Banjir Bandang Serang Jakarte

Sape nyang bakal nyangke kalu banjir dateng lebih cepet dari perkiraan kite. Perasaan baru bulan Januari Ane rasein kok di bulan nyang biasenye ujan dateng dengan lebat ternyate nggak juge turun-turun.  Panas lagi sedeng meteng-metengnye. Ntu pas ahir bulan Januari 2007. Eh pas mulai dari tanggal 28 an aje ujan mulai turun dengen deresnya.. Emang sik ude di kasi tauk ati-ati ame banjir nyang datengnye lime taon sekali. Dulu ane masing inget banjir dateng taon 2002 bulan Pebruari tanggal 2. Di daerah ane nyang kebetulan di samping Kali Pesanggrahan jadi korban banjir nyang ampir melanda due RT atawe sekitar seratusan kepale keluarge. Untung aje saat entu kagak dibarengin ame listrik mati. Jadi kite-kite nyang kagak kene kebanjiran masing lumayan bise mbantuin ngasih aer bersih. ikut begadang di dapur umum. Sekarang mah wah.. boro-boro. listrik padem ude mau 4 arian. krisis aer bersih jadi kepaske deh kite ngantri aer bersih sumbangan dari PAM. ude gitu malemnye nyang dingin, kagak ade hiburan tambe lagi lampu yang kagak nyale bikin si kecil anak ane blingsatan gerah ame takut gelap. wah musti kudu ngeluarin dana lagi buat beli lilin yang hargenye mendadak jadi ikutan naek kayak harge beras ame sayur-sayuran.

Ente bisa rasein dah... Betawi aje nyang kote besar kite ampe di keje antrian aer lha pegimane dengan yang di luar sono ? Tapi, emang banjir ini adil ye.. kagak nyang susye kagak nyang seneng rumenye pade kelebu.. kagak nyang di pinggiran kagak nyang di apartemen juge pade ngerasein rumenye didatengin aer nyang warnenya rade-rade kecoklatan.. plus bau nyang sedep bener... benteq dah.

Di rume sebelah aje ude jadi tempat pengungsian sodare2 nyang dateng dari berbage tempat. ade nyang dateng dari Tanjung Priuk komplek marinir angkatan Laut, ade nyang dari depok tempatnye perumahan elit.. nyang konon sempet ngungsi man bawa pakean yang dibadan aje.. ame keperluan anak bayinye...

Tapi, ade syukurnye juge ye.. dengan banjir kite2 jadi serase besodara deh... nyang kayak minta bantuan tetanggenye nyang miskin yang padahal sari-sarinye diye lewat pake mobil cakepnye aje cuman negor pake klakson. kalu sekarang eh.. mau duduk bareng sama2 sambil nungguin aer kapan surutnye.. mungkin ade juge beberape nyang ninggalin rumenye cuman ame pembantunye doang.. jadi die asik nginep di hotel kagak tauk kalu pembantunye ude pade di evakuasi ame tetangge .. soalnye aer mangkin tambah tinggi aje.. dassar orang kagak punya prikemanusiaan...

bay de way.. Banjir bandang di Jakarta nyang datengnye hampir menyeluruh menunjukkan ternyata Indonesia terutama masyarakat nyang di Jakarta sebagian besar masing punya rase pesodaraan nyang cukup tinggi le.. semua kecemasan semacem ade pencopet, tukang jambret, tukang pengamen, dan laen sebagenye seperti mendadak ilang .. begitu juga pengemis yang biase tidur di kolong jembatan. kagak tauk pade ngungsi kemane orang tempatnye sekarang ditempatin ame banjir.. kalau mo ngelawan gidah sono.. dijamin ngambang diye hehehe..

Banjir.. banjir.. ternyate di balik musibe ade juge hikmahnye...