MUSIM HAJI

Bentar lagi mao tutup taon 2007 pas lagi ame lebaran haji nyang sekirenya bakalan jato pade tanggal 20 Desember 2007, ampir bebarengan ame hari natalnye orang Kristen. Beberape tetangge sik ude pade ngadain pertemuan buat sekalian ngasi tauk tetangge laennye kalu die pade mau pegi ke tane suci. Ade nyang ngundang ustad ame bikin pengajian. Ade nyang pake acare nyantunin anak yatim ame orang-orang suse. Beberape temen di kantor tempat ane kerje malahan ade nyang diem-diem anyem aje tuh mau peginye. Cumin ngasi tauk ke temen sekantornye kalu diye lagi mau nunain tugas suci rukun ke lime .. pegi aji jike mampu. Duh senenge …

Kalu ude inget ari-ari gini, ane jadi inget beberape pulu taon nyang lalu. Waktu entu orang-orang pegi aji masing pake kartu kuning ame kartu ijo. Yang artinye pake visa turis ame ade nyang pake visa berangkat aji. Emang kalu pake kartu turis ongkos naek hajinya rade lebi mure dari nyang biase. Tapi, pulange entu nyang kagak bisa dilakuin setelah orang rapi haji di Meke. Die paling bisa dua bulanan atawe lebih dari biasenye.

Orang betawi paling rebed dah kalu ame urusan beginian. Ude terkenal kalu pegi ajinye satu nyang nganter bererod. Ude ke hamuk deh orang bekumpul mulain dari waktu mao masuk asrame haji, maupun sewaktu die ude sampe ke bandare cengkareng nyang sekarang dikenal ame name bandare Sukarno-Hate, name preside ame wakil presiden taon jebod.

Belon lagi pake acare tahlilan tiap menggu dari mulain tuh orang pegi ampe pulange. Katenye sik biar jihadnye selamet dari pegi ampe pulange. Wal hasil untung juge buat tetangge.. jadi tiap minggu bisa makan opor ayam atawe nasi kebuli me daging deng-deng.
Aule, kalu sekarang ape masing ade model beginian. Soale.. di beberape tempat sepertinye emang ude sepi dari acare macem beginian. Sukur2 sik di kampung ane kayaknye masing ade.. ALHAMDULILLAH..