kecil. Tapi, biasenye sewaktu ane kecil aer yang diambil dan dipake buat acara nisfuan itu adalah aer nyang diambil langsung dari sumber mata aer, bisa aer sumur, aer kompaan. Kalu sekarang sih orang nyari nyang sehat aje.. diye ambil aer nyang udah dimasak atawe beli aqua dah.. kalu nyak ame babe bilang kurang afdol..

Nah, pas abis menggerib dan abis pade sembahyang ame wiridan, biasanye si ustad mimpin jemaahnye buat pade bikin lingkaran ataw nyang ditengah-tengahnye ditaruh aer nyang pade mau dibacain yaasiin dah. Abis gitu, si ustad ngomongin ame para jemaah bapak2 ame ibu2 bahwa entu malem mau yaasiin-an menyambut malem nisfu sya'ban dengan membaca surat yaasiin rame2 sebanyak tiga kali. Yang pertama diniatain buat minta kepada Alloh SWT agar diberikan kesehatan jasmani atawe badannya buat kuat beribadah kepada Alloh. Nah, nyang kedua minta kepada Alloh SWT agar dikasi rejeki nyang banyak dan halal buat bekal ibadah kepada Alloh. dan nyang ketiga kite minta kepada Alloh SWT agar ditetepi iman dan islam.

Sehabis pembacaan surat Yaasiin yang dibaca agak cepet seperti orang balapan eni. biasanye diselingin ame do'a nisfu Sya'ban.. nah.. sehabis acara selesai baru deh ibu2 atawe bapak2 ame anak2nye pade berebutan ngambil tempat aer yang diye tadi udeh siapin. Nah, biasenye tuh aer ade nyang langsung diminum, atawe dibawa pulang buat anak bininye di rumeh, bisa buat minuman orang sakit, atawe untuk tujuan ape aje asal mintanye tetep ame Alloh..

Karena acara bacaan surat Yaasiin itu emang buat orang betawi sering dibaca tiap malem jumahat atawe kalu pas ade undangan selametan pindahan rumah, selametan orang abis nikah, atawe kalu ade tahlilan pas acara kematian mangkenye buat orang betawi jaman dulu.. nggak heran kalu rata2 orang pade apal atawe paling nggak diye bisa ngikutin bacaan surat Yaasiin kalu nggak pake surat. Ape lagi di daerah kampung baru di tempat rumah mertua ane.. rata2 dari anak tanggung ampe orang tuanye emang pade apal ama nih surat..