Malem Nisfu Sya'ban ..

Pade ari Kemis malem Jumahat kemaren, pas tanggal 7 September taon 2006, bertepatan dengan malem ke 15 bulan Sya'ban 1427 Hijriah di mesjid-mesjid dan di musholla di daerah ane sejak pagi udah rame banyak pengumuman akan diadain malem nisfu sya'ban melalui sombok atawe pengeras suara.

Buat orang betawi, malem nisfu sya'ban ini jadi seperti acara wajib, nyang biasanye diadain tepat abis sembahyang menggerib. biasanye kalu pas mau malem nisfu eni, orang kampung ane pade berbondong-bondong deh dateng ke mesjid atawe musholla sambil nenteng aer di kendi, teko, atawe wajan laen. Kalu sekarang sih orang nyari simpelnye aje.. pake botol aqua .. bisa nyang satu leteran atawe nyang kecil. Tapi, biasenye sewaktu ane kecil aer yang diambil dan dipake buat acara nisfuan itu adalah aer nyang diambil langsung dari sumber mata aer, bisa aer sumur, aer kompaan. Kalu sekarang sih orang nyari nyang sehat aje.. diye ambil aer nyang udah dimasak atawe beli aqua dah.. kalu nyak ame babe bilang kurang afdol..

Nah, pas abis menggerib dan abis pade sembahyang ame wiridan, biasanye si ustad mimpin jemaahnye buat pade bikin lingkaran ataw nyang ditengah-tengahnye ditaruh aer nyang pade mau dibacain yaasiin dah. Abis gitu, si ustad ngomongin ame para jemaah bapak2 ame ibu2 bahwa entu malem mau yaasiin-an menyambut malem nisfu sya'ban dengan membaca surat yaasiin rame2 sebanyak tiga kali. Yang pertama diniatain buat minta kepada Alloh SWT agar diberikan kesehatan jasmani atawe badannya buat kuat beribadah kepada Alloh. Nah, nyang kedua minta kepada Alloh SWT agar dikasi rejeki nyang banyak dan halal buat bekal ibadah kepada Alloh. dan nyang ketiga kite minta kepada Alloh SWT agar ditetepi iman dan islam.

Sehabis pembacaan surat Yaasiin yang dibaca agak cepet seperti orang balapan eni. biasanye diselingin ame do'a nisfu Sya'ban.. nah.. sehabis acara selesai baru deh ibu2 atawe bapak2 ame anak2nye pade berebutan ngambil tempat aer yang diye tadi udeh siapin. Nah, biasenye tuh aer ade nyang langsung diminum, atawe dibawa pulang buat anak bininye di rumeh, bisa buat minuman orang sakit, atawe untuk tujuan ape aje asal mintanye tetep ame Alloh..

Karena acara bacaan surat Yaasiin itu emang buat orang betawi sering dibaca tiap malem jumahat atawe kalu pas ade undangan selametan pindahan rumah, selametan orang abis nikah, atawe kalu ade tahlilan pas acara kematian mangkenye buat orang betawi jaman dulu.. nggak heran kalu rata2 orang pade apal atawe paling nggak diye bisa ngikutin bacaan surat Yaasiin kalu nggak pake surat. Ape lagi di daerah kampung baru di tempat rumah mertua ane.. rata2 dari anak tanggung ampe orang tuanye emang pade apal ama nih surat..