MAEN PESBUKAN

Bang Oji masing asik nyeruput kupi nyang baru aje dibikini ame Pok Rodie nyang manis bin imut ke siput dikerubuti semut. Pagi entu emang ujan ude lame berenti.. setelah ngeguyur halaman rumenye nyang emang selalu becek sejak ba'de isye ampe subu.. keruan aje tuh rume jadi sedikit belepotan ame belok tane nyang kecipratan aer ujan. Ditambe dinginnye pagi bikin semangetnye Bang Oji jadi tambe buat ngegulung badanne ame sarung jatah lebarannye sebagai petugas marbot musholle di gang sebele.

Dari ruang tenge kuping Bang Oji ke seperti orang dikilik campur bising sebab kedenger nyaring suare si Dowi anaknye semate wayang nyang lagi asik ngikutin nyanyian yang di tipi. Kalu kagak sale kedenger ade penyanyi.. GIGI nyang lagi nyanyiin lagu nyang judulnye My Facebook (bacaanye PESBUK).. wah.. kedenger asing buat pendengarannye.. belon lame si Entong, bocah nyang belon sunat ude tereak2 ame congornye sambil begaye "siang malem kuselalu menatap hape terpaku untuk onlai onlai.. wah.. dari bahasenye aje ude bikin ribet.. belon ame orang nyang katenya lagi ngerep.. (kalu kate Bang Oji mah nyanyian orang kesurupan).. banyak kate-kate nyang bikin kuping Bang Oji bingung nangkepnye..

Nyang bikin die bingung saat si KOJI bilang sambil ke ngedumel.. 'BANGUN TIDUR LANGSUNG PESBUK BIAR MATE MASING NGANTUK' .. dan seterusnye .. rase-rasenye belakangan eni kuping Bang Oji jadi kelewat sering ngedenger si Dowi kalu disuru ame emaknye buat beli gule kopi atawe ngangkain jemuran nyang takut ketiban ujan.. die selalu bilang bentar lagi pesbukan neh.. sambil ngutak ngatik telepon genggem nyang bise dibawe kemane.. kadang Bang Oji jadi kepengen ngebawa anaknye ke Pak Haji Muse lantaran sering die liat anaknye cengengesan kendiri di depan tuh telepon.. nape ye?? pikirnye .. ape emang anak gue si Dowi ude .. kagak waras??

GILE.. JANGAN JANGAN ANAK GUE UDE MULAIN GILE PESBUK.. emang ade setan PESBUK yeee???