Kabar Terbaru

Dear temen2 hari eni ane lagi nyobain ngisi blog dari tempat laen. nggak di kantor, kebetulan di tempat ane tinggal pas di depan bekas sekole SMP ane dulu, sekarang ude ade satu tempat warnet. Nah, kerne ane iseng abis mingguan di rume nemenin bini mulu jadi rade2 suntuk. mengkenye sekarang ane mau nulis lagi neh. sekalian, ude kangen juge ane ame blog ane. terakhir ane bikin cerite waktu mau menjelang lebaran.

hari eni. pas jem 2 lewat delapan menit teng ane nulis lagi. sekalian sambil jalan-jalan aje ke tempat eni hehehe.. mau tauk aje ape gampang atawe susye kayak di kantor nyang sering ngadat internetnye.

Men, hari tepat tige minggu ane ngerase keilangan satu temen deket ane nyang kebetulan satu almamater di unipersitas satu almamater kantor akuntan ame satu kantor di perusahaan pabrik kertas. Namenye Joni Surianto, umur 43 taon. status singgel. Ane denger kabar kematiannye juga kagak begitu yakin, soalnye beritenye simpang siur. ampe lebi due mengguan kali baru ade berite yang dateng dari salah satu temen deketnye di kantor akuntan, kalu mas Joni ude meninggal hari Sabtu tanggal 12 Nopember 2006. kene serangan jantung. inne lillahi wa inne ilaihi roji'uun.

Umur orang emang gak ade nyang tauk. orang semude entu cepet ajalnye. emang umur, jodo, rejeki ame kematian ude diatur ame nyang di atas.