Bahase Betawi atawe Dialek Jakarte

Bahasa Betawi atau dialek Jakarta itu, sepertinya terlihat demikian mudah dipelajari. Tinggal mengganti a dengan e pepet (seperti kata ; kuda dengan kude, meja dengan meje, celana denan celane, tiga dengan tige, dst) atau akhiran kan dengan in (seperti bukakan dengan bukain, sayangkan dengan sayangin, tuangkan dengan tuangin, dst) atau juga dengan mengganti awalan me dengan nge (seperti membakar dengan ngebakar, membawakan dengan ngebawain, mengatakan dengan ngatain, dst). Akan tetapi tidak berhenti pada pengubahan kata tersebut saja. Banyak bahasa Betawi atau Jakarta yang sepertinya sudah hilang atau jarang disebut lagi terutama untuk pengucapan suatu benda atau keadaan seseorang atau barang, atau tidakan dan kelakuan seseorang atau sesuatu tersebut.

Kalau dulu, berbahasa Indonesia mungkin dianggap oleh mereka sebagai bahasa melayu tinggi atau 'basenye orang gedongan' yang kecenderungannya seseorang (apalagi suku betawi) dianggap sok belagu atau sok tinggi apabila menggunakan bahasa Indoensia baku tersebut.

Benar, kalau dikatakan bahasa Betawi banyak menyadur berbagai macam bahasa yang diperoleh dari berbagai macam suku bangsa. Pada prinsipnya, apa yang enak didengar dan biasa maka akan menjadi ucapan mereka sehari-hari nantinya. Kalau bisa tentu dengan penerapan bahasanya sendiri.

Sebagai contoh ; Ana atau Anta yang biasa digunakan oleh kaum arab sebagai kata saya dan engkau dengan asik diubah menjadi Ane atau Ente. Begitu juga dengan bahasa lainnya. Kalau pembagian dialek betawi ini (orang belanda bilang BATAVIA, tapi karena susah menyebutnya jadi BETAWI sajalah).

Selain itu, dalam wilayah Jakarta ini juga telah terbagi dalam beberapa wilayah yang menyebabkan adanya perbedaan pengucapan, terutama untuk pengucapan akhiran "a". Ada beberapa wilayah yang mengganti "a" dengan "e pepet" (seperti dalam pengucapan kata bebek) dan ada juga wilayah di Jakarta yang menggantinya dengan "e" seperti dalam pengucapan kata "kecil" dan ada juga sebagian wilayah yang menyebut dengan kata "a'".

Di wilayah tanah abang, kemayoran, atau biasa dibilang betawi kota atau pusat mungkin pengucapan "e" seperti pada pengucapan ke dua. Sedangkan untuk wilayah barat seperti Kebon Jeruk, Palmerah, Rawabelong, Kebayoran Lama, dan sekitarnya lebih sering terdengar menyebut "e" seperti pada pengucapan pertama. Sedangkan untuk wilayah Bekasi, Srengseng, sampai Ciputat lebih terdengar menggunakan kata "a'".

Ada satu kelemahan yang saya temukan dalam sinetron "si Doel Anak Sekolahan" dimana dialek Betawi jadi bermacam-macam karena mempertemukan Almarhum Bang Ben, Rano Karno, Suti Karno, dan Aminah Cendrakasih yang mewakili orang Betawi kemayoran dan Betawi Pusat yang menggunakan logat "a" dengan "e" (seperti pada kata bebek)dengan Bang Mandra, Almarhum Pak Tile, Bang Nasir yang mewakili orang Betawi daerah pinggiran yang menggunakan logat "a" dengan "a'". Selain itu banyak perbedaan istilah yang ditemukan dalam dialog disana. "Biarin" kalau kata Bang Ben tapi "Bagen" kata Bang Mandra. "Makanin" kata Aminah Cendrakasih tapi Bapak Tile bilang "Madangin". Nah, kalau sudah begini jadi bahasa mana yang seharusnya digunakan?

Tapi ada satu kesamaan di dalam suku Betawi ini, yaitu hilangnya pengucapan huruf "f" dan "v" dengan menggantikannya dengan huruf "p" saja. Belum lagi beberapa istilah yang terkadang dari satu wilayah akan berbeda dengan wilayah lainnya. Seperti kata "peci" atau "pici" yang dipakai sebagai penutup kepala untuk sembahyang pada wilayah Betawi pusat tapi Betawi wilayah barat mengatakan "songko".

Jadi, siapa bilang bahasa Betawi itu gampang eh mudah?

Bang Ipin

Nganggur Lagi - Nganggur Lagi

Bang jangan diem aje, beras ude nggak punye
noh liat pendaringan, ude kosong glondangan

Pan elu ude tau, gue ude brenti kerje
kalu emang terpakse, jual aje clane gue

Biar ude nggak kerje tanggung jawab tetep ade
emang ude mustinye, abis ude nasipnye

Usahe dong bang usahe, jangan tergantung nasib
Usahe tetep usahe, tapi rejeki celik

Sebue lagu gambang kromong nyang dilantunin ame Bang Ben ame taisennye mpok Ida Royani yang syairnye ude ane tulisin di atas jadi seperti ngegambarin kondisi nyang lagi ruwet ampir satu taonan eni. Kalu kagak sale.. di tipi2 ame di radio banyak nyang bilang akibatnye rode perekonomian di Amerike jatu duduk mengkenya jadi bikin perekonomian bangse kite terjua bebas nyungsep di got. Wal hasil anceman PHK alias pemutusan ubungan kerje ude berade di ambang pintu, noh liat raporan di koran-koran aje beberape perusahaan di Indunisia nyang bergerak di bidang industri atawe pabrikan yang hasil barange di kirim keluar negeri terancem gulung tiker. Di koran aje ude sekean rebu orang dirumahin (istile baru buat ngilangin kesane di PHK kecil-kecilan) ada pimpinan nyang rade bijaksane .. buat tetep ngebayar pekerjenye nyang dirumahin cuman dibuangin duit makan, ongkos, me tunjangan laennye. Tapi, nggak jarang nyang malah ngegantung pembayaran gaji pekerjenye pade.. dengan harapan kan jadi cepet cari kerje trus keluar tanpa dapet paket PHK.. dassar.

Apapun nyang dipesenin Pemerinteh buat kagak ngambil jalan PHK atawe kagak rugi nyang berkepanjangann sepertinya ude kagak mempan buat pimpinan perusahaan. Padahal dengan bijaksane Pemerinte bilang :"Dulu sewaktu tuh karyawan rajin dan perekonomian bagus, kan pekerje bise nguntungin pemilik, toh mereka nggak ngasih sebagean keuntungan perusahaan alias tuh keuntungan ditelen kendiri. Nah sekarang pan bagian lagi ruginye, ye jangan lantas mecat sembarangan dengan alesan kagak gablek duit dong.. pan kasian.. ape tuh pekerje kudu banting setir buat usahe laen? nah orang lagi kagak punye duit sape nyang mo belanje???

KAGAK KALI....

Pantun Jadoel

Lagi iseng-iseng ane ngubek-ngubek di gerobok bekas nyang ude kagak diisiin ame makanan lagi kecuali barang-barang nyang ude pade kagak kepake, ane nemuin selembar oret-oretan bekas tulisane Babe ane almarhum yang kurang lebi 10 taon lalu ude meninggal.

di lembaran kertas bekas yang ude mulain coklat warnanye.. ade tulisan Babe ane nyang isinye pantun lame nyang mungkin sengaje atawe kagak sengaje ditulis die.. kalu bole ane masupin di eni blok kira-kira isinya begini :

burung kecici burung kecia
burung dare mengangkat sarang
dimulut benci di ati suka
malu-malu sama orang

metik kuini jangan dikandut
kalu dikandut banyak getahnye
nyari bini jangan nyang gendut
kalu nyang gendut banyak anaknye

jem tuju jem delapan
jem sembilan kerete jalan
aye tunggu ampe kapan
aer mate jatoh di jalan

jalan-jalan ke pasar baru
jangan lupe beli kedongdong
mentang-mentang penganten baru
masuk kamar menta digendong


Abis ngebace tu tulisan binin ane mesem2 kude. Ternyate Babe bole juge orang dulu care pantunnye. Jadi inget ame nyanyianne Bang Ben almarhum (Benyamin S) ame mpok Ida (Ida Royani) sewaktu musik gambang kromong masing sering dibunyiin di radio Babe ane..

paling enak si kue bike, dimanannye dikope' kope'
yang nggak enak kalu lagi boke, jual clane ditawar cepek

yang nggak enak disamber gledek, tulang sum-sum pade risi
yang nggak enak jadi orang pendek, mau nyium naek di kursi

Tapi, perkembangan jaman sekarang mah anak mude sekarang mo bikin pantun kadang ude mao nyang gampange aje. Nyang penting tujuannye nyampe .. katenye.. coba peratiin beberape nyang belon lame masing beredar.. diantarenye..

bue duren bue kedondong, gue keren dong (nyanjung diri kendiri)
ayam bekokok di pagi ari, minta rokok sama apinye (gak masuk ye?)

Tapi, ade juge nyang lebi parah..

bue kedondong bue kelingkit, minta duit dong (lha? lebih kagak nyambung)

bahkan ade juge nyang malah jadi pelesetan, terutame nyang sering dikoarin ame pelawak-pelawak macem Bagito, dan Patrio, diantarenye ;

jalan-jalan ke pasar baru,....
(nah sampe disono lu beli dah baju, sendal, tas, ape aje deh nyang penting mure..) jadi tambe kagak nyambung kan??? hehehehe namenye juge orang melucu..

Paling kagak, entule gambarannye pantunan orang jaman dulu ame anak jaman sekarang. dengan udah kagak merhatiin lagi nyambung belakange.. yang penting kedenger enak, artinye nyampe dan bise bikin orang ketawe.. dassssaarrr!!!

Dajjal Ma'duje

Dasar Dajjal Ma'duje..

Dulu umpatan kayak gini sering banget ane denger dari emak-emak nyang lagi ngomelin anaknye nyang dirasain ude kebagetan ngeselin atinye. Kagak tauk deh name panjange Dajjal jadi ditambahin Makduje atawe Ma'duje entu dari mane.. nginget umpatan eni jadi bikin ingetan ane jau ke umpatan-umpatan atawe sumpah serapah orang-orang betawi jaman dulu yang sepertinye ude lame kagak disebut-sebut lagi bahkan mungkin ampir ilang. Mungkin ade beberape nyang masing diungkapin di jaman sekarang, tapi jadi kesannye ude kedenger kasar banget. Ade beberape yang paling ane inget eni. tapi kalu mau dikumpulin, mungkin sepertinye ade tige bagian dari umpatan-umpatan tersebut, diantaranye;

Buat ngomel atau mengumpat kelakuan orang atau anak nyang gak baek, biasanye orang nyang lebih tua atau sebaya akan ngatain tuh anak dengan ungkapan, seperti;

"Dajjal Ma'duje", "Pejajaran", "Samaran Taik", "Gak tau diri", "Sial dangkalan"

Buat mengumpat atas keadaan orang biasenye ame kate-kate seperti;

"Dengkul Kropok" atau "Otaklu di dengkul" (kalu tuh orang dianggap bego banget), "Matalu Buta" (kalu tuh orang gak ngeliat barang di depan mate), "Bijilu mledug", "Palelu Peyang", "Pelelu Emod", "Mati rabit", "Mandi kipe", dan "bujug" atau "bujug buneng",

Umpatan khusus buat perempuan "nakal" tukang maen laki-laki atawe jadi perek, biasenye dikatain

"Grempang" atawe "Cabo"

Kenape sik Kudu Banyak?

Belakangan Cang Rojak jadi bingung sebab anaknye yang punye name Zaenuddin atawe nyang biase dipanggil ENJAY suka kagok kalu lagi ngeboncengin die pegi ke rume anaknye nyang paling tue si Dolo pitak. Begitu ditanye, si Enjay cuman bilang, "Sory Be, aye asik ngeliatin bendere nyang pade dipajangin di jalanan bermacem-macem ude gitu pade nyebar kayak ditebarin kemane-mane. Ade nyang nyangsrang di puun angsane, puun jaran, puun turi, belon nyang ditempel ditembok2 ame di tiang listrik atawe telepon. Jadi bikin silo mate aye.. jadi pas bengong eh mobil di samping ngasi klakson.. mangkenye pegangan nyang kenceng ye Be..".

"Kenceng palelu peyang...", gerutu si Babe. "Eh tong, emange Gue lu kire bongsang pisang nyang kudu nempel rapet ame badanlu nyang bau codot. lu ngojek kagak mandi ape ye? lagian pan gue Babelu.. ude bau tane ni.. masak lu samain ame anak mude nyang kudu sigap, dasar mate lu aje nyang rabun.. mude-mude ude kayak mate ayam ngeliat malem aje.." katenye lagi sambil asik ngisep rokok guang garam kreteknye.

"Bukan begitu Be, aye cuman bingung. sekean banyak gambar, sekean banyak wakil sekean banyak name.. emange nyang mau dicari ape ye.. kalu dasar ame pikirane same aje trus kenape kagak pade rembukan aje ye.. nentuin mane nyang ngepas ame pikirane die2 pade. jadi kagak bikin bingung kite2. nah ngeliat merek ame judule aje ude bikin kepale nod-nodan (punyeng), belon lagi kalu masing-masing parte punye wakile.. jangan2 asal nemuin calon yang bakal dipasang buat menuh-menuhin wakilnye di pemerinte jadi asal pili.. nyang penting komplit. aye jadi kepikiran pegimane nasib kite kalu nti ade di tangan orang nyang cuman asal pili?"

"Eh panjul, lu kenape repot mikirin sik? emang selame eni dari sewaktu elu masing di perut enyaklu ampe bangkotan kayak gini pemerinte perne mikirin? orang-orang nyang elu pili perne ngasi pinjem Babe duit waktu elu ampir klenger waktu diserempet mobile Mandor Betong sehingge Babe gadein tane buat bawa elu ke rume sakit? trus waktu binilu keguguran trus dokter kagak mau terime sebelon ade duit jaminan sehingge enyaklu ngelolosin kalung nyang bole die sayang-sayang bawaan dari tane meke (mekah maksudnya) emang orang2 nyang di poto entu nyang nyetorin tuh jaminan? pan semue duit gue, bande gue? kalu Babe sih bagen amat..

"ye si Babe ampe segitu sewotnye... kagak gitu juge kaleeee..",samber Zaenuddin alias Enjay alias si Panjul. "Siape tauk (ngarep banget), masing ade orang nyang mau sudi kirenye mikirin nasipnye orang kagak punye Be.., maksud aye neh, katenye semuenye kan pasti ade landasan atawe dasar nyang dijadiin patokan buat berjalane tiap-tiap parte atawe kelompok. Kalu kagak igame ye Pancasile. Maksud aye ni Be.. kalu landasane ude jelas, pasti dong banyak kesamaan tujuan ame pelaksanaannye. apelagi nyang jadi sasarane aje ude jelas masyarakat indunesia' .. lantas kenape kudu banyak macemnye?" Jelas Zaenuddin ke Babenya.

"Eh Njul, ape buat kite pan jelas.. idup aman, cukup madang (makan), cukup tempat tinggal, ame semua serbe gampang. ape lagi Babe nyang ude tue.. kagak banyak kepengenan deh.. nyang penting gampang buat ibade ame kagak bingung carenye.. mo ibade aje sekarang ude bikin Babe bingung.. bagian ini carenye begini, bagian ono carenye begono, bagian itu carenye begitu.. katenye satu igame? ngape jadi pade mencer sik tempat sembayange? kalu bede igame sik masing wajar.. "Omel si Babe.

"Yeeeeeeeeee Babe, semue juge katenye tujuanne same, cuman jalane aje nyang bede.. tapi kalu dipikir-pikir iye juge ye Be.. kalu sasarane ke orang-orang kenape kagak disatuin aje ye.. pan kite jadi pade kagak bingung.. dan pastinye gambar, merek, name parte dan wakilnye jadi kagak bejibun kayak gini.. kalu gini care bikin peste demokrasinye.. berape duit nyang kudu dikeluarin.. berape dalem kantong konjene dirogo ye..?" Tanya Zaenuddin bingung siape nyang kudu ngejawab.

"Auk leeee.. lu tanye aje no ame tuyul atawe jin tomang nyang kerjaane ngumpulin duit buat majikane..", samber Babe kesel.. pantat ude pegel tapi belon juge nyampe di rume...

Negara 1000 Partai

Kalu jaman dulu kite sering didongengin ame mak kite cerite tentang serebu satu malem. Cerite tentang seorang raje nyang kedemenane ngawinin perawan selame atu malem, abis gitu besoknye tuh perawan kudu dihukum mati. Wah hasil abis deh tiap perawan di negeri tersebut tinggal anak si perdane mentrinye nyang pinter. Untuk mencegah kejahatan si raje akhirnya tiap malem sehabis die 'berhubungan' si bini bikin cerita seru nyang musti ade kelanjutane kerne ari ude mulain pagi. Cerite begini bikin tuh raja jadi kepengen lagi ngedenger lanjutane besok, akhirnye setelah 1000 malem dan si bini punya anak si raje sadar kalu selame eni perbuatane sale dan die yakin kalu bininya orang nyang kagak selingku dan sayang.

Nah, cerite nyang kali eni mo ane ungkapin adale cerite tentang negare nyang punye 1000 partai. Maklum aje, negare nyang emang penduduknye aje udeh suse diitung ame jari, belon macem-macem bangse, bahase, budaye, makanan, ampe ke pakean ame celane dalemnye aje mereknye bede... kalu mo kite tilik-tilik sik, sebenernye ampir same tuh jalan ceritenye.. tujuanne nyari satu bini nyang cocok nyang bakal dipinang ame raje (nah kalu ini tujuanne nyari satu pemimpin nyang cocok nyang bakal diambil jadi wakil negare eni. cuman kudu nunggu sabar dulu dengerin cerite, kemauan, dan tujuannya dari serebu parte tersebut.

Ngeliat dari karakter raje ini juge ibarat sebue nagare. Di cerite 1000 satu malem eni pan rajenye juge rada2 kagak caya'an ama tuh bini. jadi kudu yakin dulu kalu bininye 'aman' kagak 'selengkuh'. Begitu juga ame di negare 1000 partai. si pemerinte kudu aman dan yakin kalu2 partenye kagak cuman mentingin diri kendiri, kagak ngegendutin perutnye kendiri. Wal hasil dari tige parte yang dulu langsung deh bengkak jadi 1000 parte.. coba kalu kite mo pikirin berape biaya buat kampanye, rapatnye, nyebar kertasnye, nyebar spanduknye, balon lagi waktu kite mili.. nah tuh kertas nyang bakalan dicontreng panjangnye aje dari tane ampe dade.. apa kagak bikin bingun rakyat jelate aje tuh?

Nah, kalu ude begini, semua parte, golongan, dan orang2nye pun pasti ngaku kalu die-die ajele nyang paling pantes buat diambil jadi wakil ame pemimpine. kagak peduli berape duit nyang keluar dari kantonge, dan kagak tauk kegunaannye ape bearti banget bagi masyarakat atawe male bikin sengsare.. nyang penting tujuanne kan nyampe..

Ujung-ujunge kite orang rendahan lagi nyang jadi korban. banyak duit keluar kagak karuan, banyak kertas betebar kagak keruan. satu parte aje duit promosinye bise ratusan jute lha pegimane ampe 1000 ? udah bise bikin modal buat rakyat kan tuh. Kenape bisa begini?

Nafsu 'lawhamah' dan 'amarah' nyang nyokol di dade.. jadi jebule kagak ade lagi persatuan dan kesatuan dalam pemikiran, bahase, dan tindakan. kalu pade berlomba-lomba buat bikin nih negare makin baek sik kagak pape.. lha kalu malah menta duit negare buat modal kampanye? bujug .. ape jadi kagak berabe?

EMANGE TUH DUIT PUNYA BAPAK MOYANGE????????

Belajar Terime Kritikan

Assalamu alaikum Ya Akhi WNI (khususnye) dan warge kelompok laen yang ngerase kesinggung ame tulisan yang mungkin baek sadar atawe kagak sadar jadi kene atawe merase. Tapi, baek deh untuk lebih enaknye ane menta maap buat akhi WNI yang merase kantongnye atawe embun-embunanne jadi keganggu. Tapi, kalo bole diunjukin di tulisan mane ye ane nyebutin boroknye atawe belange?

Kan sedari awal ude dibilang tulisan eni cuman sekedar ape nyang ane ngerasain sebagai orang nyang bukan siape-siape. kalu soal elmu mah ane kalah banget deh me ente-ente pade. jadi, kagak ade artinye kalu pengen ngorek-ngorek tentang keberadaan ane, latar belakang ane, hehehehe jadi ngerase kayak pejabat nyang lagi naek daon trus pengen nyalonin diri pasti deh besoknye banyak orang nyang pade nyari berite tentang pejabat entu.. ade nyang baek le.. nyang kagak baek le.. pokoknye sesue ame permentaan pasar.

Ane bukan selebritis bang WNI, cuman orang biase, kalu ente berkenan ame unek-unek ane buat lelucuan kagak pape tapi kalu mo ditanggapin serius sik bukan tempatnye.. same aje ade orang2e pulitisi nyang merasa kesinggung begitu ngedenger ade tukang becak atawe tukang sapu jalanan nyang ngegerutu soale pas tokoh mereka itu lewat depan si tukang becak tersebut tanpa menoleh atau negor atau die buang ludah.. atau buang sampah.. padahal baru aje tu tempat disapuin bersi.

pernah ane denger ustad ane cerita tentang Sayyidina Ali nyang tersinggung ame seorang Yahudi sewaktu dihine. Nah Rosul nanya, si orang tersebut menyinggung soal agama atau dirinye (atau golongannye?). Begitu Ali bilang soal dirinye nabi larang die mare tapi kalau nyinggung masalah igame? baru deh tunjukin kebenaran igame kite.. (entu juga kagak perlu sewot atawe nyari tauk siape tuh yahudinye).

Kalu ente penasaran ame ane ngedidik bini.. alhamdulille.. sejak die jadi bini ane ampe sekarang die pake pakean nyang nutup aurat perempuan (bukan jilbab karena kagak ade keterangan berjilbab tapi nutup aurat) kecuali kalu ame keluarge, ame lagi berduaan deh hehehe. Kalu ente ngeliat gambar trus langsung nyuru ane kudu didik bini dulu baru bekoar sik.. alhamdulille.. deh. Nti kalu ngeliat gambarnye 'Inneke Koesherawati' nyang lagi pake bikini atawe gambarnye Kang Uje nyang lagi 'teler' dulu, ente pasti langsung bilang Nauzubillah min dzaalik ternyata mereka 'rusak' dan gak ngerti 'aurat' hehehehe.

Tapi, kagak pape deh bang WNI.. namenye tegoran dari seorang sodare.. dengan tangan kebuke dan ati nyang ngablak ane nerimain.. namenye juge cuman celetukan ane yang bodoh.. atau seorang al-fakir (kalu kate bang WNI kali yeee). Tabek ye Bang atas pengamalan surat WAL Asri nye..

Salam peluk mesra,
ane