Mester Kontroversial ude menginggal

Barusan aje Wak Juki pulang sehabis ngelakonin jadi juru do'e alias tukang bacain do'a buat orang mati di kuburan wakapnye Haji Domang.. serebetan pakeannya masih belepotan ame tane base.. sebab semaleman ujan deres jadi bikin tane kuburan pade belok.. na keringe aje ude bikin kotor apelagi kalu ude becek.. mane kagak diaspal lagi gang-gang nye.. (emang kuburan buat tempat bikin MHT ape?).

Baru aje die ngaso sambil bekipasan ame amplop yang diselipin ame keluarge si mayit kedengeran di mesjid diberitain telah meninggal seorang tokoh besar kampung di rume sakit sebab abis nyabut gigi.. gerahamnye nyang tinggal atu-atunye.. walah.. kok meninggal orang gampang banget ye.. pikirnye..

Pikiran Wak Juki langsung melayang beberape taon nyang lalu.. waktu pertame si mester jadi pimpinan kelompom igame.. di kampungnye nyang kabarnye selalu bikin gaye nyang bikin pare ulame laennya pade blingsatan.. dibilang kagak ngerti elmunye banyak.. tapi dibilang ngerti ngape keputusannye bikin orang pade metotot..

Emang.. ampir semue orang bilang (terutame bukan pengikutnye) si Mester dibilang paling kontroversi (nah lo di bahase batawi bilnge ape ye?? eh belawanan) ame kondisi nyang biasenye.. bahkan kagak sedikit nyang bilang die ngawur.. ame habib .. sering banget die di protes.. ampe diajak adu pendapat.. tapi.. entu tadi.. paling-paling dengan nyantainye die bilang.. Emang Gue Pikirin..

Tapi, jangan sale.. kalu ketemu orang yang ude panatik ame elmu ajarannye.. bahkan beribu pengikutnye nyang bilang die wali.. beeeeh.. ngajakin ribut bise dah.. soale die-die emang yakin banget.. kalu bosnye entu orang bener.. cuman orang pade kagak ngarti aje ame pendapat-pendapatnye.. paling banter .. die bilang.. elmu orang pade kagak nyampe buat ngertiin segale pendapatnye.. wallohu a'lam deh..

Nah.. perlawanan eni nyang kadang diatasnye adem ayem.. eh dibawah nyang pade gontok2an.. wal hasil.. begitu denger kabar meninggal.. banyak nyang pade loncat kegirangan.. dan kagak sedikit nyang ampe nangis jejeritan.. guling-guling ame ngegeloso kaya anak kecit kagak kebagian es bon bon..

BIKIN BUS WAY NYE KAGAK NIAT

Sebagai warge Betawi nyang baek, Haji Muin kalu kemane-mane pasti ngusahain buat naek busway.. mo die ke lebak bulus, grogol, mampang, kebon binatang, ancol atawe senen.. pokoknya ampir semingguan eni kerjenye jalan-jalan aje buat nikmatin enaknye ngelilingin pusat kote.. belon lagi pas sampe glodok dia mbonceng ojek sepede buat kelilingin kote tuwe.. dari kali besar ampe ke musium bahari di pasar ikan yang sekarang ude pade sepi.. kalu sempet die mampir ke keramat luar batang yang dulu kesohor banget sebab jadi tempat kunjungan pertame hampir semua masyarakat betawi.. siape nyang kagak kenal ame Habib Husein bin Bakar bin Abdurr Rahman Al-Idrus???

Tapi, niat ati jadi warge nyang baek.. pengen make pasilitas nyang ude dibuatin ame Bang Oji (Fauzi Bowo) nyang jadi gubernur sekarang.. namun, walhasil.. die nyang ude tuwe rente jadi mencak-mencak.. segitu die abis pulang keliling jakarte..

"Sial, matirabit, dasar emang kagak niat.. mo bikin orang suse jadi bahan ketawaan ape!!! gerutunye sambil mbuke sendalnye buat dibawa masup ke dapur tempat si Amine nyimpen sendal atawe sepatu.
"Nyebut.. bang.. abis kesurupan setan mane? kok pulang dari naek baswey malah jadi ngedumel kagak karuan gitu...., tanye si Amine sambil nyiapin aer minum lakinye di cuntang..

"E Mine, siape nyang kagak sewot.. janjinye waktu mau bikin busway.. katenye mo bikin kampung kite jadi lancar.. orang kaye ame orang suse satu mubil.. eh.. tau kagak kalu gue nunggu tuh mubil aje bise lebi dari setenge jem.. ngantri ke orang waktu jaman PKI dulu kite ngantri beras.. ude gitu.. kagak ade kipas angin.. bikin orang pade blingsatan tekurung di tempat nyang kagak ade udare.. ampir2 aje gue pingsan.. cuman buat nunggu mobil butut nyang dateng ke kiyong.. sepertinye buat beli mobil baru buat kesejahteraan masyarakat tingkat bawe ke kite aje Pemerinte suse banget yeh.. padahal tuh di koran2 pade nulis wakil rakyat minte mobil dines aje ampe satu mubil 1,3 milyar.. sedang kite satu mobil aje berebutnye ke orang ngantri bulgur jaman belande..

"Ye.. jangan ngambeknye ke aye dong Bang aji.. pan Abang kendiri nyang milih mo jalan-jalan pake pasilitas negare.. ye emang gitu.. rasenye.. emang selame eni kite perne liat salah satu aje pasilitas negare nyang bener?? mulain dari kerete, mubil bus, kapal terbang, atawe pengurusan ktp di kelurahan..

"Entu diye nyang gue pengen protes!!! bikin anggaran buat mobil wakil rakyat kok sanggup.. padahal disini masing butuh banget dana buat nambah mobil Busway.. noh liat.. jalan dari Grogol ame ke Celilitan aje .. ude ampir tige taon dibuat tapi kagak ade busnye.. belon lagi monorel nyang rencanenye dibangun dari Lebak bulus ampe ke Kote.. ude pade bediri tiange tapi.. kedengeran bacot mo nerusin tuh proyek aje kagak kedengeran.. jadi selame eni niatannye pegimane sik??

Makenye kalu kagak niat jangan bikin dong... gerutu babe sembari nyamber anduk buat pegi ke padasan.. buat ngademin badane nyang panas .. sekalian ngademin ati nyang dongkol ..

GITU AJE KOK REPOT...

Bulan Desember 2009 Negare kite ngerase keilangan.. orang nyang katenya jadi panutan, jadi kebanggaan bangse, bekas presiden kite nyang digulingin. Segitu hebohnye ampe-ampe Pemerinte lewat presiden kite minte supaye pade ngibarin bendere setenge tiang buat nyatain kalu kite lagi pade beduke cite.. ade nyang ngusulin buat dijadiin pahlawan nasional.. weleh deleh.. begitu banyak orang nyang memuji.. tapi kagak sedikit bahkan mungkin bejibun juge orang nyang pade mencak-mencak.. sebab secare langsung ape kagak perne bebenturan ame kepengenan si almarhum atawe perjuangannye bentrok ame die.. wal hasil ikut girang kerne orang nyang jadi penghalange ude 'kagak' (pengertian ude meninggal).

Tapi, kalu inget ame omongannye selame eni.. yang ngaggap ape-ape entu gak usah diambil ati alias nyantai aje.. rase-rasenye kite masing terngiang di dalem kuping kite .. :GITU AJE KOK REPOT.. jadi jangan dibesar-besarin, jangan dianggap ape-ape kerne emang orangnye juge rase-rasenya kagak kepengen kayak gitu.. jadi.. KENAPE KITE JADI PADE REPOT???

Jadi, nyang penting doe aje nyok biar amalnye, dirinye, imannye keterima ame nyang kuase.. sesuai dengan ape nyang diperjuanginnye selame eni.. kalu baek .. ye dapet nyang baek .. kalu jahat .. ye jadi jahat.. begitu aje.. ah.. jadi.. ane juge mo bilang ame Pemerinte.. ane masyarakat semua.. anggap biase aje.. jangan dibesar-besarin... GITU AJE KOK REPOT...