Masing Tentang Pahlawan

Baru-baru eni akibat dari rencane pemilian umum nyang sekirenye mau dilaksanain sekitar bulan April taon 2009 jadi mangkin bikin heboh. di tipi2 di koran2 ude pade rame ame iklane partai2 baek nyang terus terang atawe nyang masing malu-malu. Ade nyang kendiri-kendiri atawe ade juge nyang atas name partainye. Kagak kalah juge ame pimpinan kite nyang sekarang eni. Masing pengen rupenye die.. tapi, entu semue pan tergantung ame kemampuannye die-die pade buat ngambil ati orang Indonesia umumnye nyang ude pade luke ati akibat gembar-gembornye baeknye pemerintele atawe janji2 nyang dulu perne diutarain waktu mau pemilian kurang lebi lime taon nyang sude.

Nyang ane mo sorot disini iklane salah satu partai nyang akhirnye jadi gunjingan, protesan atawe ade nyang kurang deman ame ape nyang disajiin tuh iklan. Kalu ente perne liat iklannye salah satu partei nyang nongolin tokoh-tokoh jaman jebot mulain dari Presiden Soekarno, Presiden Soeharto, KH Hasyim Asyhari, KH Ahmad Dahlan. Kagak sale emang kalu kite sebagai orang nyang ngagungin pejuangan tokoh2 entu. Mangkenye menurut ane sih sah-sah aje kalu sekirenye semue partei emang mau ngehargain orang2 tersebut jadi bukan cuman milik partai2 tersebut. Sempit pikiran tuh orang kalu emang nganggap orang tersebut cuman orang partainye doang.. nyang namenye pahlawan nasional atau pejuang atawe pahlawan kagak sale kalu kite mo pake sebage simbul atawe penghargaan.

Tapi, nyang lebih2 marenye orang lagi waktu tampange Presiden kedue kite ee bejibun nyang protes kerne dianggepnye die bukan sosok orang nyang pantes buat dijadiin sosok pahlawan kite. Yeeee.. belon ape-ape kite ude mo nilai orang aje baek benernye. Orang kite aje belon tentu bener.. lagian bener ape kagaknye kan nyang nilai Alloh. Paling kagak kite juge arus kudu terime kasih atas ape nyang ude perne diperjuangin buat kite. Sekean taon Indonesia perne di bawah pimpinanan die emang kagak satupun nyang berarti? kagak satupun nyang bermanfaat? kagak satupun nyang bikin ati kite seneng? lantas jaman kapan waktunye nyang bikin kite paling seneng?

Kalu ude gini, emang siape nyang paling pantes dibilang pahlawan?

Siape Nyang Jadi Pahlawannye?

Belon lame Pemerinte ngambil keputusan buat eksekusi terpidane kasus Bom Bali ke satu yang menelen korban kire-kire 200 orang pade mati, baek nyang berasal dari luar maupun negare kite kendiri.

Di tipi2 aje bentar2 kite longok ade aje berite tentang tempat eksekusinyele, waktunyele, bahkan cikal bakal kenape die-die orang (Amrozi, Imam Samudra, ame Mukhlas) jadi diberi gelar rangkap .. gerombolan teroris ame pejuang mujahidin.

Emang banyak nyang pade setuju kalu sekirenye terpidane entu dijatuin kumuman mati sesuai dengan kejahatannye. Tapi, kagak sedikit juge orang pade protes dengan alasan tujuannye kan buat ngancurin antek-antek kumpeni nyang negarenya kendiri udah seenaknye ngebomin orang Islam hampir diseluruh dunya.

Tapi, kalo mau kite sedikit renungin lagi, ape emang ude seperti itu care perjuangan nyang dicontoin abis ame Nabi kite? ape emang bener kejahatan perang pemerinte sono (asing) harus dibales kepade orang laen nyang belon tentu die dukung ape-ape nyang dijalanin pemerintahnye? belon lagi kalu bangse kite kendiri yang akhirnye jadi korbannye? rase-rasenye orang sekarang ude pade kibir ame sombong, ude merase sebage pencipte sehingge dengan gampang aje punye rencane mau ngilangin nyawe orang laen. Nauzubile min dzaalik. Ape ude pasti yakin bener ape nyang dijalanin entu sesuai dengan syareat nyang dianjurin sebage orang nyang berigame? waduh, kalu semue permasalahan diahirin ame ngebom sane-ngebom sini bise2 anak bini kite nyang kite tinggal kerje bisa jadi jande ame yatim kali yeee.. tanpa punya kesempatan buat nanye salah bapaknye ape? kok seenaknye aje mutusin kehidupannye. Trus lagi bini nyang lagi jalan belanje mo masakin kite atawe bini kite nyang suse paye nyariin duit di mol-mol atawe di rume makan buat tambahan kebutuhan hidup kite atawe buat ngedidik anak-anak kite biar pade bener malah jadi korban atas pemikiran orang-orang nyang kayak gini.

Ane jadi inget cerite ustad ane mengenai care perangnye Nabi kite. Dulu sewaktu dia ame umatnye lemah die disekse dan akhirnye banyak nyang pade ngungsi buat mencari perlindungan dan kebebasan. begitu nyusun kekuatan Dia berjage-jage dari serangan bahkan berperang buat bertahan dengan cuman membunuh orang-orang nyang pade bersenjate. Kalu ude nyerah ye ditahan kagak dibunuh lagi. Dan ditawarin mo ikutan pindah agame ape kagak. Kalu ikutan dibebasin kalu kagak mo ditahan ape ditebus. kalu ditebus dikasih kalu kagak tetep ditahan dengan perlakuan yang baeeek banget. Nah begitu udeh punya kekuatan gantian deh Die nyang nyerang tapi dengan catetan kagak boleh ngerusak rume orang, kagak boleh ngebunuh orang nyang kagak ngelawan (pegang senjate), harus ngelindungin anak-anak ame orang tue, membuat aman orang nyang pade masuk ke tempat ibadah, kagak boleh ngerusak pepoonan.

Lah, terus nyang dimaksud ame bom sekarang tujuannye ape? carenye pegimane? nyang pade mati siape? tercape kagak buat perjuangannye? ape ude pade yakin dimate Alloh dianggep ape nyang diperjuangin selame ini pasti bener? korbannye orang nyang kite kagak tauk die musuhin kite ape kagak, bangunan nyang dibom juge tempat orang nyari makan ude gitu nyang jadi korban juge kebanyakan orang kite kendiri. Lantas pegimane pertanggungjawaban orang entu dimate Alloh? rase-rasenye jadi ude pade keblinger ye orang sekarang dalam ngartiin arti 'jihad fisabilillah'..

Kalu ude gini siape coba nyang jadi pahlawannye????