Nggak Dimane, Kapan Aje .. Masale Tetep Aje Ade

"Bang jangan diyem aje, beras ude nggak punye

No liat pendaringan, ude kosong glondangan

Pan elu ude tau, gue ude berenti kerje

Kalo emang terpakse, jual aje clane gue

Biar ude nggak kerje, tanggung jawab mesti ade

Abis ude mustinye, emang ude nasibnya

Cepetan dong bang usahe, jangan tergantung nasib

Usahe tetep usahe, tapi rejeki selik"

Lagu eni sepertinya baru aje tadi pagi ane dengerin. Lagu nyang dinyanyiin ame Bang Ben dan Mpok Ida Royani emang seperti ngegambarin kondisi masyarakat jaman sekarang nyang ude pade suse nyari kerjaan. Dari berite2 di koran-koran, tipi, radio ade aje nyang ngebahas tentang tinggat pengangguran nyang emang ude melebihin nyang semestinye. Perekonomian Indunesia emang lagi terpuruk. Dimane-mane orang pade sibuk nyari kerje.

Belon lagi ame bencane dimane-mane. dari mulain gelombang tsunami di Aceh, gempa di Jogja, ampe Pangandaran. bahkan ame keluarnye lumpur gas di Sorong Sidoarjo. Mangkin lengkaple penderitaan rakyat Indunesia.

Hari eni aje ude dua bulan dapur ane di rume kagak ngebul. Paling2 kalu diye mau ngebul juge man dikit doangan. Maklumle.. penghasilan nyang diarep-arep ude macem nunggu ujan di musim panas terik. Keringet nyang netes di badan aje udeh lame kering. Maknye si bocah juge ude mulain nanyain kapan dong susunye si bocah mau dibeliin lagi soale stok nyang di kaleng ude mulain abis. Wah, kalu begini bisa berabe neh. Ape kudu seperti lagunye Bang Aji Oma Irama neh.. gali lobang tutup lobang.. syet dah.. gimane carenye nyabarin si bocah ye.. auklah