Lebarane Bede.. Asal Pade Akur Aje

Lebaran tinggal satu mengguan lagi. Tapi, ane bace berite di koran-koran dari jauh-jauh ari ude dibilangin kalu berdasarkan peritungan penentuan tanggal lebaran ude terjadi perbedaan penentuan tanggal lebaran antare Muhammadiye ame Nahdatul Ulama. Emang due organisasi enile nyang paling utame dalem nentuin tanggal lebaran sejak dari dulu. Prinsipe Muhammadiye pake penentuan ahli hisab kalu NU pake hilal atawe ngeliat bulan. Akibatnye tentunye ampir mau tiap taon ade aje perbedaannya kalu kagak awalnye puase ye awal lebarannye. Emang kalu ude prinsip orang jadi 'keukeuh' ame ape nyang di pegangnye. Kalu buat ane sih nyang penting enak aje. Nyang penting jangan pade berantem maen jelek-jelekin.

Jadi inget sewaktu ane kecil dulu. Masale khilafiyah aje nih orang nyang merase sebage bagian dari organisasinye ribut abis. Bahkan bisa dibilang ampe puncaknye jadi pade bemusuan antare orang2 dari organisasi eni. Kadang cuman masale ibadah nyang sipatnye antare diye ame nyang nyiptain aje jiye pade tuding-tudingan. Contonye masale jumlah sembahyang terawe aje dulu ude pade maen kate-katean. Nyang atu bilang sembahyange ngepot-le nyang satu dibilang sembahyang aje pelit, zikiran buat Allah aje medit jumlahnye pake dibatesin, orang mati le pake disedekahin yang ujung-ujungnge jadi tambah pusing buat orang yang mau tauk islam kok nape jadi pade gontok-gontokan gini.

Tapi, alhamdulille sekarang sepertinye masayarakat ame pemimpine udeh mulain sadar kali. Sebenernye perbedaan itu ade hikmahnye. Nyang penting masing satu igame. Masalah ibade entu urusan diri masing-masing asal ade prinsipnye. Diperdebatin dari taon jebot ampe sekarang juga kagak perne ade abis-abisnye. Emang Nabi Muhammad SAW aje bilang bakalan ade 73 aliran atawe firkoh. Mangke "Fastabikhul Khoirot" atawe berlombe-lombe dalem kebaekan dan mencari pahale itu nyang kudu jadi patokannye. Masalah pegimane carenye pan ude dibilang ame junjungan kite semuenye kerne niatnye. Alloh itu pegimane kite nganggep-Nye.

Weit jadi berbau igame neh. Sorry kagak pape deh mpung2 masing bulang puase. Sekali-kali ngeluarin nyang baek2 kagak pape kan ?