Musiknye Orang Betawi

Kalu ente perne idup di pinggiran Betawi taon 70 an, mestinye ente perne liat bermacem-macem jenis pertunjukan nyang suka ngiringin di acare-acare seperti orang kawinan, atawe sunatan, misalnye ade cokek, Lenong, gambus, ondel-ondel, tanjidor, jait, marawis, golek, reog, dan laennye. Tapi, nyang paling sering maen dan beken biasanye kalu kagak orkes dangdut ye qosidahan.

Biasenye, macem jenis pertunjukan eni juga ditanggapnye tergantung ame jenis orange, dan juge ame daerahnye. kerne emang ude lame di masyarakat Betawi emang penduduk nyang paling bisa nyerep orang mane aje, mangkenye pertunjukan di Betawi juga jadi beraneka ragam tergantung orang nyang nangglapnye. Seperti orang nyang biasa tinggal di pinggiran nyang deket ame daerah tanggerang tentunye kagak kaget ame cokek, golek, dan reog sebab emang entu asalnye dari sane, cuman orang-orange aje nyang pade nyoba nyari empan di mari. Nah, kalu gambus, qosidahan ame marawis biasenye dipanggil ame orang nyang rade-rade alim le atawe rade agamis, kerne biasenye nih musik sering nyanyiin lagi Arab sono. Tinggal buat orang nyang biase aje ame nyang gayenye macem jaware-jaware biasenye kalu kagak nyang ade ngibingnye tentunye ame ade orang jogetnye. Kagak salah deh kalu pilihannye jatu ame musik dangdut.

Jujur aje, musik dangdut nyang dari asalnye melayu tadinye dipukul ame rebane sekarang ude di ganti ame gendang nyang dibuat dari kulit. Ditambah suling dikit ame mandolin jadi deh. Waktu ane kecil dulu penyanyinye masing pake sombok ame mik nye nyang dibuat dari salon kecil di tutup ame slampe. Inget dulu waktu masing tinggal di Setiabudi. Wah asli masing kampungan banget dah tuh musik. Tapi, emang pastinye kite jadi nggak nahan begitu denger tuh musik sedikit-sedikit pinggul kite langsung begoyang.. tarik manggggg... mangkenye kagak heran kalu pemusik-pemusik dangdut asalnye dari orang kagak punya alias nyang cuman modal bakat alam soalnye emang asalnye juga dari masyarakat rendahan. Tapi, jangan heran juga kalu sekarang justru di musik dangdutle nyang bisa bikin banyak artis jadi kaya .. dan bisa bertahan lama ampe tua. seperti Megy Zakarya, Mansyur Syah, Oma Irama, Elvy Sukaesih, Elya Khadam yang rate-rate ude pade bangkotan tapi masing tetep aje orang cariin. Belon lagi tambahan penyanyi generasi barunye macem Rita Sugiarto, Evy Tamala, Hamdan Attamimi, Camelia Malik, dan tambahan lagi nyang masih gres macem Kristina, Erie Susan, Inul Daratista, Anis Bahar, Dewi Persik, dan lainnye bikin musik dangdut jadi tambe semarak abis.. ngegusur kesenian laennye. pokoknye kalu ente mau tauk musiknye orang Betawi.. ente diri aje di pinggir jalan pas dari jem 6 pagi juga ude kedengeran .. so pastile.. DANG .. DUT..

Taisen

Kalu ente perne denger nyanyiannye Bang Ben (alhamruh H Benyamin Sueb) ame Mpok Ida nyang judulnye "DUL LI PAK ada nyang sairnye kayak gini :

Dul li pak si lindul lindul litem tem, jalan-jalan ke kampung rawe

si Ida orange item, biar begitu taisen gua

Dal gandel si gundal gandel del, jalan-jalan ke kampung rawe

Benyamin orange bogel, biar begitu taisen gua..

Kate taisen nyang arti sebenernye adale timpalan, nyang lalu di kalangan orang mude-mudi pade taon tuju puluan jadi rame dipake buat nganggep taisen sebagai gandengan atau temen deket nyang lebih dari sekedar sobat karib bahkan bisa jadi juga antare leleki ame perempuan nyang arti maksudnye ampir mendeketin seperti pacar, sebenernye berasal dari suatu kate di dalem permaenan judi "hwahwe" yang emang lagi sedeng marak-maraknye di Betawi pade akhir 1960-an dan awal 1970-an.

Judi eni ngejanjiin 36 angka keberuntungan dengan simbol binatang pade setiap angke-angkenye. Umpame angke 1 (ikan bandeng), misalnya, taisen-nya atawe timpalannye angka 5 (singa), angka 30 (monyet) taisen-nya angka 23 (ikan mas koki), dan seterusnya.

Nah, sekarang lame-lame kate eni jadi ilang kendiri. seperti kate PSK (Pekerja Seks Komersial), kalu dulu di saat bange Cine emang lagi rame pade urban di mari orang kayak beginian dibilang "gerempang" atawe "cabo" (nyang asal katenye dari Ca Bau Kan versinye Bang Remy Silado), semakin berkembang lalu jadi disebut "lonte" atawe "pereks" nyang artinye Perempuan Eksperimen, sekarang jadi lebih halusin jadi dianggap perempuan nyang kerjenye ngajak ngesek trus dibilang komersial karena abis gitu minta bayaran.

Wah ade-ade aje bahase sekarang..

PETASAN

Bulan Puase taon 2006 ude bejalan satu mingguan. Tapi, orang nyang jualan petasan ude nongol dua minggu sebelon datengnye eni bulan. Mungkin pas lagi pade nisfu-an kali. Syukurnye omongan dilarangnye orang buat jualan petasan sekarang mulain kerasa, meskipun di sono sini masing aje ade anak nyang pasang petasan.. man kagak gede dah.. palingan juga petasan 'ceplik' tapi emang orang kagak perne keilangan ide ye. Petasan kagak bole e diye bikin macem-macem kembang api.

Kalu dulu, masing jaman ane 10 taonan. Malah jenis petasan nyang rada banyakan. Kalu buat maenan anak-anak nyang rade-rade penakut palingan cuman kembang api, petasan ceplik, petasan tumbuk, ame petasan nyang model kayak sagu nyang ditempelin ke batu koral terus dijemur ampe kering dan nempel. nti kalu ude kering baru deh ditumbuk jadi bunyi. tapi, anak2 dulu pade kreatip. kagak kayak anak sekarang nyang mau ape-ape aje tinggal ngeluarin duit dari kantong. paling-paling cuman bikin nyo-ong emak bapaknya aje lha selame bulan puase duit jajannye larinye ke situ doang.

Inget jaman dulu, kalu bulan puase mane ade anak-anak nyang tidur abis terawe.. pastinye ude rame buat kontes maen 'meriem sundut' nyang dibikin dari bambu yang dibolongin ujung atasnye trus di kasi minyak tane baru disundut.. jadinye bunyi alami. Ade lagi yang namenye petasan bleguran nyang dibuat dari tane nyang dibikin gunung-gunungan terus dimasukin karbit baru disundut. atawe bikin petasan lempar pake busi mobil atawe motor nyang di dalemnye diisiin pentol geretan nyang. Kalu pengen praktis bikin juga dari mur ame baut buat dilempar nah ditengahnye dikasiih petasan tempelan. nah buat bawahnya dikasi rombe-rombean dari tali plastik nyang dibikin alus. praktis kan ?

Tapi, kembali lagi ke jaman sekarang. Kalu dulu macem-macem petasan nyang banyak. nah sekarang malah jenis kembang apinya nyang bejibun. Kalu dulu ade kembang api, petasan aer mancur, jangkwe, petasan cabe rawit, petasan tarik, petasan teko, petasan banting. Nah, sekarang malah macem-macem jenis kembang api nyang bejibun, selaen kembang api nyang emang ude jadi madonenye, sekarang nambah lagi petasan tikus nyang bunyinye mencicit kayak tikus, kembang api kitiran, gangsing, petasan kentut, petasan komet, dan laen jenisnye nyang lebih nonjolin jenis lampu atawe pijarannye ketimbang suara. Jadi, bikin anak kecil pade demen. ape lagi ame asepnye nyang macem-macem. dan kagak nyampah kayak petasan. Kalu dulu, setiap ade acare lebaran, orang kawinan, nyunatin, orang ngebesan, dan acare maulidan pastinye selalu diiringin ame bunyi petasan rencengan nyang pastinye diakhirin ame numpuknye sampah kertas nyang ude pade ancur akibat meletusnye petasan entu. Sekarang sih alhamdulillah, jadi lebi bersi.Belon lagi, ade aje cerite anak nyang tanganye kene petasan sampe ade nyang dijaitleh, ilang jari jempolnyele cuman gara-gara demen maen petasan lempar aje.. kalu dulu mane enak kalu maen petasan kagak dilemparin ke orang.

Adat kebiasaan petasan di Betawi, selaen Bulan puase atawe lebaran emang masing ade. Tapi, biasenye diye pake dipesen gabungan atawe rencengan dari nyang kecil dicampur ame nyang gede. Kalu nyang gini sik seperti nyang ude ane bilang, buat acare maulidan di malem mangkat, acare bebesanan, penganten laki-laki dateng ame iringannye, nyunatin anak, dan manggil tetamu nyang pade mau ikut mbesan. Emang kalu kite pikir2 acare nyang kayak gini mubazir atawe buang-buang duit aje. Tapi, buat orang jaman dulu, bisa berabe kalu petasane kagak dipasang. bisa ngambek dah si besan. Orang nyang mau dateng ke sunatan juga belon pade nongol alesannye petasannye aje lon dibunyiin. artinye si punye hajat belon siap. Nah, kalu kagak dipasang bisa berabe dong kagak ade nyang dateng para tetamu.

Sebenernye, Petasan itu sumbernye dari Cina nyang diambil ame orang Betawi dari daerah tanggerang (sekarang jadi Tangerang), biasenye orang Betawi bilang cine benteng alias orang cine nyang kulitnye item demennye miare babi. Tapi, berkembang dari jaman ke jaman malah sekarang jadi tempat pusat pembuatannye di daerah Parung Bogor. Auk siape nyang bawa tuh petasan. mungkin aje anak keturunan cine Tanggerang nyang ude pade pinde ke sono.. MENE KE TE-HEK

Cerite Tentang Habaib

Ente tauk apa itu habaib ? itu .. yang katenye ngakunye masing keturunan dari nabi. Kalu istilah di Betawi kumpulan habib-habib dah. Nah, buat orang betawi nyang emang ude kentel rase keislamannye.. denger kate habaib mo dateng ke wilayahnye aje beee (kalu ente mo bilang 'be' eni mulut ente rada dimenyonin sama bibir bawah rada dimajuin dikit ye) lantas aje orang sekampung jadi pade repot, ade nyang nyiapin nasi kebuli nyang emang ude jadi kebiasaan makanannye, roti cane, nasi begane dan laennye pokoknye repot abis deh.

Ape lagi kalu emang si habaib entu dateng pake baju gombrongnye tambe ubel-ubel di kepalenye. Tambahan lagi ame kumis nyang dicukur rapi plus jenggot panjangnye. Belon lagi sipat mate nyang item jadi tambah tajem aje tuh pandangan matenye. Kalu ude gini tentunye nambe lagi orang nyang berbondong-bondong buat nyium tangan atas bawahnye.

Emang sih, kagak sale kalu orang Betawi entu paling cinte ame nabinye. Mangkenye percaye dan yakin banget dengan hadis nabi nyang sering didengungin ame guru-guru ngaji terutame ame para habaib eni.. katenye mencintain anak dan keturunan nabi same aje dengan mencintain nabi kendiri. Wal hasil nggak jarang orang nyang pade berebutan buat deket ame diye. Tengok aje noh di mane-mane aje tempat para habaib berade pasti ude banyak orang ke hamuk nyang dateng biar cuman sekedar nengok mukenye. Kalu kate nyak Romle tetangge ane sih.. ngeliat mukenye aje rase ati ude teduh.. ude kerase kelatan pancaran cahaye nabinye.. (hehehe ape kagak kelewatan tun nyai ??). Tapi, kalu sempet kite amatin bise juge kali ye.. coba deh tengok di Kwitang tempat pengajian ame mesjidnye Habib Ali Al-Habsyi atawe di Kalibate tempat mesjidnye Habib Kunjung (Al-Hadad) atawe ente pegi ke Cipayung tempatnye Habib Umar Al-Atos, belon lagi tempatnye Habib Abdurrahman As-Segaf, Habib Husein Al-Idrus, dll emang sepertinye nggak ade matinye.. adeee aje orang nyang pade berduyun-duyun buat ke sono. Apelagi kebiasaan orang Betawi nyang demen jiare. Kayaknye kalu belon ketemu ame habaib eni kerasa jadi belon afdhol. Masalah bener kagaknye sih ane kurang tauk dah..

Wallohu a'alam bis showwab..

NB. Usut punye usut ternyate ane juga masing keturunan arab. man kate babe keturunan arab kontet heheh mangkenye jadi kecil kayak gini.

Pantun Betawi Sekarang Mah Asal Goblek

ini ade beberape pantun nyang perne ane dapetin waktu ane kecit dulu.. kebetulan emang salah satu dari encing ane demen ame berpantun. Jadinye pantun eni emang asli dari diye.. kalu beberape sik sepertinye emang nyang ude biase beredar.. misalnye :

Jem tuju jem delapan

Jem sembilan kereta jalan

Ane tunggu ampe kapan

Aer mata jato di jalan

Burung kecici burung kecica

Burung dara mengangkat sarang

Di mulut benci di hati suka

Malu malu sama orang

Metik kwini jangan dikandut

Kalu dikandut banyak getahnye

Nyari bini jangan nyang gendut

Kalu nyang gendut banyak anaknye

Nah, kalu kite peratiin setiap pantun diatas, sepertinye emang masing ngikutin kaedah nyang biasenye dari pantun-pantun laen nyang menjadi sumber tempat orang betawi berasal, yaitu bangse melayu. Tapi, belakangan eni orang seenaknye aje bikin pantun cukup ame due kate aje dirase ude ngecukupin buat dilempar ke orang. Nyang penting kan isi dari bahase keduenye ude bise dingertiin ame orang nyang dituju. Coba aje ente peratiin pantun-pantun nyang sekarang beredar seenak dengkulnye aje..

Bue kwini bue kedongdong

Nyari bini dong..

Bue cempedak bue kedongdong

Enggak dong..

Beli keran di tanjung priuk

Kite pacaran yuuuukkk...

Nah, kalu ude begini tentunye bahase pantun jadi asal timbang dong. Timbang nyampe ape nyang dimaksud, gampang dibikin dan langsung nyeplos.. tapi, kalu nanti jadi keterusan bisa berabe dong buat orang lelaki nyang pade mau ngelamar calon bininye.. jadi kagak ade pantunan lagi.. langsung terabas deh..

bue kwini dimakan penyu.. jadi bini nyuuu'

Lebaran Kagak Lewat Sini..

Ucapan nyang beginian sering banget dapetin. Apelagi kalu pas mo lebaran duit kagak gablek, kantong kosong glondangan. Mane baju belon kebeli lagi, ketupat aje belon keliatan meskipun cuman kulit nye doang. Kalu kate orang Betawi lagi ampeg banget dah.

Mangkenye si Eneng kalu ditanya.. ame si Irpan anaknye nyang demplon.. "Nyak, pegimane baju buat persiapan lebaran aye nih, kok ampe gini ari masing belon ade aje".. si Eneng pasti dengan sewotnye bakalan bilang ..

"Lebaran Kagak Lewat Sini... "

Soalnye die sewot abis ame si Udin, lakinya nyang ampe ude tinggal mau dikit lagi lebaran belon juge nyetor duit gajinye atawe THR nyang biasenye ude diterimenye seperti biasenye. Maklumle.. di tempat si Udin kerje emang lagi suse masalah keuangan. Boro-boro mikirin duit THR, bulan bayar gaji bulan eni aje nyang punye kantor masing kelimpungan nyari ke sono ke sini.

Kalu dipikir-pikir emang THR atawe tunjangan hari raye emang ude jadi satu kewajiban nyang kudu ada.. kagak bise diganggu gugat lagi. Kadang duit nyang beginianle nyang bikin karyawan jadi pade sewot ame atasannye kalu ampe telat apelagi ampe kagak bise dibayarin.. bisa-bisa disumpahin abis deh.. belon lagi ame orang rume.. moge-moge sik kejadian eni jangan ame terjadi deh ame kite-kite.. AMIT - AMIT CABANG BEBI......

Bulan Puase Pade Berebut ke Mesjid

Emang kagak sale kalu ustad bilang bulan puase adale bulan nyang penuh dengan rahmat. Pagi tadi aje, di sono sini keliatan banget banyak anak-anak mude nyang bepergian dengan pici di kepale ame sarung nyang diselempangin di leher baju kokonye.

Belon lagi kalu pas siang.. beee (ngomong be.. nye mulutnye rada di nyebengin dengan bibir bawah nyang sedikit ditonjolin) di mesjid mane aje terutame di tempat-tempat nyang biase rame ame kayak di mol-mol atawe di tempat-tempat adem nyang ade asenye.. ude pade penu ame orang nyang pade sembahyang Johor.. sekalian sedikit beselonjor ngabisin waktu siang .. soale ngantuk pas malem begadangin waktu saur.

Suasane di tempat pasar rada sepi. Mane mau orang jalan-jalan kalu lagi panas begini. apelagi bulan eni emang panasnye matahari ke bine-bine teriknye, bisa-bisa tenggorokan malah tambah kering. Kalu ude begini, mendingan kantor-kantor nyang ade asenye.. lumayanle kagak begitu panas ame aus banget.

Tapi, terus terang aje, kalu bulan puase eni ane paling demen ngeliat temen-temen nyang tiba-tiba aje jadi berube jadi alim. Nyang kagak biase ke mesjid jadi rutin buat ngedengerin ceramah nyang seperti jadi acara rutin tiap siang sambil ngisi waktu istirahat orang kerje kantoran. Padahal mah, nggak sedikit nyang mending pade ibadah nyang paling manter.. TIDUR.. soalnye .. kate nabi, tidurnye orang nyang puase kan ibadah.. hehehe.. entu diye alasan nyang ane demen.. apelagi kalu kite peratiin tuh muke-mukenye nape jadi pade licin abis kene aer sembahyangan.

Apelagi buat si pencerame.. paling demen ame bulan Romadon ame bulan Maulid.. sebab biasenye pade bulan eni doang nyang dimane-mane pade gencar nyari ustad atawe pencerame buat ngisi acare pengajiannye. Lumayanle sambil nyari pahale kantong konjen jadi ikut berisi.. kan bole juge pencerame ikutan lebaran ame anak bininye.. orang bilang mah "inamal a'maalu binniyah". jadi tergantung niat nye kendiri. Mo beramal bole, nyari duit ye bole.. sorge ame nerake emange siape nyang bikin ???

Puase man Dapet Laper ame Aus Doang

Baru due ari kite ngejalanin puase. Mane puase taon eni sepertinye lebih suse dirasain. Bencane belon lagi rapi, aksi protes masing di sono sini. Tambahan lagi musim panas nyang belon juge ilang.. noh liat di mane-mane banyak tanah nyang ude pade meletak kering kerontang akibat nggak ade aernye.

Bulan Puase taon eni juge ane rasein paling-paling banget deh.. ude pendaringan entar isi entar kagak, lobang di sono sini ude digali.. buat ngebulin dapur.. wah.. tambah ngenes aje ..

Tapi, untungnye bulan puase biar kate lagi suse masih dapet juge kite dapetin.. nggak tauk nanti-nanti kalu umur kite masing panjang..

Mengkenye, mumpung sekarang masing bise kite nikmatin ni bulan.. yang kate ustad semalem adale bulan nyang penuh pengampunan, dan yang penuh rahmat, ude sebaeknye kalu kita coba ngejalanin ni bulan dengan penuh kesabaran .. puase kude dijalanin bukan cuman puase perut, tapi juge puase mulut. puase nyang bisa kudu ngelawan nyang namenye hawa nafsu.. mau mare-mare ame temen kudu di sabarin.. mau mare-mare ame atasan kite kudu disabarin.. ketimbang puasenye jadi kebelangsak.. kalu ustad di TV bilang puase nyang dapetnye cuman laper ame aus doang.. pahalanye kagak..

Jadi,.. buat sekarang mau ngeluh .. ye di buang aje dulu jauh-jauh deh ye..

TABEK..