Kenape sik Kudu Banyak?

Belakangan Cang Rojak jadi bingung sebab anaknye yang punye name Zaenuddin atawe nyang biase dipanggil ENJAY suka kagok kalu lagi ngeboncengin die pegi ke rume anaknye nyang paling tue si Dolo pitak. Begitu ditanye, si Enjay cuman bilang, "Sory Be, aye asik ngeliatin bendere nyang pade dipajangin di jalanan bermacem-macem ude gitu pade nyebar kayak ditebarin kemane-mane. Ade nyang nyangsrang di puun angsane, puun jaran, puun turi, belon nyang ditempel ditembok2 ame di tiang listrik atawe telepon. Jadi bikin silo mate aye.. jadi pas bengong eh mobil di samping ngasi klakson.. mangkenye pegangan nyang kenceng ye Be..".

"Kenceng palelu peyang...", gerutu si Babe. "Eh tong, emange Gue lu kire bongsang pisang nyang kudu nempel rapet ame badanlu nyang bau codot. lu ngojek kagak mandi ape ye? lagian pan gue Babelu.. ude bau tane ni.. masak lu samain ame anak mude nyang kudu sigap, dasar mate lu aje nyang rabun.. mude-mude ude kayak mate ayam ngeliat malem aje.." katenye lagi sambil asik ngisep rokok guang garam kreteknye.

"Bukan begitu Be, aye cuman bingung. sekean banyak gambar, sekean banyak wakil sekean banyak name.. emange nyang mau dicari ape ye.. kalu dasar ame pikirane same aje trus kenape kagak pade rembukan aje ye.. nentuin mane nyang ngepas ame pikirane die2 pade. jadi kagak bikin bingung kite2. nah ngeliat merek ame judule aje ude bikin kepale nod-nodan (punyeng), belon lagi kalu masing-masing parte punye wakile.. jangan2 asal nemuin calon yang bakal dipasang buat menuh-menuhin wakilnye di pemerinte jadi asal pili.. nyang penting komplit. aye jadi kepikiran pegimane nasib kite kalu nti ade di tangan orang nyang cuman asal pili?"

"Eh panjul, lu kenape repot mikirin sik? emang selame eni dari sewaktu elu masing di perut enyaklu ampe bangkotan kayak gini pemerinte perne mikirin? orang-orang nyang elu pili perne ngasi pinjem Babe duit waktu elu ampir klenger waktu diserempet mobile Mandor Betong sehingge Babe gadein tane buat bawa elu ke rume sakit? trus waktu binilu keguguran trus dokter kagak mau terime sebelon ade duit jaminan sehingge enyaklu ngelolosin kalung nyang bole die sayang-sayang bawaan dari tane meke (mekah maksudnya) emang orang2 nyang di poto entu nyang nyetorin tuh jaminan? pan semue duit gue, bande gue? kalu Babe sih bagen amat..

"ye si Babe ampe segitu sewotnye... kagak gitu juge kaleeee..",samber Zaenuddin alias Enjay alias si Panjul. "Siape tauk (ngarep banget), masing ade orang nyang mau sudi kirenye mikirin nasipnye orang kagak punye Be.., maksud aye neh, katenye semuenye kan pasti ade landasan atawe dasar nyang dijadiin patokan buat berjalane tiap-tiap parte atawe kelompok. Kalu kagak igame ye Pancasile. Maksud aye ni Be.. kalu landasane ude jelas, pasti dong banyak kesamaan tujuan ame pelaksanaannye. apelagi nyang jadi sasarane aje ude jelas masyarakat indunesia' .. lantas kenape kudu banyak macemnye?" Jelas Zaenuddin ke Babenya.

"Eh Njul, ape buat kite pan jelas.. idup aman, cukup madang (makan), cukup tempat tinggal, ame semua serbe gampang. ape lagi Babe nyang ude tue.. kagak banyak kepengenan deh.. nyang penting gampang buat ibade ame kagak bingung carenye.. mo ibade aje sekarang ude bikin Babe bingung.. bagian ini carenye begini, bagian ono carenye begono, bagian itu carenye begitu.. katenye satu igame? ngape jadi pade mencer sik tempat sembayange? kalu bede igame sik masing wajar.. "Omel si Babe.

"Yeeeeeeeeee Babe, semue juge katenye tujuanne same, cuman jalane aje nyang bede.. tapi kalu dipikir-pikir iye juge ye Be.. kalu sasarane ke orang-orang kenape kagak disatuin aje ye.. pan kite jadi pade kagak bingung.. dan pastinye gambar, merek, name parte dan wakilnye jadi kagak bejibun kayak gini.. kalu gini care bikin peste demokrasinye.. berape duit nyang kudu dikeluarin.. berape dalem kantong konjene dirogo ye..?" Tanya Zaenuddin bingung siape nyang kudu ngejawab.

"Auk leeee.. lu tanye aje no ame tuyul atawe jin tomang nyang kerjaane ngumpulin duit buat majikane..", samber Babe kesel.. pantat ude pegel tapi belon juge nyampe di rume...