POLIGAMI

Pagi-pagi banget pok Mine ude ngegerutu. Sambil mapakin daon siri nyang diye petik di samping rumenye die ngedumel aje kendirian. Kedengeran sayup-sayup ke orang lagi ngegerendeng, kagak’ kedengeran ape nyang keluar dari mulutnye. Si Rukoye anaknye yang paling tue baru aje rapi ngejermurin baju. Begitu diye denger tuh mulut enyaknye nyang pagi-pagi ude bebunyian ke kaleng rombeng jadi ikutan sewot, abisane dari pagi cape nyuci, ngepel, nyapu ude gitu ngejemur cucian, eh masing aje ditambe kedenger irame musiknye orang nyang kaga’ ketauan ujung pangkalnye.

“Nyak, semalem makan ape sik pagi-pagi bute ude gerendengan aje kendirian. Lagi ribut ame Babe ape?”, tanye si Rukoye sambil ngangkutin ember plastik pating ngejemurin cucian tadi. Baju bagian belakange keliatan basah kene cipratan cucian sewaktu diye ngejemur tadi.

“E.. Koy, enyak bilangin ye ame elu, enti kalu elu nyari laki jangan ke Babelu tuh. Baru timbang punye duit lebih aje ude kepikiran buat nyari bini lagi. Waktu masing dedemenan dulu bilange aje paling setie mo nungguin ampe Gue tue. Na jebule baru timbang urusan tane encang Juki lu tembus eh je ude berandei-andei punye bini bahenol. Amit-amit cabang bayi deh.

Bang Madun nyang sedari pagi ngedengerin bacot bininye dari dalem kamar sontak aje bangun dan ngegulung kaen nyang barusan dipake keredongan seabis diye sembayang subuh. Lantas aje, Bang Madun maranin bininye sambil ngucek-ngucek matenye nyang ketutup ame belek. “Eh Rukoye, jangan percaye omongan Enyak lu tu, sape nyang punye niat mo kawin lagi? Elu juge Mine.. masa’ omongan orang becande aje lu masupin di ati. Enti kalu ampe kedengeran ame Nya’ Gaye ame Babe Kodir pan bise berabe. Bise-bise gue dipecat jadi mantu. Paye juge lu ah”, komentar Bang Madun sebel.

“Lha entu nyang semalem Abang omongin ke aye pake bawe-bawe masalah ustad Duloh nyang kawin lagi ngedapetin muridnye nyang jande ape maksudnye? Nape pake bilang ke aye kalu ngedapetin bini secakep kaya’ bini mudenye ustad Duloh juge abang mau?” , tanya pok Mine membele dirinye.

“Lha, Abang pan cuman bilang lelaki mane sik nyang kagak mau ngedapetin bini kayak bini mudenye ustad Duloh, mane lagi tuh perempuan cakep, alim, anak turunan orang kaye dan terpandang, pinter, bekas model lagi. Kan jarang ade nyang mau orang perempuan ke gitu mau dijadiin bini kedue, bukane ngomongin Abang mo kawin lagi..” sambutnye Bang Madun ngeyakinin bininye nyang mulai sewot.

“Emange, Abang bener mau ngedapetin perempuan macem gitu? Cari gih sono.. bilang aje kalu ude bosen me aye huh!”, timpat Pok Mine kesel.

“Ye kagak begitu dong Mine, pan elu bini Abang nyang paling boto, masak sik Abang kudu ninggalin elu nyang kagak ade duenye”, rayu Bang Madun sambil nyowel dagu bininye nyang ude mulain keliatan asem.

“Lagian neh, kalu menurut Gue, sebage ustad kan harus ngasi contoh ke murid-muridnye. Nyontoin pegimane carenye nahan hawe napsu. Kan kate Nabi kite aje pan kalu kite napsu ame perempuan di jalanan atawe di tempat mane aje kite kudu musti buru-buru pulang ke rume.. kerne ape nyang dimilikin ame perempuan entu pasti dipunyain juge me bini kite di rume tul nggak Nyak lu?”, tanye Bang Madun sambil ngedipin matenye ke arah bininye nyang mesam-mesem.

“Iye be, lagian emang ape kurangnye ustadzah Nengsi sih? Ude anak kyai, bise ngasi anak banyak, hartenye banyak, alim lagi. Tampange juge kagak kalah cakepnye ame tu jande nyang jadi muridnye ustad Duloh. Ape atu aje masing kurang?”, timpal Rukoye sambil dimonyong-monyongin mulutnye tandenye diye lagi keki ame orang nyang lagi diomongin.

“Tu kan Mine, Koye.. mangkenye Babe bilang. Ngaji entu bukan cuman surat dan pinter ngomong ame punye elmu banyak. Guru ngaji aje belon tentu sanggup ngamalin elmu Qur’an. Kite eni selain punye elmu syareat.. atu lagi nyang kudu kite bise amalin neng.. IKHLAS. Ikhlas ame rejeki yang kite dapet walaupun ude jauh ikhtiar nyang kite ude jalanin, ikhlas ame bini nyang ade, pokoknye ikhlas ame nyang ude kite dapetin deh..”

“Tapi, bukan berarti kudu ikhlas ame nurutin kepengenan abang buat bebini lagi pan?, kalu nyang entu sik salah Abang.. kudunye mah Abang nyang ikhlas punye bini man atu.. cakep lagi..”, kate Pok Mine sambil begaye di depan anak ame lakinye.

Iye.. Iye.. Pokonye elu nomer atu deh Min.. nyang ono pastinye nomor dua kan…”, ledek Bang Madun sambil siap-siap kali-kali aje Pok Mine jadi gemes terus kepengen nyubit pinggiran perutnye.

“Tuh kan Abang ude mulain lagi DASSAAR.”

USTAD MUMPUNI

Beberape taon eni igame Islam mulain santer ame dakwah-dakwah dari ustad-ustad mude nyang lagi naek daon kaye uler keked. Ude gitu, tuh ustad mude-mude ude pade punye gelar ame julukan. Sebut aje A’a Gym buat panggilan Kyai Haji Abdullah Gymnastiar nyang sekarang ude mulai surut uler kekednye, terus Ustad Mansyur, UJE alias Ustad Jefry Al-Buchari, Ustad Arifin Ilham, Ustad Haryono, dan satu lagi orang arab nyang baru aje sering nongol beberape bulan belakangan.

Laen Ustad tentunye laen sasaran, ude gitu ustad sekarang pade pinter mbawain perannye. Sekarang masing-masing ustad jadi punye pameo atawe omongan-omongan tertentu nyang sepertinye emang dirancang biar umat nyang dengernye jadi pade tau ciri khasnye kendiri. Ade yang dijulukin “Dai sejuta umat”, “Ustad Manajemen Qolbu”, “Ustad Dzikir”, Ustad Shodaqoh”, “Ustad Penyembuhan”, “Ustadnye Artis-artis”, ampe “Ustad Pengusir Jin dan Syetan”.

Kalu mau kite tengok kebelakang banget, sebenernye gong eni ude diawalin taon sembilan puluan sewaktu pertame kalinye Kyai Kondang Dai sejute umat nyang pertame banget jadi demenannye orang-orang Betawi. Siape lagi kalu bukan KH Zainuddin MZ, nyang belakangan malah lebi milih jadi orang partai ketimbang nasehatin orang partainye. Aji mumpung kali. Terus berjalan taon timbul lagi KH Qosim Nurseha nyang terkenal ame penceramahnye orang-orang angkatan ampe masup ke istane preside. Tapi, akhirnye turun dan kagak kepake begitu die diketauin bebini due alias berpoligami. Satu lagi muncul Kyai Haji Nur Iskandar SQ yang terkenal ame sebutan Kyai Nikah Semaleman di Hotel Tanah Abang ame jandenye mendiang ustad korban “Tragedi Tanjung Priuk” Ustad Amir Biqi. Ustad eni ahirnye juga ngikutin jejaknya Om Zai nyang manut jadi orang partai.

Lame juge ye kite rasenye ngerinduin Ustad-Ustad model jaman dulu. Tapi, emang kalu orang kote bilang Tren-nye keidupan suke berobe-robe wal hasil untuk urusan penceramah juge mengalamin perkembangan jaman. Sekarang orang sepertinye ude bosen dikasi tauk pegimane itu perang dalam igame, jihad pisabilille, ape nyang dimaksud dengan surat “Qul yee” nyang ade pirmat Allohnye “Lakum dinukum Wal Yadiin”, sepertinye Ustad nyang sekarang ude mulain ninggalin hal-hal nyang kate pemerinte bise bikin pece bele.. hehehe taik kucing. Jebule.. Ustad sekarang ahirnye cuman dibutuin Ustad nyang bise nentremin ati doang.. dan kagak peduli ame kondisi umat. Sehingga jangan heran kalu ahirnye nyang dijelasin kagak perne sempong dari masalah pegimane hati kite di atur supaye baek ame orang, kagak bermusuan, ditabok diem, liat sodare seagame disekse orang laen juge diem, nyang penting Qolbuuuuu terus sambil nyari duit nyang banyak. Di laen pihak cuman ngurusin sedekaaahh aje kagak ade abis-abisnye, belon lagi nyang cuman nyuru zikiran doang, tambahan lagi ade Ustad nyang cuman kerjaannye nasehatin artis-artis cakep aje. Lah pegimane orang diye aje tampile necis. Serbe baru bin bagus bin mahal. Nyang lebi parah lagi ngajarin orang ame nunjukin pegimane carenye nangkep Jin, setan beserte pare dedemit dan keluargenye.. nyang Alloh aje kasih diye kebebasan ade dimuke bumi ampe bates nyang ditentuin. Kaya’nye jadi lebih sakti diye dari penciptenye yeee.. kalu ude gini malah jadi keblinger deh. Nah, berangkat dari kekurang nyang ade entu.. mengkenye jadi kagak heran kalu akhirnya nilai seorang ustad jadi cuman bahan candaan dan lawakan. Akhirnye timbul deh A’a Jimmy ame si Kiwil, pelawak nyang kerjaannye cuman begaye ustad tapi nongol ditempat orang joged sambil ngasih penilaian sebagai juri.. NAUZU BILLAH MIN DZAALIK.

Nah, kalu ude begini pegimane? Siape nyang kudu disalain? Kalu bise pengen rasenye kite ketemu lagi ame Ustad macem HABIB ALI al-Habsy nyang musti kagak macem-macem omongane pamornye tetep disegenin ame pemerinte. Atawe ke HABIB Salim Jindan nyang ceramenye selalu bikin tentare panas kupinge, Atawe ke HABIB Al-Idrus nyang sering keluar masuk bui kerne berani nyinggung pemerinte ame aparat-aparatnye buat mrotes kecurangan ame keenggak adilan. Atawe ke HABIB Usman yang kalu dulu Belande aje tunduk ame perinte diye. Atawe paling kagak kayak BUYA HAMKA deh nyang berani teges ame aturan-aturan dalam igame. Atawe kite kudu nyari dan tungguin bakal nongol satu lagi Ustad nyang punye julukan “USTAD MUMPUNI” nyang semue judul die berani bawain, nyang nyeramahin lebih senden dengan kelakuane, nyang orang salut ame kesederhanaanne, ame orang nyang baek ame keluarge, ame temen, ame musu, tapi teges ame aturan igame??? Tapi… AMPE KAPANNNNNNN?????

KEJEMNYE NEGARE TETANGGE..

Baru-baru eni rame di koran-koran, di tipi, di radio lagi ngebahas hubungan kenegaraa antare negare Indoesie ame tetanggenye nyang masing serumpun. Biasele.. kite pan sering ribut belakangan kalu ude kejadian.. ame tetangge nyang satu eni emang jadi sedikit agak tinggi deh emosi kite dibikinnye.. nyang paling baru sik masale lagunye orang ambon nyang dijadiin nyanyian promosi wisatenye negare tetangge Malaysie meskipun ahirnye diye orang ngakuin kalu lagu entu emang diambil dari Indonesie. Cuman, kerne ude dianggap sebagei lagu nyang ude mera’yat di sane.. diye orang menta supaye masale eni jangan diperpanjang. Dan seperti kebiasaannye.. Pemerinte kite emang baek ati. Dengan alasan masing orang serumpun diredo-in juge de tu lagu jadi lagu negare orang. Kalu kate anak ane.. KASIAN DE LO Indonesie.. ude batiknye diakuin sebagei batik sono, musik angklungnye diakuin sebagei musik bambu kerajaan daerah sane, tempe nye diakuin sebagei makanan negare orang.. Nyang baruan lagi, ternyate lagunye sala satu pencipte di Medan nyang ude meninggal, yaitu Bang TIAR RAMON nyang asli Padang tapi demen bikin lagu Melayu ternyate dipake jadi lagu tarian resminye orang Malaysie dan dibawa’ kemane-mane sebagei pengiring tari-tarian diye-diye orang.. hebat ye??? cuman TKI nye aje nyang kagak mau diakuin sebagei tenage kerje negare orang ..

Jadi sekarang maunye pegimane lagi?

Masing belon lame rasenye di Luar negeri due pulo kite ude lenyap diakuin pulonye negare tetangge.. eh eni ade lagi.. cek.. cek.. cek.. [bole de sekarang kite geleng kepale]. Ape emang eni kesalahan bangse kite di mase dulu atawe kebodohan pemerinte ? ah.. kite paling-paling man bise geleng-geleng kepale aje. Lebi kejem lagi kalu negare tetangge amape bilang .. “ude lee.. ngurusin pulo nyang banyak aje kagak mampu.. masak pulo ilang due aje keblingsatan.. mendingan beresin aje nyang laene..”. Nah kalu ude gini pegimane?

Jangan cuman nyalain negare orang nyang kerjaannye nyolongin budaye kite lah kalu kite kendiri nyang kagak mau sayangin budaye kite? Kayaknye ude masenye kite kudu kasi tauk orang sedunie.. kalu perlu kite kudu aktip ngedaptarin semue budaye dan adat istiadat kite ke dunie.. biar jangan ampe kecolongan lagi..

Jangan heran kalu enti tau kapan .. Keredok ame Gado-gado jadi makanan khas negare Malaye, trus Ondel-ondel jadi maenannye orang Philipine, ame Tanjidor jadi grup drambennye orang Amerika, ame pencak silat deh jadi silatnye orang Afrika.. abisannye.. pegimane negare mau ngurus sekean banyaknye adat, budaye, dan macem-macem bahase di sini.. saking kebanyakannye ..

NARKOBE ? … SEPULU..

Barusan pas berangkat pegi ke tempat ane punye gawean, ane sempet beli koran nyang hargenye cuman serebuan. Di halaman depane ditulis gede-gede name seorang artis pemaen pelm nyang waktu jaman dulu terkenal banget ternyate diye lagi kene musibe digrebek di hotel tempat diye nginep ternyate diye lagi asik nyabu. Kotan aje ane sedikit gemes. Pan belon lame banget tuh artis keluar dari bui gare-gare kasus nyang same NARKOBE kok sekarang udah kejiret lagi ame nyang beginian.. amit-amit cabang bayi. Ude gitu pas lagi ketangkep dan digiring ke tempat bui tampange masing asik aje diye.. sambil ketawe-tawe. Sundelan tuh orang, sale aje masing mesam-mesem kaye orang kagak punye dose aje. NA’UJUBILE..

Kalu dipikir-pikir sepertinye di negeri nyang tercinte eni emang kudu dibuat hukum nyang berat ye supaye orang gentar ame yang namenye NARKOBE. Kalu ustad di kampung ane bilang selaen bise ngerusak badan, ternyate tu barang bisa juge makan otak si pemakeinye. Tapi, kenape orang kagak ade kapok-kapoknye ye ame make entu barang haram. Lebi saklek lagi ustad ane bilang.. namenye aje pake awalan NAR … ude pasti artinye Nar .. yang kalu diartiin ke bahase arab artinye NERAKE .. nah pastinye Narkobe akan ngebawe kite ke jalan nerake [bingung ane.. dimane hubungannye ? kalu cuman dari kate Nar jadi nerake? Hehehe].

Tapi, kalu kite mau ngeliat kebelang lagi, cobe aje deh kite peratiin.. noh jauh ke ujung timur negare kite.. kalu ACEH aje nyang kate orang-orang dulu bilang dijulukin serambinye MEKAH sekarang udeh jadi tempat suburnye taneman GANJA .. lah pegimane ame anak-anak mude nyang laennye? BUJUG BUNENG.. kayaknye emang ude kudu musti bin wajib nih hukum dibuat nyang seberat-beratnye kalu si pemake, pengole, ame si penanem diganjar hukuman nyang paling berat.. takutnye nti seperti jaman dulu.. jangan-jangan emang ade orang-orang tertentu, negare tertentu dan organisasi tertentu nyang lagi giat-giatnye pengen ngancurin generasi mude kite melalui barang harap eni. Wah kalu ude begini sik kagak sale lagi.. mendingan bikin hukuman nyang paling berat buat masale NARKOBE .. pegimane? Ente setuju??? Kalo ane sik bukan setuju lagi.. tapi SEPULU.. [artinye lebi dari se tuju kan?? Hehehehe]

SENIMAN BETAWI BEKURANG ATU

Beberape minggu nyang lalu ade berite di tipi-tipi, di koran-koran ame majale-majale nyang ngabarin telah meninggalnye artis kawakan LILIS SURYANI, anak gang kelinci di daerah Matraman, kerne penyakit kangker. Penyanyi nyang terkenal ame sebutan penyanyi gang kelinci eni emang lame juge kagak nyanyi lagi. Terahir sempet ane denger lagunye waktu di Indoesie masing ade satu saluran tipi, yaitu TELEPISI REPUBLIK INDUNESIE. Wal hasil lupe-lupe inget diye saat entu nyanyiin lagu dangdut kesukaan ane :

Tolong kau ikat hatiku,
Di lembah cinta diriku,
Biarlah aku tertambat,
Dalam gemggam cintamu,

Sekian lama menanti,
Hampir tak tertahan lagi,
Bawalah diriku ini,
Dalam relung hatimu,
Tolong kau ikat hatiku,

Rela aku rela, memadu cinta denganmu
Bawalah diriku ini dalam gengam cintamu

Kayaknye lagu entu masing tertancep tandes dalam ati, apelagi kalu ude denger lagu-lagu nyang laennye macem KEMBANG JATO, SETAN KUBURAN, dan laennye nyang emang sepesial pake irame gambang kromong.. wah makin bikin ati jadi inget ame mase nyang ude-ude. Emang satu seniman nyang biase dipanggil pok LILIS eni ude termasuk penyanyi langke. Diye punye kemampuan selain nyanyin lagu juge bisa nyiptain lagu kendiri.

Emang sayang banget kalu sekarang makin kagak ade orang Betawi nyang nongol lagi ye, apelagi punya kemampuan seni nyang yahud, apelagi nyang bise ikut ngelestariin kesenian Betawinye atawe daerahnye kendiri. Kite orang Betawi kudu bisa conto seniman macem Mas DIDI KEMPOT nyang mahir banget bikin lagu-lagu Jawe sementare anak-anak baru macem grup musik JIUNG aje cuman baru bise nyanyiin lagu-lagu lamenye almarhum BANG BENYAMIN S. pegimane beberape mase lagi ye ? sekarang aje kite ude keilangan seniman-seniman Betawi tapi ampe gini ari belon juge ade gantinye. Tengok deh macem MANDRA, MALIH, HAJI BOLOT, JAJA MIHARJA belon bise dibilang langgeng macem HAJI BOKIR ame HAJI NASIR, nyang ude meninggal. Belon lagi seniman almarhum BANG BEN kendiri, ampe sekarang aje kagak ade nyang ngikutin jejaknye. Bise jadi makin lame lagu-lagu Betawi malah cuman ade pas lagi ulang taon Jakarte doang.. entu juge man lagu nyang entu-entu mulu dinyanyiin ame penyanyi-penyanyi baru nyang bukan artis Betawi sehingge kadang arti pengucapannye jadi laen.

Bole aje sik kalu emang diye-diye mo pade nyari rejeki pake gaye Betawi, tapi cobele barang dikit pelajarin tutur bahase, kalimat, ame pengertiannye.. jangan ampe orang taunye bahase Betawi nyang dulu dicontoin ame POK ANI dan BANG MADI nyang setiap ari dilakonin di RRI malah jadi ilang dan beganti jadi logatnye si ENTONG ame si ENENG nyang ampir tiap ari nongol di tipi. Kalu ude gitu.. kalu diiklan-iklan bilang APE KATE DUNIE?

PELM SEREM disini ADE SETAN

Belakangan eni, sejak pertame pelm “JELANGKUNG” mulain diputer dibioskop-bioskop kelas atu macem TWENTI WAN sepertinye ide pembuat pelm jadi enggak ade abis-abisnye buat bikin pelm nyang dari judulnye aje ude bikin bulu kuduk kite pade bediri serem, soale ude pake name si setan entu kendiri. Tengok le abis entu ade pelm KUNTILANAK, SUSTER NGESOD, TUSUK JELANGKUNG, HANTU JERUK PURUT, GENDEROWO, dan laen sebageinye. Belon lagi yang pake nama tempat atau peristiwa serem laennye seperti TEROWANGAN CASABLANCA, RUMAH PONDOK INDAH, TELAGA ANGKER, ANGKER BATU, atawe pake judul nyang sebenernye kagak ade ape-apenye tapi ceritenye malah bikin serem kendiri seperti THE MIRROR, LEWAT TENGAH MALAM, DENDAM SUSTERN N, dan laennye.

Kalu ane pikir-pikir dari sekean banyaknye cerite serem kok di Indonesie seolah-olah jadi tempat nyang paling serem di dunie ye.. semua setan, dedemit, dan jin sekalian keluargenye jadi sering diomongin ame si produser, si sutradare, bahkan ame si bintang pelm yang rate-rate bahenol dan ganteng-ganteng. Dan sepertinye makin kesini tuh pelm serem jadi semakin ngaco dan jauh dari cerite tentang setan-setan yang dimaksud deh. Dengan judul nyang beraneka ragam nama setan jadi ngingetin ane ame cerite setan-setan di jaman dulu waktu ane masing kecil.

Dulu kalu waktu menggerib ane masing ade di luar, emak ane langsung deh tereak.. “Pin, masup ude menggerib enti di umpetin ame KALONG WEWE lu..” Trus kalu ade orang beranak kudu ditungguin dan dibajunye dicantumin peniti atawe gunting kecil ame dikasih bangle ame sapu dari lidi aren biar kagak ade KUNTILANAK nyang mau ngegodain si orok ame emaknye.. kalu kate orang dulu darahnye orang beranak, ame keguguran entu wangi buat si KUNTILANAK tersebut. Wallohu a’alam. Biasenye KUNTILANAK itu digolongi sebage setan perempuan, nah kalu GENDERUWO itu baru dibilang KUNTILANAN LELAKI nyang kalu turun dari pu’un kepale duluan jadi kebaliak waktu die naek. Istilahnye jumpalitan kali yeee. Belon lagi TUYUL nyang lebih cenderung dibilang setan nyang bisa ngasilin duit buat majikannye nyang dibilang NGEPET ke GUNUNG KAWI ataw GUNUNG GEDE buat ngedapetin kekayaan dengan cara MUJA’ bisa pake perantaraan mahluk laen seperti TUYUL atau dengan diri kendiri nyang berubah jadi BABI NGEPET atau bisa jadi orang nyang bergaye ke MONYET [biasenye dibilang NGIPRIT MONYET].

Selaen itu, orang Betawi paling paham dah kalu ame cerite orang mati nyang kagak diterime bumi atawe ade kesalahan nyang bikin diye kagak diterima ame Alloh akan jadi SETAN KUBURAN, POCONG ataw sebutan TIREN [mati baru kemaren] nyang suka tiba-tiba aje diye ngejeleg di depan kite berupe POCONG yaitu seperti orang mati nayng masi dibungkus kaen puti.. cuman mukenye doang nyang keliatan pucet bebedakan.

Selaen entu, kadang sering kehadiran setan-setan eni disamain ame bau-bau an nyang kadang beseliweran di idung kite.. seperti bau menyan ame lisong atawe bau kambing bandot nyang menandain adenye JIN, bau kentang rebus atawe singkong bakar ame bau sawo mateng nyang menandain adenye KUNTILANAK ame bau bau kembang tuju rupa nyang biasenye orang-orang bilang bau TIREN [orang baru mati kemaren] nyang belon empat pulu ari matinye kadang kalu emang matinye kagak bener [maksudnye imannye kagak bener] kadang suka ngejeleg pake kaen puti bentuk pocongan ame bau kembang tuju rupa.

Kesemua setan, jin ataw apale sebutannye kebanyakan sik cuman nakut-nakutin doang. Kagak ampe ngebunuh kayak di pelm-pelm. Apelagi bikin teror .. kalu orang pade ketakutan lantaran die ngejeleg terus sik wajar aje.. namenye juge setan.. dibilang ade kagak keliatan, dibilang kagak ade tiba-tiba aje ude nongkrong di depan mate.. namenye juge DISINI ADE SETAN…

BAS WEY

Pagi-pagi bener Bang Udin ude sibuk dandan. Nyemirin sonko [pici] itemnye nyang ude keliatan bulukan. Rambutnye juge ude disisir rapi pake minyak lonyo. Begitu juge me jas betawi nyang jadi kebanggaannye. Mungkin ude lebih dari lime taon tuh jas nemenin die disetiap acare mulain dari ngadirin undangan kawinan, sunatan, lamaran, atawe peresmian kecil macem acare pelantikan ketue RT baru. Tapi nyang lebih baru lagi sik tuh jas dipake sewaktu diye jadi ketue panitie pilkade.. PEMILIAN KEPALE DAERE di betawi ini.

Sambil asik duduk dikursi goyange ame nyedot rokok kreteknye Bang Udin mulain gelise. Bentar-bentar jem tali nyang dipenitiin emas nemprok di saku jasnye diliatin sambil diye betereak lantang. “Pat, buruan lu dandannye ngape, pan kagak enak kalu kite nti keduluan ame Pak Lure ame Pak Camat, gini-gini pan sebage bekas mandor gue masing dipandang orang. Pegimane kate diye-diye nti kalu kite nyang sebage orang kecilan datenge aje lebi telat dari diye? Buruan ah..”.

“Bentaran dikit ngape Bang, ni konde aye pan juge lagi dibenain. Lagian sik Abang nyuru aye kudu pake kebaye.. na tauk kendiri kalo dandanan model beginian emang lame.. mane si Romle udeh ngelosor pegi ame temen-temennye. Sabaran dikit ye Bang.. tinggal entaran aje..” kate si Patime bininye Mandor Udin yang paling boto.

“Eh Bang, kate orang-orang emang mobil nyang mau diresmii jalurnye nyang lewat di depan rumenye Encang Keron entu enak ye Bang.. pake pendingin kaye yang di kulkas, trus ade tentare nyang jagain di pintu.. ape bener?” Tanye Patime sambil ngebedakin pipinye pake bedak VIVA no 8.

“Kayenye sik emang begitu, noh stamplasnye aje udeh jadi .. bagus lagi.. cuman kalu elu nti mau masup kudu antri beli karcis kaye di bioskop-bioskop”

“Wah jadi kagak sabar ni Bang Aye.. anyo da ah.. kite ngumpul ame nyang laennye di setamplas”, kate Patime serapinye diye dandan dan nyambel selop nyang ade di bawah mesin jahit.

Tige jem kemudian, Bang Udin, Pok Patime ame beberape orang undangan yang sekirenye bakal nemenin Gubernur nyang bakal lewatin jalur baru “BUS WAY” [dibace BAS WEY] ude pade gelise. Keringetan ude pade ngucur disono-sini. Tuh liat aje bedak VIVA no 8 nye Pok Patime juge ude mulain luntur ame keringet padahal diye ude pelan-pelan ngegosoknye pake selampe. Pak Camat, Pak Lurah ame bini-bininye juge kagak lepas dari rase gelise ame gondok lantaran diye tauk beberape menit kemudian kalu ternyate Gubernur nyang mustinye mampir di daerahnye ternyata cuman numpang lewat naek ini bis sambil nandain mulain diberlakuin jalur cepatnye BAS WEY.. mane stamplas tempatnye ngumpul mati ase nye.. biasele kalu peresmian serbe keburu-buru jadi banyak nyang dipaksain. Jebulnye jadi kagak ade nyang sempurne betul. Kalu emang kepakse ade juge bentaran bakal rusak lagi.

Mandor Udin ame sedikit lega karena nyang ditunggu-tunggu akhirnye lewat juga. Keliatan juga tuh tampange Gubernur Betawi nyang baru ngelambein tangannye lengkap dengan jas, kaen, picinye. Tapi ade nyang lagi cemberut.. Mpok Patime.. di ngegerutu kendirian. Kirain gue dandan cakep-cakep bakalan ketemu trus salaman ame Pak Gubernur. Boro-boro bakal diajak bareng naek tuh bis kote ngelilingin jalur bebas hambatan.. beeee.. ujung-ujunge man nongton doangan.. kalu tauk bakal begini mendingan gue nyari kutu ame si Pok Asie ude bise ngumpulin lusinan kali kutu ame telornye.. SOMPRET BANGET DAH..