Malem Qunut Same Aje Malem Ketupat

Kalu ente sembahyang taraweh di lingkungan betawi pas menjelang hari ke lime belas malem ke enem belas biasenye sedari pagian emak-emaknye ude pade repot nyariin daon kelape mude alias janur pating dibikin ketupat buat ngadepin malem ganti surat.

Adapun nyang dimaksud ame ganti surat, kalu pade malem pertame taraweh ampe malem ke lime belas biasenye imam nyang ngebawain entu pade rokaat pertame diye baca surat al-hakumut ampe surat Tabat, enti pade rokaat ke duanye baru baca surat Qulhu. Nah, nti sehabis hari ke lime belas ampe akhir puase baru ganti surat, rokaat pertame pake surat Inna-anzalna rokaat nyang kedue baru pake Al-hakumut ampe Tabat. Biasenye di orang betawi rate-rate sembahyang tarawenye pake nyang 20 rokaat ame witir 3. Nah, tambahannye biasenye mulain dari malem ke enem belas buat witir terakhir nyang satu rokaat pasti ditambahin do'a qunut nyang biase dibawein kalu orang sembahyang subuh.

Tapi, ade acare rutinitas di setiap langgar-langgar di lingkungan betawi. Biasenye pas malem ke enem belas sehabis taraweh imam langsung mimpin tahlilan dan diahirin ame makan ketubat bareng-bareng nyang didapet dari sumbangan tiap-tiap warge nyang pade sembahyang di langgar entu. Tepatnye dari jemaah buat jemaah. Emang sik, kagak gitu dipaksein. kalu emang kagak lagi bikin ye enggak pape bole juge ikutan sedekahan atawe tahlilan.

Dulu, waktu ane masing kecil paling demen tuh kalu pas malem ganti surat atawe malem qunut. Selain bisa makan ketupat sayur gratis ame daging atawe telor ayam nyang disemur. Juge tandenye hari lebaran ude mau deket lagi. nah kite-kite nyang kecil ude pade ngundang temen-temen buat ngunjukin baju lebaran kite nyang ude dibeliin ame nyak babe kite. Emang sik kesannye jadi norak. Tapi, maklum le jaman dulu kan kagak seperti jaman sekarang. kalu dulu baju baru emang adenye pas hari lebaran doang jadi wajib buat setaon sekali. kagak seperti sekarang nyang kapan aje kite bise beli, jadi anak-anak sekarang ude kagak pade norak lagi ame nyang namenye baju lebaran. Tapi, namenye anak-anak.. kalu sekarang belon dibeliin nyang namenye baju lebaran tetep aje ude pade manyun dan ngerayu emak bapaknye sambil nanyain kapan baju lebarannye mau dibeliin.