Palsafah Hidup Ibarat Roda Kehidupan Nyang Berputer

Sekedar Obrolan Ngalor Ngidul

Pagi tadi sewaktu ane dateng ke kantor suasane masing sepi. Baru atu dua orang nyang keliatan udeh ade .. padahal ane kendiri aje masing ketelatan 10 menit datengnye. Nyang lebi sedih lagi.. mane lampu depan masing dimatiin.. keliatan banget mangkin sengsarenye nih kantor. ape iye ??? ade nyang lagi asik-asik rebahan di bangku jage.. ade nyang lagi asik buka-buka komputernye, ade juge sik beberape temen nyang lagi keliatan ngobrolin buat ngadepin bulan Puase nyang tinggal satu mingguan lagi.. duh nasip.. nyang kemaren aje penghasilan masing belon kompak datengnye.. pegimane buat nyang besoknye ye..

Kalu ude gini, ane jadi inget si Bapak ane.. selalu diye ngomong ke ane .. kehidupan entu ibaratnye roda nyang beputer ..kadang waktunye diye ade di atas kadang diye ade dibawe.. kali aje sekarang giliran kite nyang di bawe .. moge-moge besok giliran kite nyang di atas. bujug...

Kalu ude begini 'moto' nye orang Betawi mulain keluar deh tu Bapak.. tapi, emang kalu buat ngeringanan beban pikiran sih.. ye kagak salenye.. asal jangan ampe keterusan aje pas kite lagi di bawe.. eh tuh roda mandeg. soalnye orang nyang ude di atas lagi kagak mau turun-turun.. kalu gitu pan jadi berape.. pendaringan kosong, kantong cekak, alamat dapur kagak bakalan ngebul nih urusannye.. kalu ude kayak gini siape nyang kudu bertanggung jawab cobe ?

Wassalam,

Bapaknye si Tasha