Dukun Kecit si "PONARI"

"Taon eni taon gile!, bin sableng!, bin gak waras!"...
kedengeran tereakane Bang Jaman begitu dienye abis pulang dari rume warunge Pok Aliye. Jalane masing sempoyongan sebab matenye masing ngeliat rade ngabur ketutup ame belek nyang masing nongol di sele2 mate. Sarunge masing nemplok di pundaknye ngelingker ke uler belibet. Sambil ngerakuin celane jengkinye die masup ke rume..

"Nonnnnn!, tereaknye lagi sambil ngejatoin pantatnye di pangkeng bambu nyang ude mulain reyot dimakan umur.
"Ade ape sik bang!, kagak ade ujan kagak ade angin tuh bacot kagak ade pelan-pelane kaye sombok lenong lagi manggilin penonton aje. Emange Abang kire aye budeg ape, nah ngegeroin ampe ke gledek mo nyamber kepale..", Omel pok Nonon sambil mbawein lakinye aer kopi di muk gede. Nah lagian Abang.. kagak tauk juntrungane tibe-tibe ngedumel kendirian. Emang tuh siri ame kapure ude abing ape?",
"De.. ape Lu kire gue ude pantes ngegantiin Mak Jarone ye Non, lakilu cakep2 gini lu samain ame nenek2 peyot nyang ude bau tane?".
"Bukan begitu Bang, lah Abang sepagi eni ude gegaokan aje, mare kagak tauk juntrungane, bikin Aye bingung aje. Emang ade ape sik Bang", Tanye pok Nonon pengen tau.

"Barusan abang nongton di tipinye Pok Aliye, ade berite anak kecit nyang masing bau kencur bise ngobatin orang pake aer celupan batu nyang konon ceritenye tuh batu ditemuin pas diye lagi mandi ujan dan kesamber gledek. Rase-rasenye gledek nongol dari taon jebod.. tapi ngape baru kali eni orang kesamber gledek trus dapet batu ye.., ude gitu ceritenye tuh batu dipake buat ngobatin orang eh sembuh. Keroan aje nyang denger dari satu mulut jadi banyak. Dan jebule dalam beberape ari aje ude bejibun orang nyang nyabak nginjek rume tu anak. wal hasil jadi kagak sekole, kagak bise maen. Nyang lebi parahnye si Bapak tu anak nyang kepengen ngembaliin tuh anak ke kebiasaan lamenye eh malah ditentang ampe dipukulin ame orang-orang disekeliling tuh anak nyang ude kegirangan mikirin pendapetan nyang bakal diraup dengan care kegiatan pengobatan ke gitu".

"Lha kok bise begitu bang? apan diye Bapak nye?", tanye Pok Nonon lagi ke orang bego. Mulutnye mangap siap melahap semue cerite nyang ngeloyor begitu aje keluar dari bacot lakinye.

"Entule.. Non, ujung2e pan duit juge. Konon kabare satu ari aje pendapetane ampe lime pulu jute.. mate siape nyang kagak ampe melotot dari nyang dulunye nyari duit goceng aje die kerje ampe keluar keringet dari ketek eh tibe-tibe duit betoros di depan mate. Keruan aje si bocah kecit ude jadi bahan perebutan gitu".

"Kesian ye tuh bocah Bang, tapi.. ape bener diye bise nyembuhin penyakit orang?" tanye Nonon lagi.

"Kalu entu mah, mene ketehe.. Tapi nyang lebih parah lagi, waktu si bocah ude nggak bole ngobatin lagi ame babenye.. eh direbut2in tu bocah. wal hasil jadi klenger deh si babe dipukulin ame sodare-sodarenye nyang pade kagak rela kalu si bocah kagak mao ngobatin orang lagi.. pan bise ancur pendaringane tu orang pade", sambung bang Jaman.

"Tapi bang, ape bener kerne batu petir atawe kerne tangane si bocak kecit entu nyang ade khasiatnye..", tanye Nonon bingung..

"Auk le, ade nyang bilang cuman sugesti. tapi, kalu mo pemerinte tajem otaknye seharusnye pan nyadar, kenape sampe orang bejibun pade ngedatengin tuh bocah. Mustinye nyadar klo orang ude pade kagak ade arepan lagi buat berobat ke dokter, rume2 sakita ataw apele nyang ujung2nge biayenye nyang kagak ketulungan. Mengkenye orang nyang pade putus ase pade nyari care2 nyang aneh.. barusan gue liat di tipi begitu lagi diistirahatin tuh bocah eh.. segale aer gotnye, lumpurnye pade diambilin ame tuh orang.. pegimane kagak bikin gue sewot... nauzubilliahi min dzaalik dah..", gerutu bang Jaman.

"Tapi bang, semuenye emang tuhan Alloh nyang ngasi. Mane kite tauk kalo emang Alloh lagi nguji kite melalui tangane tu bocah.. pake kesamber gledek le... nemuin batu petir le.. ade-ade aje ye dunie sekarang..", saut Nonon sambil nyamber sapu lidi di samping pager.

"Non, bentar lagi ujan.. suruh si Toing mandi gih.. siape tauk entar kesamber gledek trus dapet batu.. biar bise ngobatin oraaaaaanngg...", tereak bang Jaman.

"Wey.. ude gile ape Lu Bang.. na kalu kesambernye kagak nape-nape sik enak.. kalu langsung ngejengker.. siape nyang suse? dapet duit kagak mate mah iye.. ah aye pengen idup normal aje.. mendingan bersiin noh got nyang ude pade mampet biar kagak kebanjiran lagi.. noh gludug ude bebunyi besaotan.."...

"DASSSAAARRR LUUUU"..