Macem2 Berite Seputer Lebaran

Pagi eni ane nyesek bace berite di koran halaman paling depan. Beritenye : gare2 ribut masale perlunye duit buat persiapan lebaran laki bini ribut ampe si bini mati dibakar sementare si laki dibawe ke rume sakit akibat nyang same. Trus di laen tempat stess mo ngadepin lebaran nyang kagak gablek duit buat rume tanggenye seorang lelaki gantung diri. Belon lagi makin maraknye garong nyang ude mulain menjalar dari rume2 penduduk ampe di depat ATM buat ngambil duit orang atawe ngambil barang berharge di rume2. Baru beberape ari aje tetangge ane perempuan mati di gorok dengan motip nyang same. Ujung2nge akibat ulah orang nyang kepepet butuh duit lebaran.

Masya-alloh, kok lebaran segitu dahsyatnye akibat buruknye ye. Mbace ni koran ampe jadi bikin ati deg-degan jangan-jangan duit THR kite nyang kagak seberape bisa aje ikut jadi inceran. Lebaran oh lebaran, kok ude jadi keilangan maknenye. Kalu inget beberape taon nyang lalu sepertinya berite orang digarong, dirampok, orang dibunu, rume tangge ribut lantaran duit buat lebaran sepertinye ampir2 kagak kedengeran.

Kalu dulu, ngadepin bulan puase kite ngerase amaaannn banget, lha di sono sini kite ngedenger banyak orang pade tadarusan (soale anak sekolahan prei sebulan penuh), kalo tidur siang juge kebanyakan kite nyang mude2 pade geroyokan di langgar2 atawe di emperan mesjid sehabis sembahyang johor bareng2. Nah sekarang lebih banyak kite ngeliat orang nyang pade nunggu buke puase di emol2 ketimbang di rume. Ude pade kagak takut ketinggalan sembahyang terawe same2 lagi. si eneng lebih seneng nti sembayang kendiri. paling2 due kali sembahyang terawe ame satu kali sembahyang witir cuman seentaran. Jadi lebih penting buke puase sambil ngehabek semue makanan seole-ole kagak bakalan dapet lagi tuh makanan. Kalu dulu, terawe rame2 kayaknye enaak banget. abis terawe kite pade maen mobil nyang kite bikin dari bambu nyang dililisin trus diiket ame karet nyang ban-nye dari sendal nyang dipotong bunder. taruk deh obor di depannye ude aman kite rame2 keliling kampung. atawe kalu orang nyang ude gedean pade maen bleguran pake karbit. Sepertinye sekampung aje kite ude pade akur semue. kagak kayak sekarang demennye tawuran mulu. kagak jentel satu-satu. Mane berantem kagak pakek pikiran takut ngebahayain orang laen. nyang penting emosinye bise keturutan. Kalu dulu kite kasian bawe senjate, enti bikin orang celake. paling2 kalu ribut maen katot-katotan pake tangan kosong.

Le ile ha illolooh.. jaman sekarang emang ude edan. Orang lebih suke nonjolin emosi daripade otaknye.. AJE2 ADE JE EH..

Enakan Jadi Pengamen

Puase ude ngelewatin 2 mengguan. Ane baru nyempet-nyempetin nulis tentang pengamen nyang sepertinye tambah kreatip banget nampilin kemampuannye meskipun tetep dengan berbagei macem peralatan nyang diye punya dari nyang ngamen pake modal yaitu nyang ngamennye make alat-alat musik seperti gitar, gendang, gitar kecil, kecrekan, bisa juga make alat-alat musik nyang dibikin kendiri seperti botol aqua nyang diisi ame beras atawe kerikil, kecrekan yang dibikin dari tutup botol (kerop) nyang ditipisin, maupun nyang kagak bermodal kecuali pake tepukan tangan ame bacotnye doang. Ude gitu, ngamennye juge macem-macem ade nyang nyanyi, ame bace sajak, niup suling, bahkan ampe ade nyang cuman nyeritain tentang nasib susyenye diye biar orang jadi simpatik buat ngasih duit ke diye nyang kadang kesannye nyindir ame rade-rade ngancem pake sindiran.

Tapi, nyang ane peratiin disini adale pinternye si pengamen ngambil ide ngebawain lagu-lagu atawe puisi nyang bertema islam seperti sholawatan, lagu qosidahan, ataw lagu islam nyang ude populer dinyanyiin ame artis ngetop macem Gigi, Marshanda, Ungu, Opik, dll. Nggak peduli tuh pengamen banyak tatonye atawe serem tampang ame penampilannye, sekarang jadi sedikit rapile.. apelagi ame asesorinya macem peci2 lima rebuan nyang dari bahan wol. Bikin kerase kalu kite lagi puase banget deh.

Yang lebih parah lagi bin nyebelin juga ade orang nyang pake tema lebaran buat minta duit sekedar buat buke puasele, buat makan saur le, ame buat sekedar beliin baju lebaran buat keluargenye dengan alasan nyang ude biase :

"apalah artinye duit seribu buat anda, tapi sangat berarti buat kami, dari pada kami berbuat kejahatan seperti yang pernah saya lakukan dulu makanya dengan sangat terpaksa saya meminta sedikit kemurahan hati bapak dan ibu sekalian, uang seribu yang bapak dan ibu berikan kepada saya tidaklah membuat bapak dan ibu menjadi jatuh miskin, tapi akan sangat berarti buat menyambung hidup saya dan keluarga saya ini".

Tapi, kalu bole ente cermatin lagi, mau tauk berape penghasilannye seorang pengamen ? ane perne iseng-iseng ngeliatin seorang ibu nyang suke nyanyiin lagu-lagu rohani. diye biasa mangkal di Slipi ampe Komdak setiap pagi ampe siang. waktu entu pas baru ane berangkat jem 7 atawe jem 8 an. kebetulan bis nyang ane naekin patas 6 jurusan Cililitan - Kalideres. Nah, sehabis ngamen si ibu ini dengan asiknye ngitungin duit nyang diye kumpulin dari hasil ngamen soalnye si supir lagi butuh duit recehan jadi diye nukeri ke si ibu. wal hasil dapetle sekitar 3 rebuan. abis gitu eh dikantong sebelenye si ibu langsung ngitung duit rebuan nyang lecek nyang diye ude kumpulin sehabis ngamen. syet dah.. sepagian aje ude lebi dari due puluh rebua diye dapet. pegimane kalu diye ngamen ampe sore. pegimane kalu ampe sebulan. Mangkenye jangan heran kalu dengan penampilan nyang serbe lecek aje penghasilannye diye pade ude lebih dari diatas UMR nyang biase didapet ame buruh pabrik atawe pekerje swalayan nyang butuh tampil kelimis.

Nah, dengan perbandingan antara gengsi ame muke tebel rase-rasenye idup di betawi eni emang jadi serbe bingung kan ? cape kerje, tampil cakep bin kelimis eh hasilnye masing dibawe UMR. Lha tampil lecek bin dekil malah dapet diatas gaji pegawe honorer. Dunie emang ude kebalik.... Auk leeee...

Terime Kasi Ye..

Baru kali eni kepikiran buat bilang terima kasi ame orang-orang deket ane nyang rajin ngasih semanget, ngeritik, ame ngasi info baru kalu di blog ane bise ditambahin ini itunye.

Pertame, banget neh ane mo bilang makasih nyang segede-gedenye ame si Sugeng Surya Edi alia Mas Bram si Brewok nyang pertame banget ngenalin ane ape entu blog. jadi meski cuman dengan ngeraba-raba (orang bikin pertamenye aje kite berempat), alhamdulille jadi juge deh blog ane, bahkan ude ade tambahan laennye nyang ane tulis, diantarenye :

- www.emyra-tasha.blogspot.com,

- www.obat-obatan.blogspot.com,

- www.makanan-masakan-betawi.blogspot.com,

- www.tokoh-tokoh.blogspot.com

Kedue, makasih juge ame sodare ane nyang cakep nyang demen ngasi tauk kalu bisa ngambil conto tampilan-tampilan bagus di blog laen nyang bise ditiru. Namenye Rudy Wiryawan. Atas bantuan diye jugele jadi blog ane sedikit tampil lebih manis dan kece. Dan nyang jadi sumber kenape gambar ane bise di masukin ke sini, soale hampir semue gambar ane jepret pake kamere dijitelnye mas Rudy enile. Sekali lagi makasi ya Rud..

Ketige, kagak sale lagi kalu ane tunjuk congornye Uda Ichwan nyang biarin kalem juga tapi tampil dengan manteb plus demen bikin dekor blog ane jadi lebih kinclong. Ente liat pan gambar ane nyang kayak orang sibuk di atas ? nah entu hasil karyenya jiye. tambahan lagi diye nyang ane sering mintain bantuan buat ngopiin photo ane dari cd ke komputer hehehe.

Nah, buat nyang ke empat ame seterusnye kagak sale lagi kalu ucapan terime kasi ane tujuin buat team kritik dan nyang lagi demen-demennye becandein ane soal ape aje nyang ane ketik di blog eni. kagak sale lagi kalu bukan Tafriadi Azwar ame Eriko. Tanpe diye bedua nyang tukang manas-manasin pokoknye kagak bakalan timbul deh ide-ide lucu dari ane nyang bisa ane tulis. Enggak lupe juga me si cantik Deni Heldinia nyang dulu ane perne sale nyebut namenye.

Dan terakhir yang juga kagak kalah serunye tentunye Team Tenang Aje yang terdiri dari Trio Mas Tarjo, Beng2, dan ketue II kite Mas Meyndrasta, yang sering ngasi inspirasi ke ane sehingga bisa lancar buat ngimput data-data ke blog ane.

Nah, biar kagak kualat bole juge deh ane bilang juga makasi ame si Ubay, Aries TW, Idul Fitri, ame Mbak Tety nyang kadang2 juga ikut campur meskipun cuman dengan cengir2an nye aje bila ngedenger ade komen atawe kritikan atawe pertempuran mulut antare ane ame mister konfrontir hehehe. Namenye becande kan kudu begitu, kalu dibawe serius mulu bise-bise tampang cepet tuwek ye nggak ?

Tabek

Untung Ane Orang Betawi

Lebaran ude tiggal itungan hari lagi, di koran padi eni ude ditentuin per tanggal 9 Oktober 2006 batas awal dimulainye ongkos bis bole pade naek dengan ketentuan yang ude diatur berape naeknye per kilometer.

Pare pembantu di deket rume nyang kebetulan akrab ame anak ane si Tasha juga ude pade siap ngebuntel pakean ame barang bawaan lebaran buat dibawe ke kampunye di Tegal sono. Mbak Iyem, Mbak Tuti, Mbak Saritem, Mas Joko, ame ke Tuan dan Nyonye tetangge ane juge sepertinye ude siap-siap bertarung ame pare pemudik laennye. Buat nyang kerje kantoran macem Tafriade nyang pulang ke Padang, Aries nyang pulang ke Batak ngikutin bininye atawe ke Jawe Tengah tempat Enyak Bapaknye, Eriko nyang pulang ke nenek moyange tentunye ude dari jauh jauh ari ude nyiapin bekal buat pulang kampung ame nentuin tanggal cuti libur tambahan selain nyang ude ditentuin ame kantor. Ade nyang pulang naek kapal terbang, ade nyang gebis, naek kerete dan ade juge nyang pastinye mo bawa mobil kendiri macem ketue ane bos Mey buat pulang ke Solo. Wal hasil buat orang nyang enggak lagi pengen pulang kampung atawe nyang emang tinggal di betawi eni jadi kagak bisa ngambil cuti kerne jadi penjage selame temen-temen pade pulang.

Buat nyang pade pulang kampung, dengan kenaekan ongkos tentunye bikin hati jadi sebel sebab kudu nyediain duit ekstra selain nyang ude disiapin buat ponakan-ponakan di kampung. Belon ame bejubelnye orang nyang bikin kite jadi mandi ame keringet kite kendiri. Kalu ente kagak percaye coba nti liat pade H mines tuju ampe H plus tuju, beee.. bejibun deh orang nyang pade antri karcis ame pade berebutan tempat. Nah, kalu ude kayak gini tentunye orang nyang pade tinggal di Betawi jadi pade kegirangan. Ngerasain jadi punya kampung kendirian. orang kalu pas lebaran ame beberape hari sebelonnye aje kite ampe bisa tidur di jalanan saking sepinye tu jalan.

Tradisi nyang kayak gini sepertinye bikin tantangan kendiri. Kalu kate Tafriadi, Eriko, Irfan, Ichwan, Aris, Sugeng, Umar, dan temen-temen laennye di kantor "Disinile letak nikmatnye bejubelannye. nilai perjuangannye.. ".

Kalu kate ane sik, mungkin kerne di kote kebanyakan kan ude pade ilang tradisi kampungnye nyang keliling le, nyang pade nenangge saling ngunjungin le, belon kalu emang sudarenye masing pade merentet di kampung pastinye orang nyang pade merantau ke tempat laen bakal jadi tempat ngumpul ame temen-temen lame di kampung. Kalu ane peratiin sik pembantu-pembatu nyang pade pulang aje jadi pade keren. Baju kaos mere mateng ame kacemate item nempel di atas kepale, tambahan topi pet ame jem tagan, ples bawe tip rekorder atawe vcd, wokmen nyang spiker kecilnye melilit dipundak. sukur-sukur ade HP seken nyang bentar-bentar diye sms an ame temen pulang kampungnye. wah.. kalu orang betawi bilang repot beneeeerrrr.. kalu begini jadi kepikiran berape biaye nye .. pegimane repotnye.. capeknye.. jadi kalau gitu jadi kepikiran : "UNTUNG ANE ORANG BETAWI"

Malem Qunut Same Aje Malem Ketupat

Kalu ente sembahyang taraweh di lingkungan betawi pas menjelang hari ke lime belas malem ke enem belas biasenye sedari pagian emak-emaknye ude pade repot nyariin daon kelape mude alias janur pating dibikin ketupat buat ngadepin malem ganti surat.

Adapun nyang dimaksud ame ganti surat, kalu pade malem pertame taraweh ampe malem ke lime belas biasenye imam nyang ngebawain entu pade rokaat pertame diye baca surat al-hakumut ampe surat Tabat, enti pade rokaat ke duanye baru baca surat Qulhu. Nah, nti sehabis hari ke lime belas ampe akhir puase baru ganti surat, rokaat pertame pake surat Inna-anzalna rokaat nyang kedue baru pake Al-hakumut ampe Tabat. Biasenye di orang betawi rate-rate sembahyang tarawenye pake nyang 20 rokaat ame witir 3. Nah, tambahannye biasenye mulain dari malem ke enem belas buat witir terakhir nyang satu rokaat pasti ditambahin do'a qunut nyang biase dibawein kalu orang sembahyang subuh.

Tapi, ade acare rutinitas di setiap langgar-langgar di lingkungan betawi. Biasenye pas malem ke enem belas sehabis taraweh imam langsung mimpin tahlilan dan diahirin ame makan ketubat bareng-bareng nyang didapet dari sumbangan tiap-tiap warge nyang pade sembahyang di langgar entu. Tepatnye dari jemaah buat jemaah. Emang sik, kagak gitu dipaksein. kalu emang kagak lagi bikin ye enggak pape bole juge ikutan sedekahan atawe tahlilan.

Dulu, waktu ane masing kecil paling demen tuh kalu pas malem ganti surat atawe malem qunut. Selain bisa makan ketupat sayur gratis ame daging atawe telor ayam nyang disemur. Juge tandenye hari lebaran ude mau deket lagi. nah kite-kite nyang kecil ude pade ngundang temen-temen buat ngunjukin baju lebaran kite nyang ude dibeliin ame nyak babe kite. Emang sik kesannye jadi norak. Tapi, maklum le jaman dulu kan kagak seperti jaman sekarang. kalu dulu baju baru emang adenye pas hari lebaran doang jadi wajib buat setaon sekali. kagak seperti sekarang nyang kapan aje kite bise beli, jadi anak-anak sekarang ude kagak pade norak lagi ame nyang namenye baju lebaran. Tapi, namenye anak-anak.. kalu sekarang belon dibeliin nyang namenye baju lebaran tetep aje ude pade manyun dan ngerayu emak bapaknye sambil nanyain kapan baju lebarannye mau dibeliin.