Enakan Jadi Pengamen

Puase ude ngelewatin 2 mengguan. Ane baru nyempet-nyempetin nulis tentang pengamen nyang sepertinye tambah kreatip banget nampilin kemampuannye meskipun tetep dengan berbagei macem peralatan nyang diye punya dari nyang ngamen pake modal yaitu nyang ngamennye make alat-alat musik seperti gitar, gendang, gitar kecil, kecrekan, bisa juga make alat-alat musik nyang dibikin kendiri seperti botol aqua nyang diisi ame beras atawe kerikil, kecrekan yang dibikin dari tutup botol (kerop) nyang ditipisin, maupun nyang kagak bermodal kecuali pake tepukan tangan ame bacotnye doang. Ude gitu, ngamennye juge macem-macem ade nyang nyanyi, ame bace sajak, niup suling, bahkan ampe ade nyang cuman nyeritain tentang nasib susyenye diye biar orang jadi simpatik buat ngasih duit ke diye nyang kadang kesannye nyindir ame rade-rade ngancem pake sindiran.

Tapi, nyang ane peratiin disini adale pinternye si pengamen ngambil ide ngebawain lagu-lagu atawe puisi nyang bertema islam seperti sholawatan, lagu qosidahan, ataw lagu islam nyang ude populer dinyanyiin ame artis ngetop macem Gigi, Marshanda, Ungu, Opik, dll. Nggak peduli tuh pengamen banyak tatonye atawe serem tampang ame penampilannye, sekarang jadi sedikit rapile.. apelagi ame asesorinya macem peci2 lima rebuan nyang dari bahan wol. Bikin kerase kalu kite lagi puase banget deh.

Yang lebih parah lagi bin nyebelin juga ade orang nyang pake tema lebaran buat minta duit sekedar buat buke puasele, buat makan saur le, ame buat sekedar beliin baju lebaran buat keluargenye dengan alasan nyang ude biase :

"apalah artinye duit seribu buat anda, tapi sangat berarti buat kami, dari pada kami berbuat kejahatan seperti yang pernah saya lakukan dulu makanya dengan sangat terpaksa saya meminta sedikit kemurahan hati bapak dan ibu sekalian, uang seribu yang bapak dan ibu berikan kepada saya tidaklah membuat bapak dan ibu menjadi jatuh miskin, tapi akan sangat berarti buat menyambung hidup saya dan keluarga saya ini".

Tapi, kalu bole ente cermatin lagi, mau tauk berape penghasilannye seorang pengamen ? ane perne iseng-iseng ngeliatin seorang ibu nyang suke nyanyiin lagu-lagu rohani. diye biasa mangkal di Slipi ampe Komdak setiap pagi ampe siang. waktu entu pas baru ane berangkat jem 7 atawe jem 8 an. kebetulan bis nyang ane naekin patas 6 jurusan Cililitan - Kalideres. Nah, sehabis ngamen si ibu ini dengan asiknye ngitungin duit nyang diye kumpulin dari hasil ngamen soalnye si supir lagi butuh duit recehan jadi diye nukeri ke si ibu. wal hasil dapetle sekitar 3 rebuan. abis gitu eh dikantong sebelenye si ibu langsung ngitung duit rebuan nyang lecek nyang diye ude kumpulin sehabis ngamen. syet dah.. sepagian aje ude lebi dari due puluh rebua diye dapet. pegimane kalu diye ngamen ampe sore. pegimane kalu ampe sebulan. Mangkenye jangan heran kalu dengan penampilan nyang serbe lecek aje penghasilannye diye pade ude lebih dari diatas UMR nyang biase didapet ame buruh pabrik atawe pekerje swalayan nyang butuh tampil kelimis.

Nah, dengan perbandingan antara gengsi ame muke tebel rase-rasenye idup di betawi eni emang jadi serbe bingung kan ? cape kerje, tampil cakep bin kelimis eh hasilnye masing dibawe UMR. Lha tampil lecek bin dekil malah dapet diatas gaji pegawe honorer. Dunie emang ude kebalik.... Auk leeee...