Naek Ongkos...

Si Udin lagi kebingungan lantaran baru-baru eni Pemerentah baru aje ngumumin kalu harge BE BE EM naek lagi.. lantaran pasaran minyak dunie juge lagi naek plus ngurangin subsidi Pemerentah atas harga bahan bakar minyak. Wal hasil dari harge dulu yang ude tinggi malah jadi mangkin tinggi.. pastinye rakyat juge nyang kecekek lehernye..

Sepulange dari kerje sebage Opis boy di gedung Bidekare Pancoran si Udin ngegerutu aje di depan bininye nyang lagi asik nonton "Dangdut Mania Dadakan Tiga" nyang asik dibawain ame si ganjen Ramzi, si boto Anya-Anya Wae, Menir Kriwil, dan Menir Hipong, dan tentunye juge Menur Gembol serte Putri Malu dan Babenye.. si tuan Takur. Lantaran kagak bise nyimak lagu nyang lagi dinyanyiin ame si peserte.. Romle sang bini rada ngegedein suare tv 14 in nye. Eh abang.. kage ade gludug kagak ade ujan ngape tuh bacot ngegerendeng aje sih? mendingan minum dulu noh.. te nyang aye ude siapin di meje .. ude adem kali.. lagian lame banget baru ampe rume.. emang macet ye di jalanan?. si Udin nyang lagi buke baju kerne kegerahan ame mbuang keringet yang udeh sedikit nempel lantaran lame nunggu mobil jurusan rume nyang kabarnye lagi pade mogok minta naek ongkos atawe subsidi bengsin buat angkot jadi nyolot lagi ame bininye. e Romle.. mangkenye kalu ade tipi jangan nyang beginian mulu nyang ditongtonin.. liat juge dong berite.. ade ape.. emange lu kagak tauk kalu tadi mobil pade mogok.. gue nunggu ame due jem.. kagak satu juge nyang mao ngangkut gue.. kepakse gue numpak ojeg.. dari bunderan slipi ampe sini.. untung aje tadi ade nyang ngasi gue tambahan ongkos pating pulang.. kalu kagak .. bujug ..bise ngetug gue pulang dari slipi.. ngejeber bise telapak kaki gue..

Lah, bukannye aye kagak tauk si Bang.. aye juge deg-degan waktu aye liat beritenye tadi sore.. cuman mo ngubungin abang pake ape? ame Hape budeg punyenye si Jaitun? emang dasar Pemerentah aje nyang kupinge pade budeg .. ude dibilang jangan naek-jangan naek.. eeee male sengaje.. tun bengsin dinaekin.. ape lagi entu tu.. nyang kumisnye baplang di tivi.. pake bilang mau ngambil keuntungan orang kaye dengan care naekin bengsin.. emang diye-diye kagak pade naek kendraan umum ape? emang bininye kagak pade belanje di pasar ape? kan tauk kendiri belon bengsin naek aje orang-orang di pasar ude pade naekin barang-barang..

Mau bantu pake dane BLT ape tu bang? nyang ngasi duit buat orang suse? nyang ade pegimane? kite dapet sebulan seratus.. ongkos me makanan nasi naeknye tige kali lipet.. ujung-ujungnge kite malah kudu nombok due ratus rebu buat makan aje. belon emaknye si Rukiye noh.. nyang ngantri buat dapet duit nyang ade malah keluar duit.. orang diye keburu jatoh.. wal hasil dibawe ke rume sakit yang kudu nombokin duit dulu baru diperikse.. kalu tauk jadinye begini.. rasenye.. mendingan jaman dulu aje ye bang.. biar kate orang-orang sekolahan bilang idup di kekang.. kagak bebas.. tapi kite kagak kekurangan makan.. harge-harge pade mure.. toh kite dulu kagak kenape-kenape kan?

Ah ude ah.. pale gue punyeng kalu ude mikirin pemerentah. Noh bentar lagi pan mo pemilian lagi.. mangkenye nyari pemimpin kudu ati-ati. Jangan nyari nyang cakep tampange doang.. biar muke jelek asal kelakuan bagus. Elu juge sik nyang pake pili-pili.. sindir si Udin ame bininye nyang lagi asik ngelonjorin kakinye di tiker tempat diye pade nonton tivi bekas 14 in nyang dibelinye dari tetangge.

Bang.. kalu besok masing mogok.. elu mau naek apaan lagi bang? kan bayar ojegnye mahal.. mendingan buat ongkos si Jaitun sekole bang.. tanye si Romle sambir nyenderin palenye di pundak si Udin.

biar.. gue gerung-gerungan di kantor menta naekin gaji gue.. gerutu Udin kesel..