Bahase Yang Ude Mau Ilang.. Kesiaaan de looo

emang enaaakkk..
entu le nyang sering sekarang orang sebut kalu abis ngeliat orang lagi sedih.. atawe kene musibe.. orang sekarang emang bisa aje nyerobot bahase .. sebut aje.. ungkapan .. "kasiaan de looo" sekarang ude dimane pelosok bangse di endonesie jadi bahase nyang bakalan disebut sehari-hari dari aceh ampe papue.. belon lagi bahase indoesia nyang ditolol-tololin.. nyang bikin kesan kalu orang betawi sering salah nyebut.. noh tongok aje.. sinetronnye si Entong.. mpok Lela si jande keblinger nyang suka banget bikin sebutan salah nyang asal goblek aje.. hebat emang... dari sekean sinetron betawi .. kagak satu juge nyang emang bener-bener aslinye dari seniman betawi.. sebut aje Adi Bing Slamet, Anna Shirley, Ahmad Fachri, Rheina.. dan laen-laennye.. asik mahsyuk berbahase betawi.. padahal cuman bahase kulit doang.. kalu cuman sekedar ngeganti a jadi e.. seperti babe, enyak.. semue orang dikolong langit juge pade nyaho.. ame tuh bahase.. tapi.. semudah diye-diye pade pake bahase betawi akan semude entu juge tuh sang sutradara nganggap bahase betawi ternyate gampang-gampang aje dimaenin .. puihg.. anak orang nyang baru jebruk dari perut emaknye juge bisa'.. kadang2 malah jadi kedenger belepotan tuh bahase.. kagak sedep... lantas mane diye bahase2 betawi laennye ??? macem Ludes, Bures, Abing, Ndelokin, Nongtot, Ngejedog, Restan, Tiris, Gero-in.. sepertinye kagak bakalan kedenger deh.. alias seperti ude pade ilang.. katenye mau pelestarian bahase.. lantas.. ape nyang bisa dipelajarin dari bahasenye si ENTONG ...??? kayaknye kite-kite lame-lame kudu belajar bahase betawi dari orang jawe deh.. matirabit.. mandikipe.. sundelan.. pejajaran.. hehehe..

Pil Ka Dut ..artinye Pemilian Kepale Nyang Perutnye Gendut

Bentar lagi di Betawi bakalan ade peste gede-gedean. Pemerentah Daerah
di Betawi eni bakal ngadain peste pemilian orang baru nyang bakalan duduk 
jadi Gubernur ngegantiin Bang Yos nyang katenye ude ogah lagi jadi orang 
pertame nyang jadi raje di Daerah Khusus Ibukote Djakarte nyang kite 
cintain ini. Emang kagak sembarang orang nyang bisa duduk dan kepilih
jadi kepale pemerinte. Ujug-ujug selaen emang diye bisa dibilang ude perne
kelalang-keliling di daerah Betawi tentunye juge orang nyang merase mampu 
ngatasin Jakaret dengan segale permasalahannye nyang bejibun.. mulain 
dari sampe nyang tingginye ude kaye gunung Gede, kemacetan lalu-lintas nyang ude paling padet sedunie.. belon lagi orang-orang pindahan nyang 
pade asik ngejedog di kolong-kolong jembatan nyang bikin Jakarte jadi tambe 
semrawut wut.. belon pare gelandangan atawe pengemis nyang jumlahnye 
kagak ade perne abis-abisnye makin tumbuh kayak jamur terik nyang nongtot 
setiap abis ujan gerimis.

Kembali lagi ame pemilian Pak Gubernur nyang kontan aje.. bikin orang Jawe
jadi seneng dan ngebiasain dirinye dipanggil ABANG.. jadi dalem sekejap aje
nongol tuh sebutan Bang Fauzi Bowo, Bang Jefry, Bang Andang, ame Bang
Dani Anwar.. kalu dipikir-pikir kenape kagak ade abang-abang nyang
emange asal dari Betawi asli yee.. sepertinye asik juga pan kalu kita denger
calon kepale pemerentah di Betawi ini nyang punye name Abang Mandra,
Abang Nasir, Abang Malih, Abang Mugeni, Abang Mamat. wah.. kalah deh
kite-kite kalu buat ngumpulin nama orang Betawi nyang ude pade sukses..
orang kate diye-diye nyang ude pade berhasil jadi orang aje segen bin eleq kalu
ditanye dari mane asal usulnye.. jebulnye.. paling-paling cocok man buat di acare
Ngelenong doang.. entu aje juga ude pade di jajah ame orang suku laen.. nyang
cuman bisa bilang gue ame elo aje ude pade berani ngerumpi jadi pelenong
ade-ade aje ye orang idup di Betawi eni..

Pendek kate, kelepas dari pegimane diye-diye pade sanggup ape kagak
bakalan ngurus kampung Betawi yang dulu rame ame jaware-jawarenye.
Buat ane sik nyang penting idup jangan pade jadi serakah. Jangan ampe
jadi dendeman.. kerne udah ngeluarin duit seabreg-abreg buat dipili jadi
Gubernur di Betawi lantas bagitu diye ude jadi eh.. pake aje mpung-
mpung... deh.. ngegondol kekayaan di Betawi buat bikin untuk perut diri
kendiri.. tentunye nggak heran pan kalu kite bilang PILKADA ude jadi
PILKADUT.. nyang artinye pemilian kepale daerah nyang orangnye cu-
man mau bikit perutnye pade gendut.. alias ngenyangin perut kendiri..
BUJUG BUSYET dah kalu ampe gitu.. biar nanti ane samperin diye en
terus ane beset deh kulit perutnye.. AMIT-AMIT CABANG BAYI..