Nikah Sirih

Tadi pagi waktu ane lagi siap2 dandan buat ketempat kerjean masing sempet2in buat nonton tipi nyang pade rame ngomongin masalah ade artis nyang terkenal ame goyang gergajinye ngejalanin nika siri ame artis rambut kriting nyang suarenye rada serak2 becek. Ade nyang nuduh die ude bikin kebohongan publik le, ade nyang bilang die ngelakuin poliandri le sebab dalam waktu nyang bersamaan katenye die juge nike ame orang bule keturunan Indonesie atawe orang Indonesie keturunan bule. Wal hasil jadi tambah ribet deh. Banyak komentar mulain dari penghulu yang ngerase nikahin die, ame penceramah atawe ustad. Belon lagi omongan bekas lakinye nyang keliatan sewot banget begitu die tauk bekas bini nyang dipengen2in eh jebule die diembat ame orang laen. Tinggal die aje nyang nginyem ibarat kate ke cicek makan kapur.. man celam-celam doang sambil nelen ludah. Soale die paling getol banget pengen balikan lagi ame bekas bininye. Ah.. kok ane jadi ngegosip terlalu jauh yee.

Masale nyang ane mo ungkepin disini pan masale 'kawin siri' atawe 'nike siri' (orang sekarang ude ngebedain antare kawin me nike). Kenape sik musti ade istile kawin siri?

Sebenernye sah dimate Alloh, orang nike entu kudu ade penghulu atawe orang tuenye nyang nikahin tuh anak ame lelaki yang ditunjuk, bise demenannye tuh anak atawe lelaki nyang dipengenin buat jadi lakinye tuh perempuan. Peribase kate ade kedua calon mempelai. Nah nyang kedue walinye si perempuan, dan nyang ketige ade saksinye.. supaye enti2 kalu siperempuan jalan ame lakinye atawe kalu si lelaki ade di rumenye si perempuan jadi kagak nimbulin pitne ye kagak? Nyang penting lagi ni.. kajadian ke gini kudu dikasi tauk orang laen.. mo tetangge2.. atawe sodare2 baek si perempuan maupun sodare2 si lelaki kudu tauk. Jadi kalo sewaktu-waktu orang nanye ade nyang ngebilangin. Sengkat kate diumumin. Kalu disunahnye pan kudu ade berkat atawe sukuran atas pernikahan dengan ngundang tetangge dan kenalan. Tambahan lagi, orang dulu meskipun jarang ade nyang pake surat nike, orang2 ude pade paham kalu orang nyang namenye ude nike segale tanggung jawab dan amanahnye jadi laki bini entu ude pade ngerti igame. Jadi, kagak seperti sekarang.. dibilang kalu nike siri kagak ade kekuatan hukumnye. Lah hukum ape emange? negare, atawe hukum tuhan?

Kejadian sekarang pan kayak ude pade nyimpang. Ade banyak alesan nyang dipake ame orang2 nyang pade ngejalanin nike siri. Ade yang cuman jadi alesan supaye kagak dose artinye halal 'begituan' dengan nyari enaknye tapi kalu ude dapet enaknye malah lupe atawe sengaja dilupe-lupein kalu die masing punya tanggung jawabnye sebagei lelaki. Ujung2e perempuan juge nyang jadi rugi.. ude orange dipake, anak dapet, eh bagiane kagak dibagi.. soale anakke kagak diakuin.. apes banget kan?
Alasan nyang kedue, kerne si lelaki ude ade iketan ame bini tue secare hukum negare. Aturan negare nyang ade bikin orang lelaki kagak bekutik sebab begitu banyaknye sarat2 orang lelaki nyang mau bebini lagi.. terutame orang pemerinte.. peribase kate lebih dihalalin kawin-kawinan pake urat ketimbang kawin-kawinan nyang pake surat. Wal hasil bejibun dah lelaki nyang ude pade ngebet buat jajan lagi akhirnye milih 'nike siri' nyang kagak ketahuan ame bini tuenye.. trus kalu ade ape-ape tinggal ngomong 'talak atawe cere' beres dah.. Satu lagi nyang lebi pare.. tuh anak belon mampu nyari makan, belon mampu ngasi nafke.. belon siap jadi orang tue, tapi ude kebelet pengen ngerasain enaknye orang begituan. Wal hasil jadi maen umpet-umpetan deh ame orang laen. Begitu Alloh kasi anak.. eh tobat tuju turunan .. die ketulung2 langsung ngacir dari tanggung jawabnye.. tinggal perempuan aje nyang nyo-ong..

Kalu kite kembali lagi ke permasalahannye. Sekarang kan ude ade lembage nyang resmi. Kenape sik kagak kesono aje. Pan enak kalu sah secare igame ame negare. Kedue emang aturan nyang kudu dibenerin. Jadi nggak ade lagi orang nyang ngegampangin urusan berume tangge. Buat orang nyang ngerti igame dan takut dose sik gak pape.. sebag die ngerti akibatnye orang berume tangge (mo kawin siri kek, kawin gantung kek) nyang penting taukle ame akibatnye kalu ngelanggar bise dose. Jangan ampe ke kejadian nyang dulu2 waktu ade penyanyi dangdut nyang kepengen banget anaknye diakuin ame bapaknye nyang perne jadi mentri. Nyang atu bilang die dulu nike siri dan dicerein kagak pake kate2 eh nyang lakinya kagak ngaku kalu die perne kawinin tuh penyanyi. Jelas2 dari tampange aje ude same.. mo diajakin test dare ade aje alesane. Kan jadi seperti orang maenin hukum igame.. diye nyang bikin enak dan jadi anak kok malah mabur waktu diminte tanggungjawabnye.. bujud dah..

Kalu begini ceritenye NIKE SIRI.. jadi ape dong maksudnye?

Masing Tentang 'Ponari'

Kemaren2 masing rame di radio2, tipi2, di koran2 asik pade ngebahas tentang pengobatan alternatip ponari. Ceritenye masing sekitar orang yang pade ngantri ampe rebuan orang. Ditambe lagi ame cerite orang yang ampe meni-ot (mati) plus ame nyang pade pengsan. Keruan aje jadi tambe ricuh. Belon lagi cerite pembagian duit hasil pengobatan nyang kagak bener sehingge ade korban dari pihak kluarge si dukun cilik ponari kendiri, siape lagi kalo bukan bapaknye kendiri nyang katenye ampe klenger digebukin ame mpok iparnye aleas encangnye si ponari lantaran si bapak pengen brentiin kebiasaan ponari buat ngobatin orang. Keruan aje buat si encang nyang kagak rela pendaringannya bakalan abis jadi naek dare dan kagak rela. Wal hasil jebule jadi pade bengklai deh tuh.

Emang jadi seperti kebiasaan di tempat kite, pade demen nyang namenye ikut2an. Perasanan kagak di jakarte, kagak di jawe kagak juga di negare laenne.. budaye ikut2an ude jadi kebiasaan sari2nye. Dulu waktu pengobatan 'mak erot' nyang katenye bise ngegedein 'pentungan' aje langsung deh pade merotos berite ade orang2 nyang pade punye kebeasaan nyang same. Paling kagak mangkin bejibun orang nyang ngaku dapet elmu dari si mak erot. Ade nyang ngaku anaknye, cucu kesayangane, cucu atu2nye.. weleh..weleh..

Nah, begitu juge ceritenye si Ponari nyang katenye ketemu ame batu petir entu (ane kagak tauk dah kenape dinamain batu petir), lantas aje nongol due orang nyang punye riwayat nyang ampir same. Nyang satu namenye si Dewi.. dan nyang satunye lagi si Siti nyang punye batu lebih aneh.. sebab tuh batu bisa ngomong.. bener kagaknye sik ane belon mastiin. Cuman, buat ane asal jangan kite percaye disebabin ame tuh batu orang bise baek.. bise2 kita musyrik bin kapir bin setan bin titan.. idih amit2 cabang bebi deh..

Ade usahe sik dari salah seorang penguase pondok pesantren nyang nyoba ceramahin orang2 nyang pade mo berobat supaye jangan ampe jadi syirik.. sebab percaye lantaran tuh batu nyang nyembuhin penyakit.. wah, orang nyang ude pade putus ase lantaran kagak baek2 penyakitnye.. dan putus ase lantaran beaya pengobatan begitu mahalnye, orang nyang ude pade putus ase lantaran penanganan dokter atawe mantri buat diye2 pade pade kagak ade nyang bener.. mo diceramahin.. padahal si Ponari atawe si Dewi atawe si Siti ude jalan pilian terahir buatnye.. klo ude gini pegimane juntrungane?

kuatin iman?
baekin penanganan kesehatan?
murahin obat2an?
Lantas ape dong?

Beberape tanggapan dalam ngatasin masalah makin bejibune orang ngantri.. nyang dapet ane tangkep dari orang2 nyang jadi panutan semacem pemimpin pondok pesantren dari Jombang, dan ketue majlis ulame.. bilang pertame, bisa jadi emang Ponari ame batunye bise nyembuhin atau cuman sekedar isepan jempol.. tapi, kalu kite kagak teliti nyang bener buat ngebuktiin kebenerannye ye ampe kapan? Catet orang nyang dateng.. trus tanya penyakitnye apaan.. dan abis minum aer si Ponari .. jadi pegimane??? kalu emang kebukti bise jadi obat atawe kagak kasih tauk dah keorang2 rame biar kagak pade bingung.. beres pan??

Nah nyang kedue, kalu emang masalah ngantrinye nyang bikin jadi ribet.. ye ditertipin dong.. trus .. ade bagean duit nyang harus dibagi buat orang2 nyang ikutan ngatur ketertibannye semacem kelurahan, aparat, atawe apele.. pokoknye bagean nyang seimbang.. sebab masalahnye ame dampaknye ude bukan cuman lingkungan rume si Ponari doangan.. tapi, ude menyangkut ade nyang mati, ade nyang pengsan, dan laene..

Satu nyang ane tangkep dan sedikit setuju.. di internet kemarenan ane dikirimin gambar lucu.. ade berite.. sekarang aer celupan batu petire si Ponari ude dijual bebas.. eh pas ane liat gambarnye iklane "POCARI SWEAT" jadi di ganti dengan "PONARI SWEAT" sebuah hasil minuman..hehehe..

Ponari.. Ponari deh.. aje aje ade je eh..